వచ్చే ఏడాదిలో మొత్తం నాలుగు గ్రహణాలు(Eclipses) సంభవించనున్నాయని ఖగోళ శాస్త్రవేత్తలు తెలిపారు.ఇందులో రెండు చంద్ర గహణాలు కాగా.. రెండు సూర్య గ్రహణాలు ఉన్నాయన్నారు. వీటిలో ఒకటి మాత్రమే భారత్‌లో కన్పించనున్నట్లు పేర్కొన్నారు.
2025 మార్చి 14న సంపూర్ణ చంద్ర గ్రహణం సంభవించనుందని.. అయితే అది పగటిపూట ఏర్పడడం వల్ల భారత్‌లో కనిపించే అవకాశం లేదన్నారు. అమెరికా, పశ్చిమ ఐరోపా, పశ్చిమ ఆఫ్రికా, ఉత్తర, దక్షిణ అట్లాంటిక్ మహాసముద్రాల వద్ద ఈ చంద్రగ్రహణం కనిపిస్తుందన్నారు. ఇక మార్చి 29న ఏర్పడనున్న పాక్షిక సూర్య గ్రహణం ప్రభావం కూడా భారత్‌లో ఉండబోదని చెప్పారు. ఉత్తర అమెరికా, యూరప్, వాయువ్య రష్యాలో ఈ గ్రహణం కనిపిస్తుందన్నారు. చివరి గ్రహణం సెప్టెంబర్ 21- 22 మధ్య సంభవిస్తుందన్నారు. ఇది కూడా భారత్‌లో కనిపించదన్నారు.
అయితే సెప్టెంబరు 7 లేదా 8న ఏర్పడే సంపూర్ణ చంద్రగ్రహణాన్ని భారత ప్రజలు వీక్షించే అవకాశం ఉందని తెలిపారు. ఈ చంద్ర గ్రహణం భారత్‌తో పాటు యూరప్, అంటార్కిటికా, పశ్చిమ పసిఫిక్ మహాసముద్రం, ఆస్ట్రేలియా, హిందూ మహాసముద్ర ప్రాంతాల్లో పూర్తిగా కనిపిస్తుందని ఆయన వెల్లడించారు.
