US pressure on India’s Russian oil imports : భారత ఇంధన భద్రత, దౌత్యనీతిపై అగ్రరాజ్యం అమెరికా ఉక్కుపాదం మోపింది. ఒకే రోజు రెండు కీలక నిర్ణయాలతో, అధ్యక్షుడు డొనాల్డ్ ట్రంప్ భారత్‌ను తీవ్ర ఒత్తిడిలోకి నెట్టారు. రష్యా నుంచి చమురు కొనుగోలు చేసే దేశాలపై ఏకంగా 500% వరకు సుంకాలు విధించే బిల్లుకు మద్దతు తెలపడంతో పాటు, భారత్ నేతృత్వంలోని అంతర్జాతీయ సౌర కూటమి (ISA) నుంచి వైదొలగుతున్నట్లు ప్రకటించారు. కొత్త అమెరికా రాయబారి ఢిల్లీలో అడుగుపెట్టడానికి ముందే ట్రంప్ ప్రభుత్వం తీసుకున్న ఈ కఠిన నిర్ణయాల వెనుక ఉన్న వ్యూహమేంటి? దీనిని భారత్ ఎలా ఎదుర్కోనుంది?

భారత్-అమెరికా సంబంధాలపై తీవ్ర ప్రభావం చూపే రెండు కీలక నిర్ణయాలను ట్రంప్ ప్రభుత్వం గురువారం ప్రకటించింది.

సుంకాల కొరడా: రష్యా నుంచి చమురు దిగుమతి చేసుకుంటున్న దేశాలపై 500% వరకు సుంకాలు విధించేందుకు ఉద్దేశించిన బిల్లుకు అధ్యక్షుడు డొనాల్డ్ ట్రంప్ తన పూర్తి మద్దతును ప్రకటించారు. ఉక్రెయిన్ యుద్ధం నేపథ్యంలో, రష్యా ఆర్థిక వ్యవస్థను దెబ్బతీయడమే లక్ష్యంగా ఈ చర్య తీసుకుంటున్నట్లు కనిపిస్తున్నా, రష్యా నుంచి అత్యధికంగా చమురు కొనుగోలు చేస్తున్న భారత్‌పైనే దీని ప్రత్యక్ష ప్రభావం పడనుంది.

సౌర కూటమికి షాక్: ప్రపంచవ్యాప్తంగా సౌరశక్తి వినియోగాన్ని ప్రోత్సహించే లక్ష్యంతో, భారత్ ఎంతో ప్రతిష్ఠాత్మకంగా ఏర్పాటు చేసిన ‘అంతర్జాతీయ సౌర కూటమి’ (ISA) నుంచి అమెరికా వైదొలగుతున్నట్లు ట్రంప్ ప్రభుత్వం ప్రకటించింది. పర్యావరణ పరిరక్షణకు భారత్ చేస్తున్న కృషికి ఇది పెద్ద దౌత్యపరమైన ఎదురుదెబ్బగా విశ్లేషకులు భావిస్తున్నారు.

కొత్త రాయబారి రాక.. ముందే సంకేతాలు : ఈ సంచలన నిర్ణయాలు, అమెరికా నూతన రాయబారి సెర్గియో గోర్ ఢిల్లీకి రాకముందే వెలువడటం గమనార్హం. సెర్గియో గోర్, గత ఏడాది సెప్టెంబర్‌లోనే, “భారత్ రష్యా నుంచి చమురు దిగుమతులు నిలిపివేసేలా చూడటమే తన అగ్ర ప్రాధాన్యత” అని స్పష్టం చేశారు. ఆయన ఈ వారాంతంలో ఢిల్లీకి చేరుకుని, జనవరి 12, 2026న భారత రాయబారిగా, “దక్షిణ, మధ్య ఆసియాకు ప్రత్యేక ప్రతినిధి”గా తన బాధ్యతలను ప్రారంభించనున్నారు.

కొత్త రాయబారి రాకముందే, తమ వైఖరి ఎంత కఠినంగా ఉండబోతోందో ట్రంప్ ప్రభుత్వం ఈ నిర్ణయాల ద్వారా స్పష్టమైన సంకేతాలను పంపినట్లయింది. ఈ ద్వంద్వ ఒత్తిడిని భారత ప్రభుత్వం ఎలా ఎదుర్కొంటుందో, ఇరు దేశాల మధ్య సంబంధాలు భవిష్యత్తులో ఎలా ఉండబోతున్నాయో వేచి చూడాలి.