Nara Lokesh Google AI Data Center : ఆస్ట్రేలియా పర్యటనలో మంత్రి నారా లోకేశ్ తెలుగు ప్రవాసీలతో సమావేశమై, ఆంధ్రప్రదేశ్ అభివృద్ధి కథలు పంచుకున్నారు. సిడ్నీ క్రికెట్ గ్రౌండ్‌లోని బ్రూవర్స్ పెవిలియన్‌లో ఏపీఎన్‌ఆర్‌టీ ఆధ్వర్యంలో జరిగిన ఈ కార్యక్రమానికి లోకేశ్ ముఖ్య అతిథిగా హాజరయ్యారు. ఇక్కడే ఆయన, విశాఖపట్నంలో గూగుల్ AI డేటా సెంటర్ రావడం వెనుక కేంద్ర ప్రభుత్వం పాత్ర ఎంతో ఉందని వెల్లడి చేశారు. ఇది కేవలం రాష్ట్ర ప్రయత్నాలు కాదు, ప్రధాని నరేంద్ర మోదీ జోక్యంతో సాధ్యమైందని చెప్పారు.

ALSO READ: Rain Update: విజయవాడలో దంచికొడుతున్న వర్షం.. ట్రావెల్స్‌ బస్సుకు తప్పిన ప్రమాదం

గూగుల్ సంస్థ ఏపీలో పెట్టుబడి పెట్టాలనుకున్నప్పుడు, కేంద్ర చట్టాల్లో కొన్ని మార్పులు అవసరమని చెప్పారు. ముఖ్యమంత్రి చంద్రబాబు నాయుడు ఫోన్ కాల్‌తో ఈ విషయాన్ని పీఎం దృష్టికి తీసుకెళ్లారు. వెంటనే మోదీ స్పందించి, ఆర్థిక మంత్రి నిర్మలా సీతారామన్‌తో మాట్లాడి చట్టాలు సవరించేలా చేశారు. ఈ ‘డబుల్ ఇంజన్’ సహకారంతోనే గూగుల్ విశాఖకు వచ్చింది. ఈ ప్రాజెక్ట్‌కు 1.33 లక్షల కోట్ల రూపాయల పెట్టుబడి (సుమారు 15 బిలియన్ డాలర్లు) ఐదేళ్లలో పెట్టనున్నారు. ఇది భారతదేశంలో గూగుల్ అతిపెద్ద పెట్టుబడి, 2 లక్షల యువకులకు ఉద్యోగాలు కల్పిస్తుంది. విశాఖను అమెరికా బయట అతిపెద్ద AI హబ్‌గా మారుస్తుంది, అండర్‌సీ కేబుల్స్‌తో గ్లోబల్ కనెక్టివిటీ హబ్ అవుతుంది.

లోకేశ్ మాట్లాడుతూ, గూగుల్ మాత్రమే కాదు, ఇతర ప్రాజెక్టులు కూడా కేంద్ర సహకారంతో ముందుకు సాగుతున్నాయని చెప్పారు. కొప్పర్తి నోడ్, ఓర్వకల్లు ఇండస్ట్రియల్ నోడ్, ఎన్‌టీపీసీ గ్రీన్ ప్రాజెక్ట్, నక్కపల్లి ఫార్మాసిటీలు ఇందులో భాగం. అర్సెలార్ మిట్టల్ స్టీల్ ప్లాంట్‌కు ఒక్క జూమ్ కాల్‌తో అనకాపల్లికి తీసుకువచ్చామని గుర్తు చేశారు. పెద్ద సంస్థలతో పాటు, చిన్న-మధ్య తరహా పరిశ్రమలు (ఎమ్‌ఎస్‌ఎమ్‌ఈలు) కూడా ముఖ్యమని స్పష్టం చేశారు. గత ఐదేళ్లలో పీపీఏలు రద్దు చేయడం వల్ల రాష్ట్రం నష్టపోయిందని, ఇప్పుడు చంద్రబాబు-పవన్ కల్యాణ్ నేతృత్వంలో పునర్నిర్మాణం జరుగుతోందని అన్నారు.

జనసేన అధినేత పవన్ కల్యాణ్‌తో కలిసి 15 ఏళ్లు రాష్ట్రాన్ని పాలించి, అన్ని రంగాల్లో నంబర్ వన్ చేయాలనే లక్ష్యమని లోకేశ్ చెప్పారు. పొత్తులో చిన్న సమస్యలు రావచ్చు, కానీ ఉమ్మడి లక్ష్యం స్పష్టమని పవన్ పదేపదే చెబుతున్నారని తెలిపారు. తెలుగువారు మళ్లీ తలెత్తుకునేలా చేస్తామని ధీమా వ్యక్తం చేశారు.

ప్రవాసీ తెలుగువారిని రాష్ట్ర బ్రాండ్ అంబాసిడర్లుగా పిలిచారు. “మీ కంపెనీల్లో ఏపీ గురించి మాట్లాడండి, పెట్టుబడులు తీసుకురండి. మేం డీల్స్ పూర్తి చేస్తాం” అని భరోసా ఇచ్చారు. ఏపీని 2.4 ట్రిలియన్ డాలర్ ఆర్థిక వ్యవస్థగా మార్చాలనే లక్ష్యంలో పాలుపంచుకోవాలని కోరారు. ప్రవాసీల పెట్టుబడులకు మద్దతుగా ఏపీఎన్‌ఆర్‌టీలో ప్రత్యేక విభాగం ఏర్పాటు చేస్తామని హామీ. ఆస్ట్రేలియా, న్యూజిలాండ్‌లో ఉన్న తెలుగువారికి, విద్యార్థులకు ఎల్లప్పుడూ అండగా ఉంటామని చెప్పారు.
ఈ 5 రోజుల పర్యటనలో లోకేశ్ సిడ్నీలో యూనివర్సిటీ ఆఫ్ న్యూ సౌత్ వేల్స్, టేఫ్‌ను సందర్శిస్తారు. విద్యా, ఐటీ రంగాల్లో బెస్ట్ ప్రాక్టీస్‌లు నేర్చుకోవడం, పెట్టుబడులు ఆకర్షించడం ప్రధాన లక్ష్యాలు. భారత కాన్సుల్ జనరల్ డాక్టర్ ఎస్. జానకీ రామన్, ఏపీఎన్‌ఆర్‌టీ ప్రెసిడెంట్ డాక్టర్ వేమూరి రవికుమార్‌లు పాల్గొన్నారు. ఈ సమావేశం ప్రవాసీలలో ఉత్సాహాన్ని మేల్కొలిపింది. ఏపీ పునర్నిర్మాణంలో ప్రవాసీల పాత్ర కీలకమని లోకేశ్ ప్రత్యేకంగా పేర్కొన్నారు.