Supreme Court backs Trump’s orders: అమెరికా అధ్యక్షుడు డొనాల్డ్ ట్రంప్‌కు సుప్రీంకోర్టులో భారీ విజయం లభించింది. ఆయన జారీ చేసిన కీలకమైన ఎగ్జిక్యూటివ్ ఆదేశాలపై దిగువ కోర్టులు విధించిన జాతీయ స్థాయి ఇంజంక్షన్లను సర్వోన్నత న్యాయస్థానం నిలిపివేసింది.
జన్మతః పౌరసత్వం వివాదం – అసలేం జరిగింది?
ట్రంప్ తన రెండో అధ్యక్ష పదవీ చేపట్టిన వెంటనే సంచలనాత్మకమైన ఎగ్జిక్యూటివ్ ఆదేశాన్ని జారీ చేశారు. ఈ ఆదేశం ప్రధానంగా జన్మతః పౌరసత్వాన్ని (Birthright Citizenship) రద్దు చేయాలనే ఉద్దేశంతో కూడుకున్నది. దీని ప్రకారం, అక్రమంగా లేదా తాత్కాలికంగా అమెరికాలో నివసిస్తున్న వలసదారుల పిల్లలు అమెరికా గడ్డపై జన్మించినప్పటికీ వారికి పౌరసత్వం ఇవ్వకూడదని ట్రంప్ ఆదేశం పేర్కొంది.
14వ రాజ్యాంగ సవరణ ప్రకారం : అయితే, 1868లో ఆమోదించబడిన 14వ రాజ్యాంగ సవరణ ప్రకారం, అమెరికా భూభాగంలో జన్మించిన ప్రతి ఒక్కరికీ పౌరసత్వం లభిస్తుంది. ట్రంప్ జారీ చేసిన ఎగ్జిక్యూటివ్ ఆదేశం ఈ రాజ్యాంగ సవరణకు విరుద్ధమని వాదిస్తూ, మేరీల్యాండ్, మసాచుసెట్స్, వాషింగ్టన్‌లోని దిగువ కోర్టులు జాతీయ స్థాయిలో ఇంజంక్షన్లను జారీ చేశాయి. దీంతో అధ్యక్షుడు డోనాల్డ్ ట్రంప్ జారీ చేసిన ఆదేశాల అమలు తాత్కాలికంగా నిలిచిపోయింది.
సుప్రీంకోర్టు తీర్పు – కీలక పరిణామాలు : జూన్ 27, 2025న, అమెరికా సుప్రీంకోర్టు ఈ వివాదంపై కీలక తీర్పును వెలువరించింది. దిగువ కోర్టులు జాతీయ ఇంజంక్షన్లను జారీ చేసే అధికారాన్ని పరిమితం చేస్తూ 6-3 మెజారిటీతో సర్వోన్నత న్యాయస్థానం తీర్పునిచ్చింది. ఈ తీర్పుతో ట్రంప్ జారీ చేసిన జన్మతః పౌరసత్వ ఆదేశం అమలులోకి రానుంది. అయితే, ఈ ఆదేశం రాజ్యాంగబద్ధతపై పూర్తిస్థాయి తీర్పు అక్టోబర్ 2025లో వెలువడనుంది.
ట్రంప్ హర్షం – విమర్శకుల ఆందోళన : సుప్రీంకోర్టు ఇచ్చిన తీర్పు పట్ల అధ్యక్షుడు డోనాల్డ్ ట్రంప్ తీవ్ర హర్షం వ్యక్తం చేశారు. ఇది తమ పాలనా విధానాలకు లభించిన గొప్ప విజయంగా ఆయన అభివర్ణించారు. అయితే, ఈ తీర్పుపై విమర్శకులు వలసవాదులు తీవ్ర ఆందోళన వ్యక్తం చేస్తున్నారు. సుప్రీంకోర్టు తాజా ఆదేశాలతో ఏటా సుమారు 1.5 లక్షల మంది వలసదారుల పిల్లలు ప్రభావితమవుతారని, ఇది వారి భవిష్యత్తుపై తీవ్ర ప్రభావం చూపుతుందని వారు హెచ్చరించారు. ఈ నిర్ణయం అమెరికా సమాజంపై దీర్ఘకాలిక పరిణామాలు చూపుతుందని విశ్లేషకులు ఆందోళన చెందుతున్నారు.