Liechtenstein: ప్రపంచ పటంలో చిన్న చుక్కలా కనిపించే ఒక దేశం, పెద్ద దేశాలు కూడా చేయలేని విప్లవాన్ని సాధించింది. అదే ఐరోపాలోని చిన్న రాజ్యం లైఖ్టెన్‌స్టెయిన్ (Liechtenstein). ఈ దేశం వద్ద సొంత సైన్యం లేదు, సొంత అంతర్జాతీయ విమానాశ్రయం లేదు, సొంత కరెన్సీని కూడా ముద్రించదు. అయినప్పటికీ, ప్రపంచంలోనే అత్యధిక జీవన ప్రమాణాలు, అగ్రస్థానంలో నిలిచే ఆదాయంతో ఇది ఒక ఆర్థిక అద్భుతంగా వెలుగొందుతోంది.
విజయానికి రహస్యం – సరైన నిర్ణయాలు:
లైఖ్టెన్‌స్టెయిన్ విజయ రహస్యం దాని పరిమాణంలో లేదు, అది తీసుకున్న మేధోపరమైన నిర్ణయాల్లో ఉంది. స్విట్జర్లాండ్, ఆస్ట్రియా మధ్య ఇరుక్కున్న ఈ చిన్న దేశం, తన పెద్ద పొరుగు దేశాలను తెలివిగా ఉపయోగించుకుంది.లైఖ్టెన్‌స్టెయిన్ సొంత సెంట్రల్ బ్యాంక్ స్థాపించకుండా, స్విస్ ఫ్రాంక్ (Swiss Franc)ను తమ అధికారిక కరెన్సీగా స్వీకరించింది. దీనివల్ల కరెన్సీ స్థిరత్వం కోసం కోట్లాది రూపాయలు ఖర్చు చేయాల్సిన అవసరం తప్పింది.విమానాశ్రయం నిర్మించకుండా వేల కోట్లు ఆదా చేసింది. రవాణా అవసరాల కోసం స్విట్జర్లాండ్, ఆస్ట్రియా ఎయిర్‌పోర్ట్‌లపై ఆధారపడింది. ఈ నిర్ణయాలు దేశ ఖజానాపై భారం పడకుండా కాపాడాయి.
తక్కువ నేరాలు, అధిక విశ్వాసం: ఇక్కడ నేరాల రేటు అత్యంత తక్కువ. ఖైదీలు కొద్దిమందే ఉంటారు. ఇక్కడి ప్రజలు తమ ఇళ్లకు తాళాలు వేయరు, ఆ స్థాయిలో నమ్మకం, భద్రత ఈ దేశంలో ఉంది. నిజమైన సంపద అంటే భద్రత, ప్రశాంతమైన జీవనం అని ఈ దేశం నిరూపించింది.
ప్రపంచాన్ని శాసించే పారిశ్రామిక శక్తి:
లైఖ్టెన్‌స్టెయిన్ ఆర్థికంగా బలంగా ఉండటానికి ప్రధాన కారణం వస్తువుల ఉత్పత్తి (Manufacturing). ఈ చిన్న దేశం ఫైనాన్షియల్ సెక్టార్‌లో బలంగా ఉన్నప్పటికీ, అది సంపాదించే అసలైన సంపద ఇక్కడి పరిశ్రమల నుంచే వస్తుంది.
లైఖ్టెన్‌స్టెయిన్:
డెంటిస్ట్‌లు వాడే సూక్ష్మ డ్రిల్లులు
కార్లలో ఉపయోగించే ఖచ్చితమైన భాగాలు
అంతరిక్ష టెక్నాలజీకి అవసరమైన ఉన్నత స్థాయి ఇంజనీరింగ్ భాగాలు
వంటి వాటి తయారీలో ప్రపంచ నాయకుడిగా ఉంది. నిర్మాణ పరికరాల దిగ్గజ సంస్థ హిల్టీ (Hilti) వంటి అంతర్జాతీయ కంపెనీలు ఇక్కడే స్థాపించబడ్డాయి. దేశ జనాభా కంటే ఇక్కడి కంపెనీలు కల్పిస్తున్న ఉద్యోగాల సంఖ్య ఎక్కువగా ఉండటం విశేషం.
అప్పుల్లేని ఆర్థిక వ్యవస్థ, స్థిరమైన ఆదాయం మరియు పరిపాలనలో సరళమైన నిర్ణయాల వల్ల లైఖ్టెన్‌స్టెయిన్… డబ్బు అనేది కేవలం బ్యాంక్ బ్యాలెన్స్ కాదని, నిజమైన సంపద ప్రశాంతమైన జీవితం గడిపే స్వేచ్ఛలో ఉంది అని ప్రపంచానికి గట్టిగా చాటి చెబుతోంది.
