India-US F-35 fighter jet deal : అగ్రరాజ్యానికి భారత్ ఊహించని షాక్ ఇచ్చింది. అత్యాధునిక ఎఫ్-35 యుద్ధ విమానాల కొనుగోలు ఒప్పందంపై వెనక్కి తగ్గింది. అధ్యక్షుడు ట్రంప్ తెరలేపిన సుంకాల యుద్ధమే దీనికి కారణమా..? లేక ‘మేక్ ఇన్ ఇండియా’ మంత్రంతో స్వదేశీ పరిజ్ఞానం వైపు మొగ్గు చూపుతోందా..? ఇదే సమయంలో తెరపైకి వచ్చిన రష్యా బంపర్ ఆఫర్‌కు, ఈ నిర్ణయానికి ఏమైనా సంబంధం ఉందా..? ఈ కీలక పరిణామాల వెనుక అసలు కథేంటి? 

సుంకాల సెగ.. ఒప్పందాలకు బ్రేక్ : తన రక్షణ ఎగుమతులను పెంచుకోవాలని చూస్తున్న అమెరికాకు భారత్ గట్టి ఎదురుదెబ్బ ఇచ్చింది. ఇరు దేశాల మధ్య అత్యంత ప్రతిష్ఠాత్మకంగా భావించిన ఎఫ్-35 యుద్ధ విమానాల కొనుగోలు ఒప్పందంపై భారత్ ప్రస్తుతానికి ముందుకు వెళ్లడం లేదని ప్రముఖ వార్తా సంస్థ బ్లూమ్‌బర్గ్ ఓ కథనంలో వెల్లడించింది.

ట్రంప్ టారిఫ్‌ల ప్రభావం: అమెరికా అధ్యక్షుడు డొనాల్డ్ ట్రంప్, భారత్‌పై 25 శాతం వరకు “రివెంజ్ టారిఫ్‌లు” విధించడంతో ఇరు దేశాల మధ్య వాణిజ్య యుద్ధ వాతావరణం నెలకొంది. ఈ చర్యలతో తీవ్ర అసంతృప్తితో ఉన్న భారత్, ప్రతీకారంగా కొత్త రక్షణ ఒప్పందాలను నిలిపివేయాలని నిర్ణయించుకున్నట్లు తెలుస్తోంది. ఎఫ్-35 విమానాల కొనుగోలుపై తమకు ఆసక్తి లేదని భారత అధికారులు అమెరికాకు స్పష్టం చేసినట్లు బ్లూమ్‌బర్గ్ పేర్కొంది.

స్వదేశీ మంత్రం: కేవలం సుంకాల వివాదమే కాకుండా, రక్షణ రంగంలో స్వావలంబన సాధించాలన్న భారత ప్రభుత్వ సంకల్పం కూడా ఈ నిర్ణయానికి మరో ప్రధాన కారణం. విదేశాల నుంచి నేరుగా ఆయుధాలు కొనుగోలు చేయడం కన్నా, సాంకేతిక పరిజ్ఞాన బదిలీతో కూడిన ‘మేక్ ఇన్ ఇండియా’ ఒప్పందాలకే భారత్ పెద్దపీట వేస్తోంది. దేశీయంగా రక్షణ పరికరాలను రూపొందించి, తయారు చేసే ఒప్పందాలపైనే భారత్ దృష్టి సారించిందని రక్షణ శాఖ అధికారులు వెల్లడించారు.

భారత్‌కు రష్యా బంపర్ ఆఫర్ : అమెరికాతో బంధం బీటలు వారుతున్న ఇదే సమయంలో, భారత్ ప్రాధాన్యతలకు అనుగుణంగా రష్యా ఓ కీలక ప్రతిపాదనతో ముందుకొచ్చింది.
SU-57E టెక్నాలజీ బదిలీ: రష్యా తన ఐదవ తరం యుద్ధ విమానం SU-57Eకి సంబంధించిన పూర్తి సాంకేతిక పరిజ్ఞానాన్ని బదిలీ చేసేందుకు ముందుకొచ్చింది. దీనివల్ల ఈ అత్యాధునిక విమానాలను భారత్‌లోనే తయారు చేసుకోవచ్చు.

తక్షణ డెలివరీ: భారత వైమానిక దళ స్క్వాడ్రన్‌ల సంఖ్య పడిపోతున్న నేపథ్యంలో, వాటిని భర్తీ చేసేందుకు తక్షణమే SU-35M విమానాలను అందించేందుకు కూడా రష్యా ప్రతిపాదించింది. రాబోయే 3-4 ఏళ్లలో 20-30 వరకు SU-57E విమానాలను డెలివరీ చేసి, ఆ తర్వాత 2030 నాటికి 70-100 విమానాలను భారత్‌లోనే ఉత్పత్తి చేసుకునేలా ఈ ప్రతిపాదన ఉంది.

ఇప్పటికే నాసిక్‌లోని హిందుస్థాన్ ఏరోనాటిక్స్ లిమిటెడ్ (HAL) కేంద్రంలో 220కి పైగా సుఖోయ్ SU-30 MKI విమానాలను తయారు చేసిన అనుభవం భారత్‌కు ఉంది. తాజా డీల్‌కు అంగీకరిస్తే, రక్షణ రంగంలో స్వావలంబన దిశగా భారత్ మరో పెద్ద అడుగు వేసినట్లే అవుతుంది.