Malala Marijuana Trauma Revelation : పాకిస్తాన్‌కు చెందిన నోబెల్ శాంతి బహుమతి గ్రహీత, విద్యా హక్కుల కార్యకర్త మలాలా యూసఫ్‌జాయ్ తన జీవితంలో జరిగిన ఒక సంచలనమైన అనుభవాన్ని బయటపెట్టారు. ఆక్స్‌ఫర్డ్ యూనివర్సిటీలో చదువుతున్న రోజుల్లో స్నేహితులతో కలిసి గంజాయి (మారిజువానా) తాగినప్పుడు, 13 ఏళ్ల క్రితం తాలిబన్ ఉగ్రవాదులు తనపై చేసిన భయంకర దాడి జ్ఞాపకాలు మళ్లీ కళ్లముందు మెదిలాయని ఆమె వెల్లడించారు. ఈ అనుభవం తనను తీవ్ర మానసిక క్షోభకు గురిచేసిందని, పానిక్ అటాక్స్, నిద్రలేమి వంటి సమస్యలు మొదలయ్యాయని ‘ది గార్డియన్’ పత్రికకు ఇచ్చిన ఇంటర్వ్యూలో చెప్పారు. తన తదుపరి పుస్తకం ‘ఫైండింగ్ మై వే’లో ఈ విషయాలను వివరిస్తానని తెలిపారు.
మలాలా వివరాల ప్రకారం, ఆక్స్‌ఫర్డ్‌లో స్నేహితులతో కలిసి ‘బాంగ్’ (గంజాయి తాగడానికి ఉపయోగించే వాటర్ పైప్) ద్వారా మారిజువానా తీసుకున్నానని.. ఆ తర్వాత పరిస్థితి పూర్తిగా మారిపోయిందని తెలిపింది. “ఆ రాత్రి తర్వాత అన్నీ మారిపోయాయి. నాపై జరిగిన దాడిని మళ్లీ ఎదుర్కొంటున్నట్టు అనిపించింది” అని ఆమె పేర్కొన్నారు. స్పృహ కోల్పోయి, భయంతో వణికిపోయానని, స్నేహితుడు తనను గదికి మోసుకెళ్లాల్సి వచ్చిందని గుర్తుచేశారు. కోమాలో ఉన్నప్పుడు కనిపించిన దృశ్యాలు – బస్సు, తుపాకీ పట్టుకున్న వ్యక్తి, రక్తం – మొదటిసారి చూస్తున్నట్టే మళ్లీ కళ్ల ముందు మెదిలాయని చెప్పారు. “నా శరీరం భయంతో వణికిపోయింది. నా మనసులో వచ్చిన ఆలోచనల నుంచి తప్పించుకోలేకపోయాను” అని ఆనాటి భయానక క్షణాలను పంచుకున్నారు.
2012లో, 15 ఏళ్ల మలాలా స్వాత్ వ్యాలీలో పాఠశాల బస్సులో ప్రయాణిస్తుండగా తాలిబన్ ఉగ్రవాదులు తలపై కాల్పులు జరిపారు. బాలికల విద్యకు వ్యతిరేకంగా పోరాడినందుకు ఈ దాడి జరిగింది. తీవ్రంగా గాయపడి, బ్రిటన్‌లో చికిత్స పొంది ప్రాణాలతో బయటపడ్డారు. 2014లో నోబెల్ బహుమతి గెలిచారు. ఈ దాడి ట్రామా (PTSD) వల్ల మలాలా మానసిక సమస్యలు ఎదుర్కొన్నారు. థెరపిస్ట్ సహాయంతో క్రమంగా కోలుకున్నారు. “చిన్నతనం, దాడి, చదువుల ఒత్తిడి – అన్నీ కలిసి మానసిక గాయాలు పెంచాయి” అని చెప్పారు.
ప్రస్తుతం 28 ఏళ్ల మలాలా, భర్త అస్సెర్ మాలిక్‌తో మహిళల విద్య, క్రీడల ప్రోత్సాహం కోసం పనిచేస్తున్నారు. ఈ వెల్లడి మహిళల మానసిక ఆరోగ్యం, ట్రామా పరిహారంపై చర్చలకు దారితీసింది. మలాలా “మాట్లాడటమే భారాన్ని తగ్గిస్తుంది” అని ప్రతీ ఒక్కరినీ ప్రేరేపిస్తున్నారు.
