Strait of Hormuz Closure: Global Economic Threat Looms : ఇజ్రాయెల్‌తో కొనసాగుతున్న యుద్ధం తీవ్రరూపం దాల్చడంతో, అమెరికా సైనిక దాడులకు ప్రతీకారంగా ఇరాన్ ఒక కీలక నిర్ణయం తీసుకుంది. ప్రపంచ చమురు సరఫరాకు హృదయంగా భావించే హర్మోజ్ జలసంధిని తాత్కాలికంగా మూసివేయాలని ఇరాన్ పార్లమెంట్ శనివారం కీలక తీర్మానాన్ని ఆమోదించింది. ఈ చర్య మధ్యప్రాచ్య ఉద్రిక్తతలను కొత్త స్థాయికి చేర్చి, ప్రపంచ ఆర్థిక వ్యవస్థపై గణనీయమైన ప్రభావాన్ని చూపనుంది.
పరిణామాల వెనుక కారణాలు: అమెరికా బాంబర్లు ఇరాన్‌లోని ఫోర్డో, నతాంజ్, ఇస్ఫాహాన్ వంటి కీలక అణు కేంద్రాలపై బలమైన దాడులు నిర్వహించిన నేపథ్యంలో ఇరాన్ ఈ ప్రతీకార చర్యకు దిగింది. మొదట ఇజ్రాయెల్‌పై క్షిపణులతో విరుచుకుపడిన ఇరాన్, ఇప్పుడు ఆర్థిక యుద్ధానికి తెరలేపుతూ హర్మోజ్ జలసంధిని మూసివేతకు ఆమోదం తెలిపింది.
హర్మోజ్ జలసంధి మూసివేత : హర్మోజ్ జలసంధి అనేది పర్షియన్ గల్ఫ్‌ను గల్ఫ్ ఆఫ్ ఒమన్, అరేబియన్ సముద్రంతో కలిపే వ్యూహాత్మక జలమార్గం. ప్రపంచ చమురు సరఫరాకు ఇది ఒక కీలక ధమని. ప్రపంచ చమురులో 20%: ప్రపంచవ్యాప్తంగా రోజువారీ చమురు సరఫరాలో దాదాపు 20% ఈ జలసంధి ద్వారానే రవాణా అవుతుంది. సౌదీ అరేబియా, కువైట్, ఖతార్, ఇరాక్ తో పాటుగా ఇరాన్ వంటి గల్ఫ్ దేశాల చమురు ఎగుమతులకు ఇది ప్రధాన మార్గం.
ఈ మార్గాన్ని మూసివేయడం ద్వారా ఇరాన్ కేవలం సైనిక ప్రతీకారం తీర్చుకోవడమే కాకుండా, ప్రపంచ చమురు మార్కెట్‌ను తీవ్రంగా ప్రభావితం చేయాలని చూస్తోంది. చమురు ధరలు అమాంతం పెరగడం, సరఫరా గొలుసులలో తీవ్ర అంతరాయాలు ఏర్పడటం వంటివి సంభవించవచ్చు.
వ్యూహాత్మక నిర్ణయం : ఇరాన్ హర్మోజ్ జలసంధిని మూసివేయాలన్న నిర్ణయం ఒక సాధారణ చర్య కాదు, ఇది ఒక వ్యూహాత్మక ఎత్తుగడగా నిపుణులు విశ్లేషిస్తున్నారు. ఇది అమెరికా, ఇజ్రాయెల్‌ల సైనిక దాడులకు ప్రతీకారంతో పాటుగా, ప్రపంచ చమురు సరఫరాను అడ్డుకోవడం ద్వారా ఈ దేశాలపై ఆర్థికంగా ఒత్తిడి పెంచి, వాటి ఆర్థిక వ్యవస్థలను దెబ్బతీయాలని ఇరాన్ లక్ష్యంగా పెట్టుకుంది.
అంతేకాకుండా, ఈ చర్య ద్వారా ప్రపంచ దేశాలకు ఒక స్పష్టమైన సందేశాన్ని పంపుతోంది. ఈ ప్రాంతంలో కొనసాగుతున్న ఉద్రిక్తతలు ప్రపంచ ఆర్థిక వ్యవస్థపై, ముఖ్యంగా ఇంధన ధరల పెరుగుదల ద్వారా ఎలా మానవతా సంక్షోభానికి దారి తీస్తాయో హెచ్చరిస్తోంది. తద్వారా, తమ చర్యలకు నైతిక మద్దతు కూడగట్టే ప్రయత్నం చేస్తోంది.
చమురు ధరల పెరుగుదల : ఈ పరిణామంతో ప్రపంచ మార్కెట్లలో క్రూడ్ ఆయిల్ ధరలు భారీగా పెరిగే అవకాశాలు స్పష్టంగా కనిపిస్తున్నాయి. హర్మోజ్ మూసివేత ప్రపంచ వ్యాప్తంగా చమురు సరఫరాలో తీవ్రమైన అంతరాయాన్ని సృష్టిస్తుంది. భౌగోళిక రాజకీయ ఉద్రిక్తతలు పెరిగినప్పుడు, మార్కెట్లలో అనిశ్చితి నెలకొని చమురు ధరలపై “వార్ ప్రీమియం” పెరుగుతుంది. జె.పి. మోర్గాన్ వంటి సంస్థలు హర్మోజ్ జలసంధి పూర్తిగా మూసివేయబడితే క్రూడ్ ఆయిల్ ధరలు బ్యారెల్‌కు $120 నుండి $130 డాలర్లకు చేరవచ్చని అంచనా వేస్తున్నాయి.
అంతర్జాతీయ ప్రభావం – ప్రపంచ ఆర్థిక వ్యవస్థకు ముప్పు: ఈ నిర్ణయం ఇజ్రాయెల్-ఇరాన్ ఘర్షణను ప్రపంచ ఆర్థిక వ్యవస్థకు పెను ప్రమాదంగా మారుస్తుంది. చమురు సరఫరాకు ఆటంకం ప్రపంచ వాణిజ్యాన్ని దెబ్బతీతీస్తుంది. అయితే అమెరికా ఈ చర్యని తీవ్రంగా పరిగణిస్తుందిమ ఇది సైనిక చర్యలకు లేదా ఆర్థిక ఆంక్షలకు దారి తీయవచ్చు. యూరప్‌లో ఇంధన ధరలు విపరీతంగా పెరిగి, ఆర్థిక మాంద్యానికి దారితీసే ప్రమాదం ఉంది. జీ7 దేశాలు ప్రపంచ ఆర్థిక స్థిరత్వాన్ని కాపాడటానికి సమన్వయ ప్రయత్నాలను చేపట్టే అవకాశం ఉంది.
ప్రధానంగా భారత్ వంటి చమురు దిగుమతులపై ఎక్కువగా ఆధారపడిన దేశాలకు ఇది తీవ్రమైన ఆర్థిక సవాలును సృష్టిస్తుంది. పెట్రోల్, డీజిల్ ధరలు పెరిగి, ద్రవ్యోల్బణానికి దారితీయవచ్చు. ఈ పరిణామాలు ప్రపంచ శాంతి, ఆర్థిక స్థిరత్వంపై తీవ్ర ప్రభావం చూపే అవకాశం ఉంది. అంతర్జాతీయ సమాజం ఈ సంక్షోభాన్ని పరిష్కరించడానికి దౌత్య మార్గాలను అన్వేషించాల్సిన ఆవశ్యకతను ఇది నొక్కి చెబుతుంది.