Hong Kong Apartment Fire Kills 94: హాంకాంగ్ (Hong Kong) మహానగరంలో చరిత్రలో ఎన్నడూ లేని పెను విషాదం చోటుచేసుకుంది. తాయి పో జిల్లాలోని వాంగ్ ఫుక్ కోర్ట్ కాంప్లెక్స్‌లో సంభవించిన భారీ అగ్నిప్రమాదం (Massive Fire) వందలాది కుటుంబాల్లో తీరని శోకాన్ని మిగిల్చింది. గురువారం మధ్యాహ్నానికి మృతుల సంఖ్య 94కి చేరగా, శిథిలాల కింద ఇంకా ఎంతమంది చిక్కుకున్నారో తెలియని పరిస్థితి నెలకొంది. మంటలను అదుపు చేయడానికి, బాధితులను రక్షించడానికి అగ్నిమాపక సిబ్బంది (Firefighters) రెండవ రోజు కూడా అవిశ్రాంతంగా పోరాడుతున్నారు. 1948 తర్వాత హాంకాంగ్‌లో జరిగిన అత్యంత ఘోరమైన ప్రమాదం ఇదేనని అధికారులు చెబుతున్నారు.

ALSO READ: Thailand Floods: వరద గుప్పిట్లో థాయ్‌లాండ్.. 80 దాటిన మృతుల సంఖ్య

ఈ విషాదం బుధవారం మధ్యాహ్నం మొదలైంది. భవన పునరుద్ధరణ పనుల కోసం ఏర్పాటు చేసిన వెదురు స్కఫోల్డింగ్ (bamboo scaffolding), నిర్మాణ నెట్టింగ్ ద్వారా మంటలు అంటుకున్నాయి. బలమైన గాలులు తోడవడంతో చూస్తుండగానే ఆ మంటలు కాంప్లెక్స్‌లోని ఎనిమిది టవర్లలో ఏడింటిని చుట్టుముట్టాయి. “మంటలు అనూహ్యమైన వేగంతో వ్యాపించాయి. పై అంతస్తుల నుండి కాలిపోయిన శిథిలాలు, వెదురు బొంగులు కింద పడుతుండటంతో లోపలికి వెళ్లడం మాకు కష్టంగా మారింది,” అని ఫైర్ సర్వీసెస్ డిప్యూటీ డైరెక్టర్ డెరెక్ ఆమ్‌స్ట్రాంగ్ చాన్ తెలిపారు.

ప్రమాద తీవ్రత ఎంతలా ఉందంటే.. గురువారం ఉదయం డ్రోన్ కెమెరాల్లో రికార్డైన దృశ్యాలు గుండెలు పిండేలా ఉన్నాయి. నల్లగా మారిపోయిన ఆకాశహర్మ్యాలు, పగిలిన కిటికీల నుండి వస్తున్న దట్టమైన పొగ, లోపల టార్చ్ లైట్లు వేసుకుని మృతదేహాల కోసం వెతుకుతున్న రెస్క్యూ టీమ్స్ కనిపిస్తున్నాయి. అగ్నిమాపక సిబ్బంది 900 మందిని సురక్షిత ప్రాంతాలకు తరలించారు. కానీ, మరో 279 మంది ఆచూకీ ఇంకా తెలియలేదని హాంకాంగ్ లీడర్ జాన్ లీ ఆవేదన వ్యక్తం చేశారు.

ALSO READ: Feral Cats న్యూజిలాండ్‌ ‘ఫెరల్ క్యాట్స్’ పై యుద్ధం: 25 లక్షల ‘రాక్షస హంతకుల’ నిర్మూలనే లక్ష్యం!

ఈ ప్రమాదం వెనుక నిర్మాణ సంస్థ తీవ్ర నిర్లక్ష్యం ఉందని పోలీసులు భావిస్తున్నారు. భవనానికి వాడిన ప్లాస్టిక్ ఫోమ్ ప్యానెల్స్ (Plastic foam panels) మంటలు వేగంగా వ్యాపించడానికి కారణమయ్యాయి. ఈ ఘటనకు బాధ్యులైన నిర్మాణ సంస్థకు చెందిన ముగ్గురు డైరెక్టర్లను, ఒక ఇంజనీర్‌ను పోలీసులు అరెస్టు చేశారు. “నిర్లక్ష్యం వల్లే ఇన్ని ప్రాణాలు గాలిలో కలిశాయి,” అని సీనియర్ పోలీస్ సూపరింటెండెంట్ ఎలీన్ చుంగ్ ఆగ్రహం వ్యక్తం చేశారు.

బాధితుల రోదనలతో సహాయక శిబిరాలు దద్దరిల్లుతున్నాయి. లారెన్స్ లీ అనే వృద్ధుడు తన భార్య కోసం కన్నీటి పర్యంతమవుతున్నారు. “మంటలు రాగానే పారిపోమని ఆమెకు ఫోన్ చేశాను. ఆమె బయటకు వచ్చింది కానీ, కారిడార్ నిండా పొగ ఉండటంతో భయపడి మళ్ళీ లోపలికే వెళ్లిపోయింది,” అని ఆయన చెప్పిన మాటలు అక్కడి వారిని కంటతడి పెట్టించాయి. పోప్ లియో XIV కూడా ఈ ఘటనపై తీవ్ర విచారం వ్యక్తం చేస్తూ సందేశం పంపారు. భవిష్యత్తులో ఇలాంటి ప్రమాదాలు జరగకుండా వెదురు స్కఫోల్డింగ్ స్థానంలో మెటల్ స్కఫోల్డింగ్ వాడేలా నిబంధనలు మారుస్తామని ప్రభుత్వం ప్రకటించింది.

ALSO READ: Asim Munir: పాక్ రక్షణ దళాలపై అసిమ్ మునీర్ పూర్తి నియంత్రణ.. కొత్త CDF అధికారాలు ఏంటి?