Drinking Water After Meals:మన శరీరానికి నీరు చాలా అవసరం అనే విషయం అందరికీ తెలిసిందే. అయితే ప్రతి సందర్భంలో నీరు తాగడం శరీరానికి ఉపయోగకరం అనే మాట సరిగ్గా కాదు. ముఖ్యంగా భోజనం చేసిన వెంటనే నీరు తాగడం వల్ల జీర్ణక్రియ ప్రక్రియలో ఆటంకం కలుగుతుందని వైద్య నిపుణులు సూచిస్తున్నారు. కొంతమంది ఈ విషయం తెలుసుకుని జాగ్రత్తలు పాటిస్తారు. కానీ చాలామంది అలవాటుగా తిన్న వెంటనే నీరు తాగేస్తారు. ఈ అలవాటు తాత్కాలికంగా ఉపశమనం కలిగించినా, దీర్ఘకాలంలో జీర్ణ సంబంధ సమస్యలకు కారణమవుతుంది.

లైఫ్ సైన్సెస్ జర్నల్‌లో ప్రచురితమైన ఒక అధ్యయనం ప్రకారం, భోజనం చేసిన వెంటనే నీరు తాగడం వల్ల కడుపులోని జీర్ణ ఎంజైమ్‌ల శక్తి తగ్గిపోతుంది. ఇవి బలహీనపడితే ఆహారం సరైన రీతిలో జీర్ణం కావడం ఆలస్యం అవుతుంది. ఆయుర్వేదం ప్రకారం కూడా భోజనం చేసిన తర్వాత కనీసం అరగంట పాటు ఏ పానీయం తీసుకోకూడదని చెబుతుంది. ఇది కడుపు రసాలు తమ పనిని సజావుగా చేయడానికి అవసరమైన సమయం.

Also Read: https://teluguprabha.net/health-fitness/health-benefits-of-ivy-gourd-for-diabetes-and-digestion/

ఆరోగ్య నిపుణులు చెబుతున్నట్లు, కొన్ని ప్రత్యేకమైన ఆహార పదార్థాలు తిన్న తర్వాత వెంటనే నీరు తాగడం మరింత ప్రమాదకరం. అవి జీర్ణక్రియను మాత్రమే కాదు, శరీరంలోని రసాయన సమతుల్యతను కూడా ప్రభావితం చేస్తాయి.

బొప్పాయి తిన్న తర్వాత..

ఉదాహరణకు, బొప్పాయి తిన్న తర్వాత వెంటనే నీరు తాగితే జీర్ణ రసాల సాంద్రత తగ్గిపోతుంది. బొప్పాయి స్వభావంగా నీటిని ఎక్కువగా కలిగి ఉంటుంది. కాబట్టి తిన్న వెంటనే నీరు తాగితే కడుపు రసాలు పలుచన అవుతాయి. దీనివల్ల ఆహారం విరిగిపోవడం ఆలస్యం అవుతుంది. నిపుణుల ప్రకారం కనీసం 40 నిమిషాల తర్వాతే నీరు తాగడం మంచిదని సూచిస్తున్నారు.

అరటిపండు..

అలాగే అరటిపండు తిన్న వెంటనే నీరు తాగడం కూడా హానికరం. అరటిపండులో ఉన్న పొటాషియం, ఫైబర్‌లు శరీరానికి మేలు చేస్తాయి కానీ నీరు తాగడం వల్ల అవి సరిగా గ్రహించబడవు. ఇది అజీర్ణం, ఉబ్బరం వంటి సమస్యలను కలిగిస్తుంది. కాబట్టి అరటిపండు తిన్న తర్వాత సుమారు 30 నిమిషాలు వేచి ఉండటం ఆరోగ్యానికి మంచిదని వైద్యులు చెబుతున్నారు.

సిట్రస్ ఫలాలు …

సిట్రస్ ఫలాలు… అంటే నారింజ, ముసంబి, బత్తాయి లాంటి పండ్లు కడుపులో ఆమ్ల ఉత్పత్తిని పెంచుతాయి. ఇవి తిన్న వెంటనే నీరు తాగితే ఆమ్లాలు పలుచన అవుతాయి. దీని ఫలితంగా జీర్ణక్రియలో అసమతుల్యత వస్తుంది. తరచూ గ్యాస్, అజీర్ణం వంటి సమస్యలు ఎదురుకావచ్చు. కాబట్టి ఈ పండ్లు తిన్న తర్వాత కనీసం అరగంట తర్వాతే నీరు తాగడం ఉత్తమం.

వేరుశనగలు…

వేరుశనగలు కూడా భోజనం తర్వాత వెంటనే నీరు తాగరాదని సూచించే ఆహారాలలో ఒకటి. వేరుశనగలలో ప్రోటీన్లు, కొవ్వు ఎక్కువగా ఉంటాయి. వీటి జీర్ణక్రియకు కడుపులోని ఎంజైమ్‌లు సమర్థంగా పనిచేయాలి. నీరు తాగితే అవి బలహీనపడతాయి. దీంతో కడుపులో భారంగా అనిపించడం లేదా అజీర్ణం వంటి సమస్యలు కలగవచ్చు. పిల్లలలో ఈ సమస్య మరింత సాధారణమని వైద్యులు చెబుతున్నారు. కనీసం 20 నిమిషాలు విరామం ఇచ్చి నీరు తాగడం మంచిది.

పాలు తాగిన తర్వాత…

పాలు తాగిన తర్వాత కూడా వెంటనే నీరు తాగకూడదు. పాలలో ఉన్న ప్రోటీన్లను శరీరం గ్రహించడానికి అవసరమైన కడుపు ఆమ్లాలు నీటితో కలిస్తే తమ శక్తిని కోల్పోతాయి. ఇది జీవక్రియను మందగిస్తుంది, కడుపులో ఆమ్లత్వాన్ని పెంచుతుంది. అందువల్ల పాలు తాగిన తర్వాత కనీసం 30 నిమిషాలు లేదా ఒక గంట తర్వాతే నీరు తాగాలి.

Also Read: https://teluguprabha.net/health-fitness/when-to-avoid-toor-dal-health-risks-of-eating-toor-dal/

భోజనం తర్వాత…

ఇక భోజనం తర్వాత వెంటనే నీరు తాగితే ఇంకో సమస్య కూడా తలెత్తుతుంది. ఆహారం కడుపులో ఉన్నంతసేపు జీర్ణరసాలు దానిని విరగబరచాలి. కానీ నీరు ఆ రసాలను పలుచన చేస్తే ఆహారం అర్ధం జీర్ణం అవుతుంది. దీని ఫలితంగా శరీరంలో పోషకాలు సరిగా గ్రహించబడవు. దీర్ఘకాలంలో ఇది మలబద్ధకం, అజీర్ణం, గ్యాస్ వంటి సమస్యలకు కారణమవుతుంది.

జీర్ణక్రియ సరిగా జరిగితే…

జీర్ణక్రియ సరిగా జరిగితే శరీరం తేలికగా అనిపిస్తుంది, శక్తి ఎక్కువగా ఉంటుంది. కానీ జీర్ణక్రియ మందగిస్తే అలసట, కడుపు ఉబ్బరం, తలనొప్పి వంటి సమస్యలు వస్తాయి. అందుకే నిపుణులు భోజనం చేసిన వెంటనే నీరు తాగకూడదని హెచ్చరిస్తున్నారు.