Trump Ally Charlie Kirk Assassinated: అమెరికాలో రాజకీయాలు తూటాలకు వేదికయ్యాయి. అధ్యక్షుడు డొనాల్డ్ ట్రంప్ కీలక మిత్రుడు, యువ కన్సర్వేటివ్ ఉద్యమకారుడు చార్లీ కిర్క్ (Charlie Kirk) దారుణ హత్యకు గురయ్యారు. ఉటా వ్యాలీ యూనివర్సిటీలో ఓ కార్యక్రమంలో ప్రసంగిస్తుండగా, క్యాంపస్‌లోని ఓ భవనం పైనుంచి స్నైపర్ జరిపిన కాల్పుల్లో ఆయన ఒక్క తూటాతో అక్కడికక్కడే కుప్పకూలారు. ఈ ఘటనతో అమెరికా ఒక్కసారిగా ఉలిక్కిపడింది.
ఈ హత్యపై అధ్యక్షుడు ట్రంప్ తీవ్రంగా స్పందించారు. చార్లీ కిర్క్‌ను “సత్యం కోసం ప్రాణాలర్పించిన అమరవీరుడు” (Martyr for Truth) అని అభివర్ణించారు. అమెరికాలో పెరిగిపోతున్న ఉగ్రవాదానికి, రాజకీయ హింసకు వామపక్షాల రెచ్చగొట్టే ప్రసంగాలే కారణమని ఆయన నిప్పులు చెరిగారు. ఈ కిరాతక చర్యకు పాల్పడిన ప్రతి ఒక్కరినీ, వారికి నిధులు సమకూరుస్తున్న సంస్థలను కూడా వదిలిపెట్టబోమని శపథం చేశారు. ట్రంప్ ఆదేశాల మేరకు దేశవ్యాప్తంగా జాతీయ జెండాలను అవనతం చేశారు.
ఈ దారుణ ఘటనపై ఎఫ్‌బీఐ దర్యాప్తు ముమ్మరం చేసింది. హంతకుడు వాడిన ‘హై-పవర్డ్’ రైఫిల్‌ను స్వాధీనం చేసుకున్నామని, నిందితుడు కాలేజీ వయసు యువకుడిలా ఉన్నాడని అధికారులు తెలిపారు.
ALSO READ: Nepal Protests: నేపాల్‌లో ప్రజాస్వామ్యం అంతం కానుందా?.. రెండేళ్ల క్రితమే జోస్యం చెప్పిన డెవిల్‌!
దేశ అత్యున్నత పౌర పురస్కారం ప్రదానం..
మరోవైపు, చార్లీ కిర్క్‌కు మరణానంతరం దేశ అత్యున్నత పౌర పురస్కారమైన ‘ప్రెసిడెన్షియల్ మెడల్ ఆఫ్ ఫ్రీడమ్’ అందిస్తామని ట్రంప్ ప్రకటించారు. 9/11 దాడుల సంస్మరణ కార్యక్రమంలో ఈ ప్రకటన చేయడం గమనార్హం. “టర్నింగ్ పాయింట్ యూఎస్ఏ” సంస్థ వ్యవస్థాపకుడైన కిర్క్, ట్రంప్‌కు యువతలో మద్దతు కూడగట్టడంలో కీలక పాత్ర పోషించారు. ఆయన హత్యతో అమెరికాలో రాజకీయ వాతావరణం ఒక్కసారిగా వేడెక్కింది.
ALSO READ: “Hitler Of Our Time”: ట్రంప్ నేటి హిట్లర్.. రెస్టారెంట్‌లో పాలస్తీనా మద్దతుదారుల నిరసన
