Iran Executions: ఇరాన్‌లో మరణశిక్షల సంఖ్య ఆందోళనకరంగా పెరిగిపోతోంది. 2025 జనవరి నుంచి ఆగస్టు 28 వరకు కేవలం 8 నెలల్లోనే కనీసం 841 మందిని ఉరితీశారని ఐక్యరాజ్యసమితి (ఐరాస) మానవ హక్కుల విభాగం (OHCHR) ఆగస్టు 29న విడుదల చేసిన నివేదికలో వెల్లడైంది. ఇది గత ఏడాది (2024)లో 850కి పైగా మరణశిక్షలతో పోలిస్తే మరింత పెరిగినట్లు తెలుస్తోంది. జులై నెలలోనే 110 మందిని ఉరితీశారు, ఇది గతేడాది జులైలోని సంఖ్యకు రెట్టింపు.
ALSO READ: Chandrababu :పద్దతి మార్చుకోండి..ఆ ఎమ్మెల్యేలకు చంద్రబాబు మాస్ వార్నింగ్
అసమ్మతి గళాలను అణచివేయడానికి ప్రభుత్వం మరణశిక్షలను ఆయుధంగా వాడుతోందని ఐరాస ఆరోపిస్తోంది. మృతుల్లో మహిళలు, ఆఫ్గన్ పౌరులు, బలోచ్, కుర్దులు, అరబ్బుల వంటి మైనారిటీలు అధికంగా ఉన్నారు. పారదర్శకత లేకపోవడంతో వాస్తవ సంఖ్య ఇంకా ఎక్కువ ఉండవచ్చని ఐరాస ప్రతినిధి రవీనా షమ్దాసాని అన్నారు. ఈ ఏడాది 7 బహిరంగ ఉరిశిక్షలు జరిగాయి, ఇవి ప్రజలు, ముఖ్యంగా చిన్నారులలో మానసిక క్షోభను కలిగిస్తున్నాయి.
ప్రస్తుతం మరో 11 మంది మరణశిక్ష ప్రమాదంలో ఉన్నారు. వీరిలో 6 మందిపై ‘పీపుల్స్ ముజాహిదీన్ ఆర్గనైజేషన్ ఆఫ్ ఇరాన్’ (MEK)తో సంబంధాలున్నాయని ఆరోపణలు, మిగిలిన 5 మంది 2022 నిరసనల్లో పాల్గొన్నవారు. కార్మిక హక్కుల కార్యకర్త షరీఫే మహమ్మది ఆగస్టు 16న సుప్రీంకోర్టు శిక్షను ఖరారు చేసింది.
ఐరాస మానవ హక్కుల హైకమిషనర్ వోల్కర్ టర్క్, ఇరాన్ తక్షణమే మరణశిక్షలపై తాత్కాలిక నిషేధం (మారిటోరియం) విధించాలని డిమాండ్ చేశారు. “మరణశిక్ష జీవ హక్కును హరిస్తుంది, అమాయకులను చంపే ప్రమాదం ఉంది” అని షమ్దాసాని అన్నారు. అమ్నెస్టీ ఇంటర్నేషనల్, హ్యూమన్ రైట్స్ వాచ్ వంటి సంస్థలు కూడా ఈ శిక్షలను ఖండిస్తున్నాయి. గతంలో రహస్య ఉరితీతలు, టార్చర్ కేసులు కూడా నమోదయ్యాయి. ఇరాన్ ప్రభుత్వం ఈ నివేదికలను తిరస్కరిస్తూ, ఐరాసను రాజకీయంగా ప్రేరేపితమని ఆరోపిస్తోంది. ప్రపంచవ్యాప్తంగా ఈ విషయం ఆందోళన కలిగిస్తోంది.
