Nara Lokesh LEAP Education : ఆస్ట్రేలియా 6 రోజుల పర్యటనలో భాగంగా మెల్బోర్న్‌లో ఆస్ట్రేడ్ నిర్వహించిన ఇంటర్నేషనల్ ఎడ్యుకేషన్ రౌండ్ టేబుల్ సమావేశంలో ఏపీ IT, విద్యా మంత్రి నారా లోకేశ్ ముఖ్య అతిథిగా పాల్గొన్నారు. 2029 నాటికి ఆంధ్రప్రదేశ్‌లో ప్రపంచస్థాయి విద్యా వ్యవస్థను ఏర్పాటు చేయడమే లక్ష్యంగా విప్లవాత్మక సంస్కరణలు చేపడుతున్నామని ఆయన స్పష్టం చేశారు. స్టడీ మెల్బోర్న్, విక్టోరియన్ ఎడ్యుకేషన్, స్కిల్ ఇనిస్టిట్యూషన్స్ ప్రతినిధులు పాల్గొన్న ఈ సమావేశంలో లోకేశ్ విద్యార్థుల అభ్యసన ఫలితాల మెరుగుపరచడంపై దృష్టి సారించారు.

ALSO READ: Ram Charan: ఉపాసనకి కవల పిల్లలు! అల్లు గొడవలు చల్లారలేదా?

ఈ ఏడాది నుంచి అమలులోకి వచ్చిన ‘లెర్నింగ్ ఎక్సలెన్స్ ఇన్ ఆంధ్రప్రదేశ్’ (LEAP) కార్యక్రమం ద్వారా విద్యార్థుల్లో మెరుగైన ఫలితాలు సాధించడమే లక్ష్యమని లోకేశ్ తెలిపారు. “సంప్రదాయ పద్ధతులకు స్వస్తి పలికి, ఆట ఆధారిత పాఠ్యాంశాలు, ఏఐ (AI) ఆధారిత శిక్షణ, ఫౌండేషన్ లిటరసీ అండ్ న్యూమరసీ వంటి వినూత్న కార్యక్రమాలతో విద్యార్థులను సమగ్రాభివృద్ధి చేస్తున్నాం” అని చెప్పారు. జాతీయ విద్యా విధానం (NEP 2020) లక్ష్యాలకు అనుగుణంగా పాఠ్యాంశాలు సవరించి, అన్ని స్థాయుల్లో నైతిక విలువలకు ప్రాధాన్యత ఇస్తున్నామని వివరించారు. 21వ శతాబ్దపు నైపుణ్యాలకు అనుగుణంగా టెక్నికల్, లీడర్‌షిప్, నిజ జీవిత నైపుణ్యాలు అందించడంపై దృష్టి పెట్టాలని సూచించారు.

విక్టోరియా రాష్ట్రం అంతర్జాతీయ విద్యార్థులకు ప్రధాన గమ్యస్థానమని స్టడీ మెల్బోర్న్ ప్రతినిధులు తెలిపారు. ప్రతి ఏటా 170 దేశాల నుంచి 1.75 లక్షల మంది విద్యార్థులు ఇక్కడికి వస్తున్నారని, వీరిలో భారత్, చైనా, వియత్నాం, నేపాల్ నుంచి అధికులు ఉన్నారని చెప్పారు. ఈ విద్యార్థుల ద్వారా రాష్ట్ర ఆర్థిక వ్యవస్థకు ఏటా 12.6 బిలియన్ ఆస్ట్రేలియన్ డాలర్లు (సుమారు 68 వేల కోట్ల రూపాయలు) ఆదాయం వస్తోందని వివరించారు. మెల్బోర్న్ ప్రపంచంలోనే అత్యంత నివాసయోగ్యమైన నగరంగా ప్రథమ స్థానంలో ఉందని, చదువు తర్వాత ఉద్యోగాలు, స్కాలర్‌షిప్‌లు అందిస్తున్నామని తెలిపారు.

లోకేశ్ ఆస్ట్రేలియా పర్యటన (అక్టోబర్ 19-24)లో మెల్బోర్న్ యూనివర్సిటీ, మోనాష్ యూనివర్సిటీ, స్విన్‌బర్న్ యూనివర్సిటీ ఆఫ్ టెక్నాలజీ, RMIT యూనివర్సిటీ ప్రతినిధులతో సమావేశమయ్యారు. ఈ పర్యటన ద్వారా విద్యా, IT రంగాల్లో సహకారాలు పెంచుకుంటామని, CII పార్ట్‌నర్‌షిప్ సమ్మిట్ 2025ను ప్రమోట్ చేస్తామని చెప్పారు. ఏపీలో విద్యా సంస్కరణలు విద్యార్థులకు అంతర్జాతీయ అవకాశాలు తీసుకువస్తాయని ఆయన ఆశాభావం వ్యక్తం చేశారు. ఈ ప్రకటనలు రాష్ట్ర విద్యా విభాగంలో కొత్త ఊపు ఇచ్చాయి.