Bone-02 bone glue China : వైద్య రంగంలో విప్లవాత్మక మార్పు తీసుకొస్తున్న ఆవిష్కరణ చైనాలో జరిగింది. విరిగిన ఎముకలను అతికించడానికి సాంప్రదాయ చికిత్సల్లో గంటలకొద్దీ సమయం, పెద్ద కోతలు, మెటల్ ప్లేట్లు అవసరమవుతాయి. కానీ, చైనా పరిశోధకులు ‘బోన్-02’ (Bone-02) అనే బయో-అడ్హెసివ్ గ్లూను అభివృద్ధి చేశారు. ఇది కేవలం మూడు నిమిషాల్లోనే ఎముకలను బలంగా అతుక్కుని, రెండో శస్త్రచికిత్స అవసరం లేకుండా శరీరంలో కలిసిపోతుంది. సెప్టెంబర్ 10, 2025న ఈ గ్లూ విడుదల చేయబడింది. షెజాంగ్ ప్రావిన్స్‌లోని సర్ రన్ రన్ షా ఆసుపత్రి (జెజియాంగ్ యూనివర్సిటీకి అనుబంధం)లో డాక్టర్ లిన్ షాన్‌ఫెంగ్ (Lin Xianfeng) నేతృత్వంలో ఈ పరిశోధన జరిగింది. ఆల్చిప్పలు (oysters) నీటి అడుగున గట్టిగా అతుక్కునే స్వభావం ఈ ఆవిష్కరణకు ప్రేరణగా నిలిచింది. ఈ గ్లూ రక్తం ఎక్కువగా ఉన్న పరిస్థితుల్లో కూడా సమర్థవంతంగా పని చేస్తుంది. ల్యాబ్ పరీక్షల్లో 400 పౌండ్ల (సుమారు 181 కేజీలు) బాండింగ్ ఫోర్స్, 0.5 MPa కోత బలం, 10 MPa సంపీడన బలాన్ని చూపించింది. ఇది మెటల్ ఇంప్లాంట్లకు ప్రత్యామ్నాయంగా పని చేస్తుంది.
డాక్టర్ లిన్ షాన్‌ఫెంగ్, అసోసియేట్ చీఫ్ ఆర్థోపెడిక్ సర్జన్ మాట్లో: “2016లో రెసిడెంట్ వైద్యుడిగా పని చేస్తున్నప్పుడు, అనుభవజ్ఞులైన సర్జన్లు కూడా ఎముకలు అతికించడానికి గంటలు ఆపరేషన్ థియేటర్‌లో గడపాల్సి వస్తుందని గమనించాను. కానీ, ఫలితాలు తరచూ సంతృప్తికరంగా ఉండవు. దీంతో ఈ పరిశోధన మొదలుపెట్టాను. ఆల్చిప్పలు బ్రిడ్జ్‌లకు అతుక్కుని ఉండటం చూసి ఇది శరీరంలో తడి, రక్త పరిస్థితుల్లో కూడా పని చేసే గ్లూకు ఆలోచన కలిగించింది.” ఈ గ్లూ 2-3 సెం.మీ. కోతతో సూది ద్వారా ఇంజెక్ట్ చేయవచ్చు. ఎముక గాయం మానుకున్న తర్వాత శరీరంలో సహజంగా కలిసిపోతుంది, ఫారిన్ బాడీ రియాక్షన్లు, ఇన్ఫెక్షన్లు తగ్గుతాయి. సెప్టెంబర్ 9, 2025న వెంజౌ సిటీలో మొదటి క్లినికల్ ట్రయల్ పూర్తి చేశారు. 150 మంది పేషెంట్లపై ప్రయోగాలు విజయవంతమయ్యాయి. ఉదాహరణకు, ఒక వ్రిస్ట్ ఫ్రాక్చర్ కేసులో మూడు నిమిషాల్లో బాండ్ అయి, మూడు నెలల్లో పూర్తి రికవరీ జరిగింది.
ఈ ఆవిష్కరణ ప్రపంచవ్యాప్తంగా ఆసక్తి రేకెత్తిస్తోంది. గ్లోబల్ టైమ్స్, NDTV, ఎకనామిక్ టైమ్స్ వంటి మీడియా దీనిని విస్తృతంగా కవర్ చేశాయి. సంప్రదాయ శస్త్రచికిత్సల్లో ఎముకలు అతికించడానికి స్టీల్ ప్లేట్లు, స్క్రూలు వాడతారు, కానీ అవి రెండో సర్జరీ అవసరం చేస్తాయి. ‘బోన్-02’ ఇలాంటి సమస్యలను పరిష్కరిస్తుంది. ఇది కమిన్యూటెడ్ ఫ్రాక్చర్లు (చిన్న చిన్న ముక్కలుగా విరిగిన ఎముకలు)కు ముఖ్యంగా ఉపయోగకరం. పరిశోధకులు 2016 నుంచి 9 సంవత్సరాల పరిశ్రమతో ఈ గ్లూను అభివృద్ధి చేశారు. ఆల్చిప్పల అడ్హెసివ్ (ప్రోటీన్, కాల్షియం కార్బొనేట్) స్వభావాన్ని మోడల్‌గా తీసుకుని, బయోసేఫ్ మెటీరియల్స్‌తో తయారు చేశారు. ఇది భారతదేశంలో కూడా ఉపయోగకరమవుతుందని వైద్య నిపుణులు అభిప్రాయపడుతున్నారు. ఈ టెక్నాలజీ వైద్య రంగంలో మైలురాయిగా మారనుంది, రోగులకు తక్కువ ఇన్వాసివ్ చికిత్స అందిస్తుంది. మరిన్ని క్లినికల్ ట్రయల్స్ త్వరలో జరగనున్నాయి.
