Raghuram Rajan : అమెరికా అధ్యక్షుడు డొనాల్డ్ ట్రంప్ భారత్‌పై విధించిన 50 శాతం టారిఫ్‌లు భారత్‌కు ఒక మేల్కొలుపు లాంటివని ఆర్బీఐ మాజీ గవర్నర్ రఘురామ్ రాజన్ అభిప్రాయపడ్డారు. ఈ టారిఫ్‌లు భారత్ – అమెరికా సంబంధాలు క్షీణించాయనడానికి స్పష్టమైన సంకేతమని ఆయన తెలిపారు. ఈ చర్య భారత్‌ను ఒక్క దేశంపై ఆధారపడకుండా, వాణిజ్యాన్ని వైవిధ్యపరచాలని సూచిస్తుందని ఆయన హెచ్చరించారు.
ALSO READ: Janasena : వ్యూహాలకు పదును పెట్టిన పవన్ కల్యాణ్
“మనం ఒకే దేశంపై అతిగా ఆధారపడకూడదు. తూర్పు ఆసియా, ఐరోపా, ఆఫ్రికా వైపు చూడాలి. అమెరికాతో వాణిజ్యం కొనసాగిస్తూనే, 8-8.5% ఆర్థిక వృద్ధిని సాధించడానికి సంస్కరణలను వేగవంతం చేయాలి. ఇది మన యువతకు ఉద్యోగాలు కల్పించడానికి కీలకం” అని రాజన్ పేర్కొన్నారు.
ఇతర ఆసియా దేశాలతో పోలిస్తే భారత్‌పై 25 శాతం బేస్ టారిఫ్ విధించడం ద్వారా అమెరికా భారత్‌ను ప్రత్యేకంగా లక్ష్యంగా చేసుకుందని ఆయన విశ్లేషించారు. “ఇతర ఆసియా దేశాలకు 20 శాతం టారిఫ్‌లు ఉండగా, భారత్‌కు 25 శాతం బేస్ టారిఫ్ విధించారు. ఇది మనకు నష్టకరం. ఇరు దేశాల సంబంధాలు దెబ్బతిన్నాయని ఇది చూపిస్తుంది” అని ఆయన వివరించారు.
ట్రంప్ ఆలోచనా విధానంపై మాట్లాడుతూ, “వాణిజ్య లోటును ఆయన అన్యాయంగా భావిస్తారు. తక్కువ ధరలకు వస్తువులు పంపడం అమెరికా వినియోగదారులకు లాభదాయకమని ఆయన పరిగణించరు. టారిఫ్‌లను ఆదాయ వనరుగా, రాజకీయ ఒత్తిడి సాధనంగా ఉపయోగిస్తున్నారు” అని రాజన్ విశ్లేషించారు. రష్యన్ ఆయిల్ కొనుగోళ్లపై అమెరికా విధించిన అదనపు 25 శాతం టారిఫ్‌ను పరిశీలించాలని, రిఫైనరీలు లాభాలు ఆర్జిస్తుంటే ఎగుమతిదారులు నష్టపోతున్నారని ఆయన సూచించారు.
ఈ టారిఫ్‌లు చిన్న ఎగుమతిదారులైన రొయ్యల రైతులు, టెక్స్‌టైల్ తయారీదారులపై తీవ్ర ప్రభావం చూపుతాయని, అమెరికా వినియోగదారులకు కూడా 50 శాతం ధరల పెరుగుదల భారమవుతుందని రాజన్ హెచ్చరించారు. దీర్ఘకాలంలో ఈ చర్యలు భారత్-అమెరికా వ్యూహాత్మక భాగస్వామ్యానికి హాని చేస్తాయని ఆయన ఆందోళన వ్యక్తం చేశారు.
