టెస్లా సీఈఓ, ప్రపంచంలోని అత్యంత సంపన్న వ్యక్తుల్లో ఒకరైన ఎలాన్ మస్క్, తన సామాజిక మాధ్యమ వేదిక ‘ఎక్స్’ను తనే స్థాపించిన ఆర్టిఫిషియల్ ఇంటెలిజెన్స్ (AI) సంస్థ xAIకి విక్రయించినట్లు (మార్చి 29, 2025) సంచలన ప్రకటన చేశారు. ఈ లావాదేవీ పూర్తిగా స్టాక్ రూపంలో జరిగినట్లు మస్క్ వెల్లడించారు. xAI విలువను $80 బిలియన్లుగా, ఎక్స్ విలువను అప్పులతో కలిపి $45 బిలియన్లుగా అంచనా వేయడం జరిగింది. ఈ ఒప్పందం టెక్ పరిశ్రమలో ప్రధాన చర్చనీయాంశంగా మారింది.
మస్క్ వ్యూహాత్మక నిర్ణయం: 2022లో ట్విట్టర్‌ను $44 బిలియన్లకు కొనుగోలు చేసిన ఎలాన్ మస్క్, దానిని ‘ఎక్స్’గా మారు పేరుతో ప్రవేశపెట్టారు. అప్పటి నుండి అనేక సంస్కరణలు చేసి, ఉద్యోగులను తగ్గించడంతో పాటు, కంటెంట్ మోడరేషన్ విధానాలను మార్చారు. ఈ మార్పుల కారణంగా ప్రకటనదారులు వెనుకడగు వేయడం, వివాదాలు నెలకొనడం జరిగింది. అయినప్పటికీ, ‘ఎక్స్’ 2025 నాటికి కొంతవరకు తన మార్కెట్ విలువను తిరిగి పొందింది. ఇప్పుడు ఈ సంస్థను xAIకి విక్రయించడం ద్వారా మస్క్ తన భవిష్యత్ వ్యూహాన్ని AI దిశగా మార్చుకుంటున్నట్లు స్పష్టమవుతోంది.
xAIతో కొత్త ప్రయాణం: xAI సంస్థను 2023లో మస్క్ ప్రారంభించారు. ఈ సంస్థ OpenAI, Google DeepMindలకు పోటీగా అభివృద్ధి చెందుతోంది. ఇప్పటికే ‘గ్రాక్’ అనే AI ఆధారిత చాట్‌బాట్‌ను ‘ఎక్స్’లో ప్రవేశపెట్టిన xAI, మరిన్ని సాంకేతిక మార్పులను తీసుకురావడానికి సన్నాహాలు చేస్తోంది. ‘ఎక్స్’ను AI ఆధారిత సోషల్ మీడియా వేదికగా మారుస్తామని మస్క్ ఈ ఒప్పందంలో వెల్లడించారు.
మస్క్ ఏమన్నాడంటే: xAI మేధస్సును ‘ఎక్స్’ వినియోగదారులకు అందించి, మరింత తెలివైన, సమర్థవంతమైన అనుభవాలను కల్పించేందుకు ఇది ఒక కీలక ముందడుగు, అని మస్క్ తన ‘ఎక్స్’ ఖాతాలో పోస్ట్ చేశారు. లావాదేవీ తర్వాత ‘ఎక్స్’ సీఈఓ లిండా యాకరినో కూడా, ఈ ఒప్పందం ద్వారా తాము మరింత శక్తివంతమైన సేవలను వినియోగదారులకు అందించగలుగుతాం,” అని వ్యాఖ్యానించారు.
ఈ ఒప్పందంతో ‘ఎక్స్’లో తక్షణ మార్పులు ఉండకపోవచ్చని అంచనా ఉన్నప్పటికీ, AI ఆధారిత ఫీచర్లు వేగంగా రానున్నాయని విశ్లేషకులు చెబుతున్నారు. AI, సోషల్ మీడియా కలయిక ద్వారా మస్క్ తన వ్యాపార సామ్రాజ్యంలో సరికొత్త అధ్యాయాన్ని ప్రారంభించినట్లు ఈ ఒప్పందం చూపిస్తోంది. రాబోయే రోజుల్లో ఈ పరిణామాలు టెక్ పరిశ్రమపై ఎంత ప్రభావం చూపిస్తాయో చూడాలి.
