Nikki Haley Slams Trump’s Tariff Threat on India: అమెరికా మాజీ అధ్యక్షుడు డొనాల్డ్ ట్రంప్ భారతదేశంపై సుంకాలు పెంచుతామని చేసిన ప్రకటనలపై మాజీ ఐరాస రాయబారి నిక్కీ హేలీ తీవ్రంగా విమర్శించారు. చైనా వంటి ప్రత్యర్థికి వెసులుబాటు ఇచ్చి, భారతదేశం వంటి బలమైన మిత్రదేశంతో సంబంధాలను దెబ్బతీయవద్దని ఆమె అన్నారు. ఇటీవల ఒక టౌన్ హాల్ సమావేశంలో మాట్లాడుతూ ఆమె ఈ వ్యాఖ్యలు చేశారు.
చైనాకు వెసులుబాటు..
ట్రంప్ విధానంపై హేలీ స్పందిస్తూ, “రష్యా, ఇరాన్ నుంచి చైనా భారీగా చమురును కొనుగోలు చేస్తోంది. కానీ, చైనాకు ట్రంప్ 90 రోజుల పాటు సుంకాల నుంచి మినహాయింపు ఇచ్చారు. అదే సమయంలో రష్యా నుంచి చమురు కొనుగోలు చేస్తున్న భారతదేశంపై భారీ సుంకాలు విధిస్తామని బెదిరిస్తున్నారు. ఇది సరికాదు” అని అన్నారు.
మిత్రదేశానికి బెదిరింపులా..
భారత్ అనేది అమెరికాకు ఒక కీలకమైన భాగస్వామి అని, చైనా విస్తరణను అడ్డుకోవడంలో భారతదేశం వ్యూహాత్మకంగా చాలా ముఖ్యమని నిక్కీ హేలీ నొక్కి చెప్పారు. భారతదేశం బలపడుతున్న ఆర్థిక, సైనిక శక్తిని దృష్టిలో ఉంచుకోవాలని, దీనిపై సుంకాలు విధించడం వల్ల అది రష్యా, చైనా వంటి దేశాలకు మరింత దగ్గరయ్యే ప్రమాదం ఉందని ఆమె హెచ్చరించారు.
రష్యా నుంచి భారీగా చమురు కొనుగోలు చేసి, భారత్ దానిని తిరిగి అధిక లాభాలకు విక్రయిస్తోందని గతంలో ట్రంప్ ఆరోపించారు. దీనిపై భారత విదేశాంగ మంత్రిత్వ శాఖ స్పందిస్తూ, తమ దేశ పౌరులకు స్థిరమైన, తక్కువ ధరలో ఇంధనం అందించడం కోసం ఈ నిర్ణయం తీసుకున్నామని, ఇది అంతర్జాతీయ మార్కెట్ పరిస్థితుల వల్ల అని వివరణ ఇచ్చింది.
