H1B Visa Fee Hike Trump: అమెరికా అధ్యక్షుడు డొనాల్డ్‌ ట్రంప్‌ హెచ్‌-1బీ వీసా ఫీజును ఏకంగా లక్ష డాలర్లకు పెంచడం.. విదేశీ కంపెనీలతోపాటు స్వదేశీ సంస్థలనూ గట్టిగానే ప్రభావితం చేయనుంది. ఇకపై నైపుణ్యం, ప్రతిభ కలిగిన విదేశీ ఉద్యోగులను పనిలో పెట్టుకోవాలంటే అమెరికాలోని సంస్థలు భారీ మొత్తాల్లో ఖర్చు చేయాల్సి వస్తుందని ఆర్థిక నిపుణులు చెబుతున్నారు. ఇతర దేశాల వర్కర్లను అమెరికాలోకి తెచ్చుకోవడానికి అక్కడి సంస్థలు ఏటా రూ.1.24 లక్షల కోట్ల(14 బిలియన్‌ డాలర్లు)ను హెచ్‌-1బీ వీసా దరఖాస్తు రుసుములుగా చెల్లించాల్సి ఉంటుందని భావిస్తున్నారు. 

అయితే అమెరికాలో ఉన్న దేశ, విదేశీ సంస్థలు స్థానికులనే ఉద్యోగాల్లోకి తీసుకోవాలనే ఈ నిర్ణయం తీసుకున్నట్లు ట్రంప్‌ సర్కారు సమర్థించుకుంటున్నా.. ఈ నిర్ణయంతో మాత్రం ఆర్థిక నిపుణులు ఏకీభవించడం లేదు. ఈ నిర్ణయం అమెరికా ఆర్థిక వ్యవస్థపై ప్రభావం చూపిస్తుందని హెచ్చరిస్తున్నారు. దానికి తగిన విధంగానే యూఎస్‌ కార్పొరేట్లు పెద్ద మొత్తాల్లో వర్క్‌ పర్మిట్ల కోసం వెచ్చించాల్సిన పరిస్థితి రాబోతుందంటూ  అంచనాలు వేస్తున్నారు.

Also Read: https://teluguprabha.net/international-news/80th-session-of-the-un-general-assembly-unga-80-starts-today/

అమెరికా సిటిజన్‌షిప్‌, ఇమ్మిగ్రేషన్‌ సర్వీసెస్‌ (యూఎస్‌సీఐఎస్‌) వివరాల ప్రకారం గత ఏడాది కొత్తగా 1,41,000కుపైగా హెచ్‌-1బీ వీసాలు జారీ చేశారు. ఈ క్రమంలోనే ఈ ఏడాది కూడా ఇదే స్థాయిలో వీసాల కోసం నూతన దరఖాస్తులు వస్తే.. పెంచిన ఫీజు ప్రకారం అమెరికన్‌ కంపెనీలు 14 బిలియన్‌ డాలర్లు చెల్లించాల్సి రావచ్చని నిపుణులు భావిస్తున్నారు. విదేశీ ఇంజినీర్లు, సైంటిస్టులు, కోడర్స్‌పై సిలికాన్‌ వ్యాలీ పెద్ద ఎత్తునే ఆధారపడుతోంది. అందుకే ఏటా వీరిని భారీగానే ఉద్యోగాల్లో అక్కడి కంపెనీలు నియామకాలు చేపడుతున్నాయి. ఈ క్రమంలో నాన్‌-ఇమ్మిగ్రెంట్‌ వీసాలనూ అకౌంటెన్సీ, హెల్త్‌కేర్‌ తదితర రంగాలకు చెందిన కంపెనీలు విరివిగా వాడేస్తున్నాయని యూఎస్‌సీఐఎస్‌ పేర్కొంది. 

అదే విధంగా గతేడాది ఆమోదం పొందిన దాదాపు 4 లక్షలకుపైగా హెచ్‌-1బీ దరఖాస్తుల్లో ఎక్కువమంది తమ వీసాలను రెన్యువల్‌ చేసుకుంటున్నవారేనని వెల్లడైంది. మరోవైపు హెచ్‌-1బీ వీసా ఫీజు పెంపు అంశంపై చాలా అమెరికన్‌ సంస్థలు న్యాయ పోరాటం చేయాలని చూస్తున్నట్టు వాటి తరఫు న్యాయవాదులు పేర్కొంటున్నారు. కోర్టుల్లో ట్రంప్‌ నిర్ణయాన్ని సవాల్‌ చేసే వీలుందంని చెబుతున్నారు. ఇప్పటికే టారిఫ్‌ల అంశం కోర్టుల మెట్లెక్కిన నేపథ్యంలో హెచ్‌1బీ అంశం అధిక ప్రాధాన్యత సంతరించుకుంది.

Also Read: https://teluguprabha.net/international-news/afghan-boy-13-lands-in-delhi-by-hiding-in-planes-landing-gear/

అయితే హెచ్‌-1బీ వీసా కోసం కొత్తగా దరఖాస్తు చేసుకుంటేనే లక్ష డాలర్ల ఫీజు కట్టాల్సి ఉంటుందని, కాబట్టి దేశీయ సంస్థలపై ప్రభావం తక్కువగానే ఉంటుందని భారతీయ ఐటీ పరిశ్రమల సంఘం నాస్కామ్‌ భావిస్తోంది. ఇప్పుడున్న వీసాదారులపై ఎలాంటి భారం పడబోదని చెబుతోంది. నిజానికి ఇప్పటికే అమెరికాలోని భారతీయ, వాటి అనుబంధ సంస్థలు హెచ్‌-1బీ వీసాలపై ఆధారపడటం తగ్గించేశాయని, స్థానికులనే ఉద్యోగాల్లోకి తీసుకుంటున్నాయని నాస్కామ్‌ వివరించింది.