Trump Revenge Tariff Deadline Looms: ప్రపంచ వాణిజ్య రంగంలో అనూహ్య మలుపులు చోటుచేసుకుంటున్నాయి. అమెరికా అధ్యక్షుడు డొనాల్డ్ ట్రంప్ సంచలన నిర్ణయాలు వాణిజ్య భాగస్వామ్య దేశాలను ఆందోళనకు గురిచేస్తున్నాయి. జులై 9వ తేదీతో ముగియనున్న ప్రతీకార సుంకాల గడువును పొడిగించే ఆలోచన లేదని ట్రంప్ స్పష్టం చేయడంతో, భారత్‌తో సహా పలు దేశాలపై దీని ప్రభావం ఎలా ఉంటుందనేది ఇప్పుడు మిలియన్ డాలర్ల ప్రశ్నగా మారింది. ఈ నిర్ణయం ప్రపంచ వాణిజ్య సమీకరణలను ఎలా మార్చగలదో, భారత్‌పై దీని పరిణామాలేమిటో తెలుసుకుందాం!
ట్రంప్ నిర్ణయం: గడువు పొడిగింపు లేదు – ఒక సంచలనం : అమెరికా అధ్యక్షుడు డొనాల్డ్ ట్రంప్ ఇటీవల ఫాక్స్ న్యూస్‌కు ఇచ్చిన ప్రత్యేక ఇంటర్వ్యూలో తన సంచలన నిర్ణయాన్ని వెల్లడించారు. జులై 9వ తేదీతో ముగిసే 90 రోజుల పాటు సుంకాల వాయిదాకు పొడిగింపు ఇవ్వే ఉద్దేశం లేదని ఆయన తేల్చి చెప్పారు. “నేను దీన్ని పొడిగించాల్సిన అవసరం లేదు. అవసరమైతే చేయొచ్చు, కానీ ప్రస్తుతం ఆలోచన లేదు” అని ట్రంప్ వ్యాఖ్యానించారు. ఈ వాయిదా గడువు సమయంలో భారత్‌తోపాటు అనేక దేశాలతో వాణిజ్య ఒప్పందాల కోసం చర్చలు జరుగుతున్నప్పటికీ, ఒప్పందాలు కుదిరికపోతే ఆయా దేశాలపై కఠిన సుంకాలు విధించేందుకు అమెరికా సిద్ధంగా ఉన్నట్లు ట్రంప్ పరోక్షంగా హెచ్చరించారు. ఈ ప్రకటన ప్రపంచవ్యాప్తంగా వాణిజ్య వర్గాల్లో తీవ్ర చర్చకు దారితీసింది.
గడువు ముగిసే ముందు ‘లేఖల’ సమరం! : అమెరికా అధ్యక్షుడు డొనాల్డ్ ట్రంప్ అనుసరిస్తున్న “అమెరికా ఫస్ట్” వాణిజ్య విధానంలో మరో కీలక ఘట్టం ఆవిష్కృతమవుతోంది. జులై 9వ తేదీన “రివెంజ్ టారిఫ్” గడువు ముగియనున్న నేపథ్యంలో, ఆయా దేశాలకు ‘లేఖల సమరం’ ప్రారంభమవుతుందని ట్రంప్ స్వయంగా ప్రకటించారు. ఈ లేఖలు కేవలం అధికారిక సంప్రదింపులు మాత్రమే కాదని, వాణిజ్య భాగస్వాములపై ఒత్తిడి పెంచి, అమెరికా కోరుకుంటున్న ఒప్పందాలను వేగవంతం చేసే ఒక ఎత్తుగడ అని విశ్లేషకులు భావిస్తున్నారు.
ట్రంప్ తన తాజా ప్రకటనలో, జులై 9వ తేదీ నాటికి వాణిజ్య చర్చల్లో పురోగతి సాధించని దేశాలకు లేఖలు పంపడం ప్రారంభిస్తామని స్పష్టం చేశారు. “ఈ లేఖల్లో ప్రతి దేశం అమెరికాతో ఎలా వ్యవహరిస్తోంది, వాణిజ్య సంబంధాలలో ఎంతవరకు సహకరిస్తోంది అనే అంశాలను నిశితంగా పరిశీలిస్తాం. కొన్ని దేశాలు మమ్మల్ని బాగా పరిగణిస్తున్నాయి, కొన్ని కాదు. వాటి ఆధారంగా సుంకాల రేటును ప్రస్తుతం ఉన్న 10 శాతం నుంచి 25 శాతం, 35 శాతం లేదా 50 శాతం వరకు పెంచవచ్చు” అని ట్రంప్ సూచనప్రాయంగా హెచ్చరించారు. ఈ ప్రకటన అమెరికా తన సుంకాల విధానంలో ఎంత కఠినంగా వ్యవహరించడానికి సిద్ధంగా ఉందో వెల్లడిస్తోంది.
దాదాపు 200 దేశాలతో ఒకేసారి సమగ్ర చర్చలు జరపడం కష్టమని ట్రంప్ ఒప్పుకున్నప్పటికీ, కేవలం 90 రోజుల్లో 90 వాణిజ్య ఒప్పందాలు కుదుర్చుకోవాలని లక్ష్యంగా పెట్టుకున్నట్లు పేర్కొన్నారు. ఇది వాణిజ్య చర్చలను వేగవంతం చేయాలనే అమెరికా ఆత్రుతను, తమ షరతులకు అంగీకరించని దేశాలపై సుంకాల అస్త్రాన్ని ప్రయోగించడానికి వెనుకాడబోమనే వైఖరిని స్పష్టం చేస్తోంది. ఇప్పటికే, భారత్‌తో సహా అనేక దేశాలు అమెరికాతో వాణిజ్య ఉద్రిక్తతలను తగ్గించుకోవడానికి చర్చలు జరుపుతున్నాయి. ట్రంప్ ఈ ‘లేఖల’ వ్యూహం ఆయా దేశాలపై ఒత్తిడిని మరింత పెంచి, జులై 9వ తేదీ లోపు నిర్ణయాలు తీసుకునేలా ప్రభావితం చేస్తుందని అంచనా వేస్తున్నారు. ఈ పరిణామాలు అంతర్జాతీయ వాణిజ్య రంగంలో కొత్త సమీకరణాలకు దారితీయడం ఖాయం.
Trump Revange Tariff : రివెంజ్ టారిఫ్ గడువు పొడగింపు లేదు!
సంబంధిత వార్తలు | RELATED ARTICLES