Israeli strike on Gaza Holy Family Church : గాజాలో మానవ విలువలు మరోసారి కాలరాశారు. యుద్ధ బీభత్సం మధ్య ప్రాణాలు నిలుపుకోవడానికి ప్రజలు ఆశ్రయం పొందే ప్రార్థనా మందిరాలకు కూడా రక్షణ కరువైంది. గాజా నగరంలోని ‘హోలీ ఫ్యామిలీ చర్చి’పై గురువారం ఇజ్రాయెల్ సైన్యం జరిపిన దాడిలో ముగ్గురు అమాయకులు ప్రాణాలు కోల్పోగా, దాదాపు పది మంది తీవ్రంగా గాయపడ్డారు. ఈ ఘటన ప్రపంచవ్యాప్తంగా తీవ్ర దిగ్భ్రాంతిని కలిగించింది. అయితే, ఈ దాడి తమ పొరపాటేనని ఇజ్రాయెల్ అంగీకరించడం వెనుక అమెరికా అధ్యక్షుడు డొనాల్డ్ ట్రంప్ నుంచి వచ్చిన తీవ్ర ఒత్తిడే కీలక పాత్ర పోషించిందని తెలుస్తోంది. అసలు తెర వెనుక ఏం జరిగిందంటే..

అమెరికా ఆగ్రహం, నెతన్యాహు అంగీకారం: ఈ దాడి వార్త తెలియగానే అమెరికా అధ్యక్షుడు డొనాల్డ్ ట్రంప్ తీవ్ర ఆగ్రహం వ్యక్తం చేశారు. ఆయన తక్షణమే ఇజ్రాయెల్ ప్రధానమంత్రి బెంజిమన్ నెతన్యాహుకు ఫోన్ చేసి తన అసంతృప్తిని బలంగా వినిపించినట్లు వైట్ హౌజ్ ప్రెస్ సెక్రటరీ కరోలిన్ లెవిట్ ధృవీకరించారు. శుక్రవారం నాటి మీడియా సమావేశంలో ఆమె మాట్లాడుతూ, “చర్చిపై దాడి విషయం తెలిసిన తర్వాత ట్రంప్ స్పందన సానుకూలంగా లేదు. ఆయన నేరుగా ప్రధాని నెతన్యాహుకు ఫోన్ చేసి మాట్లాడారు. ఆ తర్వాతే ఇజ్రాయెల్ ఒక ప్రకటన విడుదల చేయడానికి అంగీకరించింది” అని తెలిపారు. ఆ క్యాథలిక్ చర్చిపై దాడి చేయడం ఇజ్రాయెల్ చేసిన పొరపాటు అని నెతన్యాహు స్వయంగా ట్రంప్‌కు వివరించారని లెవిట్ పేర్కొన్నారు.

ఇజ్రాయెల్ విచారం, సైన్యం వివరణ : అంతర్జాతీయంగా, ముఖ్యంగా అమెరికా నుంచి ఒత్తిడి తీవ్రతరం కావడంతో, గాజాలోని హోలీ ఫ్యామిలీ చర్చిపై జరిగిన దాడిపై ఇజ్రాయెల్ ప్రధానమంత్రి కార్యాలయం తీవ్ర విచారం వ్యక్తం చేస్తూ అధికారిక ప్రకటన విడుదల చేసింది.

ఇజ్రాయెల్ ప్రకటన ముఖ్యాంశాలు: ప్రకటనలో ఇలా పేర్కొన్నారు: “గాజాలోని హోలీ ఫ్యామిలీ చర్చిపై గురితప్పిన తూటా తగలడం పట్ల మేము తీవ్ర విచారం వ్యక్తం చేస్తున్నాము. ప్రాణాలు కోల్పోయిన వారి కుటుంబాలకు మా ప్రగాఢ సానుభూతి తెలియజేస్తున్నాము. ఈ దురదృష్టకర ఘటనపై మేము దర్యాప్తు జరుపుతున్నాము. పవిత్ర స్థలాలను, పౌరులను రక్షించడానికి ఇజ్రాయెల్ కట్టుబడి ఉందని స్పష్టం చేస్తున్నాము.”

ఇజ్రాయెల్ సైన్యం (IDF) వివరణ: ఇజ్రాయెల్ సైన్యం (IDF) కూడా ఈ ఘటనపై స్పందించింది. ప్రాథమిక విచారణలో ఐడీఎఫ్ వెల్లడించిన దాని ప్రకారం, వారి సైనిక కార్యకలాపాల సమయంలో అనుకోకుండా గురితప్పిన షెల్ శకలాలు చర్చిని తాకి ఉండవచ్చు.తాము కేవలం సైనిక స్థావరాలనే లక్ష్యంగా చేసుకుంటామని, పౌరులకు హాని తలపెట్టడం తమ ఉద్దేశ్యం కాదని IDF పునరుద్ఘాటించింది.

 ఆహార పంపిణీ కేంద్రం వద్ద జరిగిన తొక్కిసలాట: చర్చిపై దాడి ఘటనకు ముందు, దక్షిణ గాజాలోని ఖాన్ యూనిస్‌లో ఒక ఆహార పంపిణీ కేంద్రం వద్ద జరిగిన తొక్కిసలాటలో సుమారు 19 మందికి పైగా మరణించడం అక్కడి దయనీయ పరిస్థితులకు అద్దం పడుతోంది. సహాయం కోసం ఎదురుచూస్తున్న నిస్సహాయుల ప్రాణాలు గాలిలో కలిసిపోవడంపై తీవ్ర ఆందోళన వ్యక్తమవుతోంది. ఈ ఘటనకు గల కారణాలపై భిన్న వాదనలు వినిపిస్తున్నాయి.