Mexican Navy plane crash: ఒక చిన్నారి ప్రాణాన్ని నిలబెట్టాలనే ఆశతో ఆకాశంలోకి ఎగిరిన ఆ విమానం.. గమ్యానికి చేరకముందే అనంత వాయువుల్లో కలిసిపోయింది. అమెరికాలోని టెక్సాస్ రాష్ట్రం, గాల్వేస్టోన్ కాజ్‌వే సమీపంలో మెక్సికో నౌకాదళానికి చెందిన విమానం ఘోర ప్రమాదానికి గురైంది. ఈ విషాద ఘటనలో ఐదుగురు అక్కడికక్కడే ప్రాణాలు కోల్పోయారు.

ఏం జరిగింది?
కేవలం ఏడాది వయసున్న ఓ చిన్నారికి అత్యవసర వైద్య చికిత్స అందించడం కోసం మెక్సికో నేవీ ఈ ప్రత్యేక విమానాన్ని ఏర్పాటు చేసింది. విమానంలో చిన్నారితో పాటు నలుగురు నేవీ అధికారులు, మరో నలుగురు పౌరులు (వైద్య బృందం) ఉన్నారు. మానవత్వంతో చేపట్టిన ఈ ప్రయాణం, టెక్సాస్ తీరానికి చేరువలో ఉండగా ఒక్కసారిగా ప్రమాదానికి గురై కుప్పకూలింది.

Also Read: MYANMAR  : – మయన్మార్‌లో సైనిక ప్రహసనం.. ప్రజాస్వామ్య ముసుగులో..

ప్రమాదానికి గల కారణాలు:
ప్రస్తుతం అందుతున్న సమాచారం ప్రకారం, గాల్వేస్టోన్ తీర ప్రాంతంలో గత కొన్ని రోజులుగా దట్టమైన పొగమంచు (Dense Sea Fog) కమ్ముకుని ఉంది. విజిబిలిటీ అత్యంత తక్కువగా ఉండటమే ఈ ప్రమాదానికి ప్రధాన కారణమని ప్రాథమికంగా భావిస్తున్నారు. పైలట్ దారి కనుగొనలేక విమానం నియంత్రణ కోల్పోయి ఉండవచ్చని నిపుణులు అంచనా వేస్తున్నారు.

సహాయక చర్యలు , దర్యాప్తు:
ప్రమాదం జరిగిన వెంటనే గాల్వేస్టోన్ కౌంటీ షెరీఫ్ కార్యాలయం రంగంలోకి దిగింది. అత్యాధునిక డ్రోన్ యూనిట్లు, రెస్క్యూ సిబ్బంది నీటిలోనూ, తీర ప్రాంతంలోనూ గాలింపు చర్యలు చేపట్టారు. అమెరికాకు చెందిన FAA (ఫెడరల్ ఏవియేషన్ అడ్మినిస్ట్రేషన్) NTSB (నేషనల్ ట్రాన్స్‌పోర్టేషన్ సేఫ్టీ బోర్డు) బృందాలు ఘటనా స్థలానికి చేరుకుని బ్లాక్ బాక్స్ కోసం వెతుకుతున్నాయి. ఈ ఘటనపై మెక్సికో ప్రభుత్వం దిగ్భ్రాంతి వ్యక్తం చేస్తూ, మృతుల కుటుంబాలకు అండగా ఉంటామని ప్రకటించింది.