Pakistan Airstrikes:పాకిస్థాన్ ఉత్తర పశ్చిమ ప్రాంతంలో మళ్లీ రక్తపాతం చోటుచేసుకుంది. ఖైబర్‌ పర్వత ప్రాంతంలోని తిరా లోయలో ఆదివారం తెల్లవారుజామున పాక్‌ ఎయిర్‌ ఫోర్స్‌ భారీ స్థాయి వైమానిక దాడులు నిర్వహించింది. ఈ దాడుల్లో మహిళలు, చిన్నారులు సహా కనీసం 30 మంది ప్రాణాలు కోల్పోయారని స్థానిక వర్గాలు ధృవీకరించాయి. ఆ ప్రాంత ప్రజలు ఒక్కసారిగా మెలకువకు వచ్చి తీవ్ర భయాందోళనకు గురయ్యారు.
ఈ దాడులకు కేంద్రబిందువు..
తిరా లోయలోని మాత్రే దారా గ్రామం ఈ దాడులకు కేంద్రబిందువుగా మారింది. స్థానికులు చెబుతున్న వివరాల ప్రకారం, ఆదివారం ఉదయం 2 గంటల సమయంలో ఆకాశంలో భారీ శబ్దాలు వినిపించాయి. కాసేపటికి వరుసగా బాంబులు పడటంతో గ్రామంలో గందరగోళం నెలకొంది. పాక్‌ సైన్యం ఉపయోగించిన జేఎఫ్ 14 థండర్‌ యుద్ధవిమానాలు ఎనిమిది బాంబులను పడగొట్టినట్లు తెలుస్తోంది. ఈ దాడుల తర్వాత ధూళి మబ్బులు కమ్ముకుని, శిథిలాల కింద పలువురు చిక్కుకుపోయారని ప్రత్యక్ష సాక్షులు చెబుతున్నారు.
Also Read: https://teluguprabha.net/health-fitness/morning-breakfast-foods-that-support-kidney-health/
పాకిస్థాన్ రక్షణ వర్గాల సమాచారం ప్రకారం, ఈ దాడులు ప్రత్యేక లక్ష్యాలను గురి చేసుకున్నవే. తెహ్రికీ తాలిబన్ పాకిస్థాన్ (TTP) మిలిటెంట్‌ గుంపులు ఈ ప్రాంతంలో ఆశ్రయం పొందుతున్నాయని, వారిని నిర్వీర్యం చేయడానికి వైమానిక చర్యలు చేపట్టినట్లు వెల్లడైంది. అయితే బాంబులు పడిన ప్రాంతాలు సాధారణ ప్రజలు నివసించే జనావాసాలు కావడంతో తీవ్ర ప్రాణ నష్టం సంభవించింది.
మహిళలు, చిన్నపిల్లలు మరణించడం..
మహిళలు, చిన్నపిల్లలు మరణించడం స్థానికంగా ఆవేదన కలిగించింది. రాత్రి నిద్రలో ఉండగానే ఇళ్లపై బాంబులు పడటంతో కుటుంబాలు చిద్రమయ్యాయి. గ్రామంలోని కొంతమంది బతికిపోయిన వారు ధ్వంసమైన ఇళ్ల మధ్య ఆత్మీయులను వెతుక్కుంటూ విలపించారు. క్షతగాత్రులను సమీపంలోని ఆసుపత్రులకు తరలించినప్పటికీ, వైద్య సదుపాయాలు తక్కువగా ఉండటంతో సహాయం అందించడంలో కష్టాలు తలెత్తాయి.
ఇంటెలిజెన్స్‌ వర్గాల అంచనా ప్రకారం, ఈ ఆపరేషన్‌ పూర్తిగా సైనిక ప్రణాళికలో భాగమే. పాక్‌ ఆర్మీ ఇప్పటికే కొన్ని వారాలుగా తిరా లోయలో తాలిబన్ ముష్కరుల కదలికలను గమనిస్తున్నట్లు సమాచారం. ఆదివారం ఉదయం ప్రత్యేక ఆదేశాల మేరకు వైమానిక దాడులు మొదలయ్యాయి. గడచిన కొన్నేళ్లుగా ఈ ప్రాంతం పాక్‌ భద్రతా బలగాలకు సవాలు విసురుతూ వస్తున్న తాలిబన్ వర్గాల ప్రధాన స్థావరంగా మారినట్లు భావిస్తున్నారు.
