Air Force Jet Crashes Into School: బంగ్లాదేశ్ రాజధాని ఢాకాలో ఘోర ప్రమాదం జరిగింది. బంగ్లాదేశ్ వైమానిక దళానికి చెందిన శిక్షణ విమానం ఓ పాఠశాల ప్రాంగణంలో కూలి 19 మంది మరణించారు. మరో 164 మంది గాయపడ్డారు. ఉత్తర ఢాకాలోని ఉత్తరా ప్రాంతంలో ఉన్న మైల్‌స్టోన్ స్కూల్‌లో జరిగిన ఈ ఘటన, దేశ ప్రజలను తీవ్ర దిగ్భ్రాంతికి గురిచేసింది.

టేకాఫ్ అయిన కొద్దిసేపటికే..

సోమవారం మధ్యాహ్నం 1:06 గంటల సమయంలో, బంగ్లాదేశ్ వైమానిక దళానికి చెందిన F-7 జెట్ విమానం శిక్షణలో భాగంగా టేకాఫ్ అయ్యింది. కొద్ది నిమిషాల్లోనే యాంత్రిక లోపం కారణంగా ఈ విమానం ఉత్తరా ప్రాంతంలోని మైల్‌స్టోన్ స్కూల్ అండ్ కాలేజీ రెండంతస్తుల భవనంపై కూలిపోయింది. విమానం కూలిన వెంటనే భారీ అగ్నిప్రమాదం సంభవించింది. ఆకాశంలో దట్టమైన నల్లని పొగలు కమ్ముకున్నాయి. ప్రమాదం జరిగిన సమయంలో పాఠశాలలో 4 నుంచి 18 సంవత్సరాల వయస్సు గల విద్యార్థులు ఉన్నారు.

సహాయక చర్యలు

ప్రమాదం జరిగిన వెంటనే, బంగ్లాదేశ్ అగ్నిమాపక బృందాలు, ఆరు అంబులెన్స్‌లతో సహా తొమ్మిది యూనిట్లు ఘటనా స్థలానికి చేరుకున్నాయి. కాలిన గాయాలతో ఉన్న దాదాపు 50 మంది విద్యార్థులు, పెద్దలను బయటకు తీసి నేషనల్ ఇన్‌స్టిట్యూట్ ఆఫ్ బర్న్ అండ్ ప్లాస్టిక్ సర్జరీకి తరలించారు. ఈ ఘటనలో విమానం నడిపిన పైలట్ కూడా మరణించారని వైమానిక దళం పేర్కొంది.