Indian Exports : ప్రపంచ వాణిజ్య వేదికపై సరికొత్త సంక్షోభం తలెత్తింది. రష్యా నుంచి భారత్ భారీగా ముడి చమురు దిగుమతి చేసుకుంటున్న నేపథ్యంలో అగ్రరాజ్యం అమెరికా (USA) భారత్పై పరోక్షంగా వాణిజ్య ప్రతీకారం తీర్చుకునేందుకు ప్రయత్నిస్తోందనే విశ్లేషణలు వినిపిస్తున్నాయి. ఈ పరిణామాల మధ్యలో, ఉత్తర అమెరికా వాణిజ్య భాగస్వామి అయిన మెక్సికో స్వేచ్ఛా వాణిజ్య ఒప్పందం (FTA) లేని దేశాలపై భారీగా దిగుమతి సుంకాలు విధించే కీలక నిర్ణయం తీసుకుంది.
మెక్సికో అధ్యక్షురాలు క్లాడియా షీన్బామ్ పార్డో సెప్టెంబర్లో ప్రతిపాదించిన టారిఫ్ బిల్లుకు, మెక్సికో సెనేట్ డిసెంబర్ 10న ఆమోదం తెలపడం ప్రపంచ వాణిజ్య వర్గాలలో ప్రకంపనలు సృష్టిస్తోంది. ఈ నిర్ణయం ద్వారా, 2026 జనవరి 1వ తేదీ నుంచి సుమారు 1,400కు పైగా వస్తువులపై 5 శాతం నుండి ఏకంగా 50 శాతం వరకు సుంకాలు పెరగనున్నాయి. మెజారిటీ వస్తువులపై 35 శాతం సుంకం పడే అవకాశం ఉంది.
భారతదేశానికి మెక్సికోతో స్వేచ్ఛా వాణిజ్య ఒప్పందం (FTA) లేదు. ఈ కొత్త నిబంధన ప్రధానంగా FTA లేని దేశాల దిగుమతులను లక్ష్యంగా చేసుకుని రూపొందించబడింది. రష్యా చమురు కొనుగోళ్ల విషయంలో అమెరికా నుంచి భారత్పై ఒత్తిడి పెరుగుతున్న తరుణంలో, అమెరికాకు అత్యంత కీలకమైన వాణిజ్య భాగస్వామి అయిన మెక్సికో ఈ నిర్ణయం తీసుకోవడం కేవలం ఒక ఆర్థిక నిర్ణయంగా చూడలేమని వాణిజ్య నిపుణులు అభిప్రాయపడుతున్నారు.
అమెరికా, కెనడా వంటి దేశాలకు ఈ టారీఫ్ల నుంచి మినహాయింపునివ్వడం గమనార్హం. అంటే, మెక్సికో మార్కెట్లో ఇప్పుడు అమెరికా, కెనడా వస్తువులు చౌకగా లభిస్తాయి, అదే సమయంలో FTA లేని భారత్, చైనా, దక్షిణ కొరియా, థాయిలాండ్, ఇండోనేషియా వంటి ఆసియా దిగ్గజ దేశాల వస్తువులు ఖరీదైనవిగా మారతాయి. ఇది స్పష్టంగా అమెరికా-కేంద్రీకృత వాణిజ్య వ్యవస్థకు బలం చేకూరుస్తుంది.
Hero MotoCorp: పిల్లల కోసం హీరో ఎలక్ట్రిక్ బైక్ లాంచ్.. ఫీచర్లు, ధర వివరాలివే..!
ఏ రంగాలపై ప్రభావం?
మెక్సికో ప్రభుత్వం తీసుకున్న ఈ నిర్ణయం భారతదేశ ఎగుమతులపై తీవ్ర ప్రభావం చూపనుంది. ముఖ్యంగా ఈ క్రింది కీలక రంగాలపై సుంకాల భారం మోపనుంది.
ఆటోమొబైల్స్ & ఆటో పార్ట్స్: భారతీయ తయారీదారులు మెక్సికో మార్కెట్లో పోటీని ఎదుర్కోవాల్సి వస్తుంది.
టెక్స్టైల్స్ & దుస్తులు: వస్త్ర పరిశ్రమ ఎగుమతులు భారీగా దెబ్బతినే అవకాశం ఉంది.
స్టీల్, అల్యూమినియం & ప్లాస్టిక్స్: ముడి పదార్థాల ఎగుమతులపై టారీఫ్లు పెరగడం ఉత్పత్తి వ్యయాన్ని పెంచుతుంది.
ఫుట్వేర్, ఫర్నిచర్, టాయ్స్ & ఎలక్ట్రానిక్స్: ఈ వస్తువుల ధరలు పెరగడం వల్ల భారతీయ ఉత్పత్తులకు డిమాండ్ తగ్గే అవకాశం ఉంది.
ఈ టారీఫ్ల పెంపుతో భారతీయ ఎగుమతిదారులు తమ వ్యూహాలను మార్చుకోవాల్సిన పరిస్థితి ఏర్పడింది. ఒకవైపు రష్యా చమురు కొనుగోళ్లతో చౌక ఇంధనాన్ని పొందుతున్న భారత్, మరోవైపు పశ్చిమ దేశాల వాణిజ్య ఒత్తిడిని ఎలా ఎదుర్కొంటుంది అనేది ప్రస్తుతం గ్లోబల్ ఎకానమీకి సంబంధించిన అతిపెద్ద ప్రశ్న. భారత ప్రభుత్వం మెక్సికోతో అత్యవసరంగా వాణిజ్య చర్చలు జరుపుతుందా, లేక కొత్త ఎగుమతి మార్కెట్లను అన్వేషిస్తుందా అనేది చూడాలి.