America shutdown Closing soon: అగ్రరాజ్యం అమెరికాలో గత కొంత కాలంగా షట్ డౌన్ కొనసాగుతున్న సంగతి తెలిసిందే. దాదాపు 40 రోజులుగా అమల్లో ఉన్న ఈ షట్ డౌన్ ఎట్టకేలకు ముగింపు దిశగా అడుగులు వేస్తోంది. సుదీర్ఘకాలంగా కొనసాగుతున్న షట్‌డౌన్ ముగింపు పలికే దిశగా సెనేట్ తొలి అడుగు వేసింది. దేశ చరిత్రలోనే అత్యధిక కాలం, అంటే 40 రోజులకు పైగా కొనసాగిన ఈ సంక్షోభాన్ని పరిష్కరించడానికి ఉద్దేశించిన నిధుల బిల్లుకు సెనేట్‌లో ఆమోదం లభించింది. ఈ కీలక బిల్లుపై సెనేట్‌లో జరిగిన ఓటింగ్‌లో, అటు డెమొక్రాట్, ఇటు రిపబ్లికన్ సెనేటర్ల బృందం కుదుర్చుకున్న ఓ తాత్కాలిక ఒప్పందం విజయం సాధించింది. షట్‌డౌన్‌ను ముగించడానికి ఇరు పార్టీల మధ్య జరిగిన చర్చలు ఫలించాయి. ఈ ఒప్పందంలో భాగంగా చాలా ఫెడరల్ ఏజెన్సీలకు జనవరి 30, 2026 వరకు నిధులు సమకూరుతాయి. వ్యవసాయ శాఖ, వెటరన్స్ వ్యవహారాల శాఖ వంటి కొన్ని కీలక ప్రభుత్వ విభాగాలు ప్రస్తుత ఆర్థిక సంవత్సరం మిగిలిన కాలానికి పూర్తిగా నిధులను పొందుతాయి. షట్‌డౌన్ కారణంగా జీతం నిలిచిపోయిన ఫెడరల్ ఉద్యోగులందరికీ కార్యకలాపాలు పునఃప్రారంభం అయిన వెంటనే వారి బకాయిపడిన జీతాలు చెల్లిస్తారు.

సుదీర్ఘమైన షట్ డౌన్ గా రికార్డు..

నిధుల బిల్లుపై చర్చను ముగించి, తదుపరి పరిశీలనకు తరలించడానికి సెనేట్‌లో కనీసం 60 ఓట్ల మద్దతు అవసరం. ఈ కీలక ఓటింగ్‌లో 8 మంది డెమొక్రాటిక్ సెనేటర్లు తమ పార్టీ వైఖరికి భిన్నంగా రిపబ్లికన్లకు మద్దతుగా ఓటు వేశారు. దీంతో బిల్లుకు అవసరమైన మెజారిటీ లభించి, ఆమోదం పొందింది. అయితే, సెనేట్ డెమొక్రాటిక్ నేత చక్ షుమెర్ సహా పలువురు సీనియర్ డెమొక్రాట్లు ఈ ఒప్పందాన్ని వ్యతిరేకించారు. అఫర్డబుల్ కేర్ యాక్ట్ కింద ఆరోగ్య సంరక్షణ సబ్సిడీలను పొడిగించే అంశంపై స్పష్టమైన హామీ లేకపోవడమే వారి ఆందోళనకు ప్రధాన కారణం. ఈ బిల్లు ఇప్పుడు తుది ఆమోదం కోసం ప్రతినిధుల సభ ముందుకు వెళ్తుంది. అక్కడ కూడా ఆమోదం లభించి, అధ్యక్షుడు డొనాల్డ్ ట్రంప్ సంతకం చేస్తే, అమెరికా చరిత్రలో సుదీర్ఘమైన ఈ షట్‌డౌన్ ముగుస్తుంది.

భారీగా పతనమైన మార్కెట్లు..

సుదీర్ఘ కాలం షట్‌డౌన్ కొనసాగడం వల్ల మార్కెట్లు పడిపోవడం మాత్రమే కాకుండా.. ప్రజ విశ్వాసం దెబ్బతింటుంది. షట్‌డౌన్ కొనసాగే ప్రతి వారానికి ఆర్థిక వృద్ధి 0.1 నుంచి 0.2 శాతం వరకు తగ్గే అవకాశం ఉందని విశ్లేషకులు అంచనా వేస్తున్నారు. ఈ సబ్సిడీలు ముగిస్తే.. దాదాపు 2.4 కోట్ల మంది అమెరికన్లకు ఆరోగ్య సంరక్షణ ఖర్చులు ఒక్కసారిగా పెరిగాయి. ఎట్టకేలకు అమెరికా చరిత్రలోనే అతి పెద్ద షట్ డౌన్ ముగింపునకు చేరుకోవడంతో అందరూ ఊపిరి పీల్చుకుంటున్నారు.