Jeff Bezos’s Mother Jackie Bezos Dies At 78: ప్రపంచ కుబేరులలో ఒకరైన అమెజాన్ వ్యవస్థాపకుడు జెఫ్ బెజోస్ తల్లి జాకీ బెజోస్ 78 ఏళ్ల వయసులో కన్నుమూశారు. ఆమె మయామిలోని తన నివాసంలో తుది శ్వాస విడిచారు. జాకీ బెజోస్ చాలా కాలంగా ‘లెవీ బాడీ డిమెన్షియా’తో బాధపడుతున్నారని, ఆమె మరణ సమయంలో కుటుంబ సభ్యులందరూ ఆమెతో ఉన్నారని జెఫ్ బెజోస్ సోషల్ మీడియాలో పోస్ట్ చేశారు.

అమెజాన్‌లో తొలి పెట్టుబడి..

జాకీ, ఆమె భర్త మిగ్యుల్‌ బెజోస్‌లు అమెజాన్‌లో తొలి పెట్టుబడిదారులలో ఒకరు. 1995లో వారు $245,573 డాలర్లను అమెజాన్‌కు పెట్టుబడిగా అందించారు. ఆ సమయంలో అమెజాన్ విజయం సాధించకపోవచ్చని జెఫ్ బెజోస్ హెచ్చరించినప్పటికీ, వారు తమ కుమారుడిపై నమ్మకంతో పెట్టుబడి పెట్టారు. వారి పెట్టుబడితో పాటు తర్వాత కొనుగోలు చేసిన అమెజాన్ షేర్ల విలువ 2018 నాటికి దాదాపు $30 బిలియన్లకు చేరుకుంది.

చిన్నపిల్లల విద్యకు కృషి..

జెఫ్ బెజోస్ తన సంపదను పంపిణీ చేయడం ప్రారంభించక ముందే, జాకీ, ఆమె భర్త 2000 సంవత్సరం నుండి ‘బెజోస్ ఫ్యామిలీ ఫౌండేషన్’ ద్వారా విద్యా కార్యక్రమాలకు నిధులు సమకూర్చడం ప్రారంభించారు. విద్య, ముఖ్యంగా చిన్నపిల్లల విద్యకు జాకీ ఎంతగానో కృషి చేశారు.

వారి ఫౌండేషన్ రెండు ప్రధాన కార్యక్రమాలను నడుపుతోంది: ‘వూమ్’ అనే యాప్ ద్వారా తల్లిదండ్రులకు సలహాలు ఇవ్వడం, మరియు ‘బెజోస్ స్కాలర్స్ ప్రోగ్రామ్’ ద్వారా యువ నాయకులకు శిక్షణ ఇవ్వడం. ఆమె కృషికి గుర్తుగా బెజోస్ ఫ్యామిలీ ఫౌండేషన్ యువతపై దృష్టి సారించి వందలాది సంస్థలకు మద్దతు ఇచ్చింది.

జాకీ బెజోస్ జెఫ్ బెజోస్‌కి ఒక ప్రధాన శక్తిగా నిలిచారని, అతని ప్రతిభను గుర్తించి ప్రోత్సహించారని రచయిత మార్క్ లీబోవిచ్ తన పుస్తకం ‘ది న్యూ ఇంపీరియలిస్ట్స్’లో పేర్కొన్నారు.