Russia Earthquake Tsunami Alert: పసిఫిక్ మహాసముద్రం ఒక్కసారిగా ఉలిక్కిపడింది. రష్యా తూర్పు తీరంలోని కమ్చట్కా ద్వీపకల్పం సమీపంలో సంభవించిన అత్యంత శక్తివంతమైన భూకంపం ప్రపంచవ్యాప్తంగా తీరప్రాంత దేశాలను వణికిస్తోంది. రిక్టర్ స్కేలుపై దీని తీవ్రత 8.8గా నమోదు కావడంతో, భూగర్భ శాస్త్రవేత్తలు సైతం నివ్వెరపోయారు. ఈ భూ ప్రళయం సృష్టించిన సునామీ హెచ్చరికలతో రష్యా నుంచి అమెరికా వరకు, జపాన్ నుంచి ఇతర పసిఫిక్ దీవుల వరకు ప్రభుత్వాలు అప్రమత్తమయ్యాయి. అసలు ఏం జరిగింది?

భూకంప తీవ్రత, కేంద్రం :  స్థానిక కాలమానం ప్రకారం జూలై 30, బుధవారం ఉదయం 8:25 గంటలకు ఈ భారీ భూకంపం సంభవించినట్లు జపాన్ వాతావరణ సంస్థ తొలుత వెల్లడించింది. మొదట దీని తీవ్రత 8.0గా అంచనా వేసినప్పటికీ, అమెరికా జియోలాజికల్ సర్వే (యూఎస్‌జీఎస్) దానిని 8.8గా సవరించింది. ఇది ఇటీవలి దశాబ్దాలలో సంభవించిన అత్యంత శక్తివంతమైన భూకంపాలలో ఒకటిగా నిలుస్తుంది. భూకంప కేంద్రం రష్యాలోని పెట్రోపావ్లోవ్స్క్‌-కమ్చాట్స్కీ నగరానికి తూర్పు-ఆగ్నేయంగా సుమారు 136 కిలోమీటర్ల దూరంలో, సముద్ర గర్భంలో 20.7 కిలోమీటర్ల లోతులో ఉన్నట్లు యూఎస్‌జీఎస్ గుర్తించింది. భూకంపం ఇంత తక్కువ లోతులో సంభవించడం వల్ల సునామీ ముప్పు మరింత పెరిగింది.

రష్యా, జపాన్‌లలో అలజడి : భూకంపం ధాటికి రష్యాలోని కమ్చట్కా ప్రాంతంలోని భవనాలు తీవ్రంగా కంపించాయి. భయభ్రాంతులకు గురైన ప్రజలు ఇళ్ల నుంచి బయటకు పరుగులు తీశారు. రష్యాలోని కురిల్ దీవుల్లోని సెవెరో-కురిల్స్క్ అనే ఓడరేవు పట్టణాన్ని సునామీ అలలు ముంచెత్తాయి. సుమారు 3 నుంచి 4 మీటర్ల ఎత్తున అలలు ఎగసిపడినట్లు అధికారులు తెలిపారు. దీనితో అనేక భవనాలు దెబ్బతిన్నట్లు, పలువురికి గాయాలైనట్లు సమాచారం.

అటు జపాన్‌కు కూడా సునామీ హెచ్చరికలు జారీ అయ్యాయి.దేశంలోని ఉత్తర ద్వీపమైన హొక్కైడో తీరానికి సుమారు 30 సెంటీమీటర్ల ఎత్తున మొదటి సునామీ అల తాకినట్లు జపాన్ వాతావరణ సంస్థ ప్రకటించింది.అధికారులు ప్రజలను సురక్షిత, ఎత్తైన ప్రదేశాలకు తరలివెళ్లాలని ఆదేశించారు. ఫుకుషిమా అణు కర్మాగారంలోని కార్మికులను ముందుజాగ్రత్త చర్యగా ఖాళీ చేయించారు.

అమెరికాలో హై అలర్ట్ : ఈ భూకంప ప్రభావం పసిఫిక్ అంతటా విస్తరించింది. అమెరికాలోని హవాయి రాష్ట్రానికి సునామీ హెచ్చరిక జారీ చేయగా, అలస్కాలోని అలూటియన్ దీవులకు కూడా ఇదే విధమైన తీవ్ర హెచ్చరికలు అందాయి. కాలిఫోర్నియా, ఒరెగాన్, వాషింగ్టన్ సహా మొత్తం పశ్చిమ తీరానికి సునామీ సలహా (Tsunami Advisory) జారీ చేశారు.హవాయిలోని హోనొలలూలో సునామీ సైరన్లు మోగడంతో ప్రజలు ఎత్తైన ప్రదేశాలకు తరలివెళ్లారు.

అమెరికా అధ్యక్షుడు ట్రంప్ స్పందన : ఈ ప్రకృతి విపత్తుపై అమెరికా అధ్యక్షుడు డొనాల్డ్ ట్రంప్ స్పందించారు. హవాయి, అలస్కా, పసిఫిక్ తీర ప్రాంతాల ప్రజలు అప్రమత్తంగా ఉండాలని, ధైర్యం కోల్పోవద్దని ఆయన సూచించారు. స్థానిక అధికారుల సూచనలను పాటిస్తూ, సురక్షితంగా ఉండాలని ఆయన తన సోషల్ మీడియా ఖాతాలో పోస్ట్ చేశారు.

భారతీయులకు ప్రత్యేక సూచనలు : పసిఫిక్ తీరంలో నెలకొన్న సునామీ ముప్పు నేపథ్యంలో శాన్‌ఫ్రాన్సిస్కోలోని భారత కాన్సులేట్ జనరల్ కార్యాలయం అప్రమత్తమైంది. అమెరికా పశ్చిమ తీర రాష్ట్రాలు,  హవాయిలో నివసిస్తున్న భారతీయ పౌరులకు ప్రత్యేక సలహాలు జారీ చేసింది.