Trump’s Tariff Shockwave: అమెరికా అధ్యక్షుడు డొనాల్డ్ ట్రంప్ మరోసారి వాణిజ్య యుద్ధానికి తెరతీశారు. ప్రపంచ దేశాలను వణికిస్తూ, ఇప్పటికే ఉక్కు, అల్యూమినియంపై భారీ సుంకాలు విధించిన ట్రంప్, ఇప్పుడు రాగి, ఫార్మా రంగాలపై పదునైన కత్తి దూశారు. ఈ నిర్ణయాలు ప్రపంచ వాణిజ్యంపై ఎలాంటి ప్రభావం చూపుతాయి? ముఖ్యంగా, అమెరికాకు గణనీయమైన ఎగుమతులు చేసే భారత్ భవితవ్యం ఏమిటి? ట్రంప్ తీరు భారతదేశ ఆర్థిక వ్యవస్థపై ఎలాంటి పెనుమార్పులు తీసుకురాబోతోంది..? 

ట్రంప్ సుంకాల పదునైన కత్తి: భారత్‌పై పెను ప్రభావం : డొనాల్డ్ ట్రంప్ మరోసారి తన వాణిజ్య విధానాలతో ప్రపంచ దేశాలను ఉక్కిరిబిక్కిరి చేస్తున్నారు. అమెరికాలోకి దిగుమతి అయ్యే వస్తువులపై భారీ సుంకాలు విధించడంలో ట్రంప్ ఎప్పుడూ వెనుకడుగు వేయరు. ఇప్పటికే ఉక్కు, అల్యూమినియంపై 50 శాతం టారిఫ్‌లు విధించి ప్రపంచ వాణిజ్య యుద్ధానికి తెరతీసిన ఆయన, తాజాగా రాగిపై కూడా 50 శాతం సుంకాలను ప్రకటించారు. అంతేకాకుండా, అమెరికా దిగుమతి చేసుకునే ఔషధాలపై సుంకాలు ఒక ఏడాది తర్వాత 200 శాతం వరకు పెరిగే అవకాశం ఉందని హెచ్చరించారు. ఈ సుంకాల అమలు గడువును ఆగస్టు 1 తర్వాత పొడిగించబోమని స్పష్టం చేశారు. 

భారత్‌పై ట్రంప్ సుంకాల ప్రభావం: అమెరికా రాగి, ఫార్మా రంగాలపై విధించిన సుంకాలు ప్రపంచ దేశాలతో పాటు భారత్‌పై కూడా తీవ్ర ప్రభావం చూపే అవకాశాలు స్పష్టంగా కనిపిస్తున్నాయి. ఎందుకంటే, యూఎస్‌కు ఎక్కువగా రాగి, ఔషధాలను ఎగుమతి చేసే దేశాల్లో భారత్ కూడా ఒకటి.

రాగి రంగంపై ప్రభావం: 2024-25 ఆర్థిక సంవత్సరంలో, ప్రపంచ దేశాలకు భారత్ 2 బిలియన్ డాలర్ల విలువైన రాగి, దాని అనుబంధ ఉత్పత్తులను సరఫరా చేసింది. ఇందులో అమెరికా మార్కెట్లకు భారత్ 360 మిలియన్ డాలర్లు లేదా 17 శాతం రాగి ఉత్పత్తులను ఎగుమతి చేసింది. వాణిజ్య డేటా ప్రకారం, సౌదీ అరేబియా (26 శాతం), చైనా (18 శాతం) తర్వాత అమెరికాకు ఎక్కువ రాగి ఉత్పత్తులను ఎగుమతి చేస్తున్న దేశంగా భారత్ (మూడో స్థానంలో) ఉంది. 50 శాతం సుంకం విధించడం వల్ల భారత రాగి ఎగుమతులు భారీగా తగ్గి, ఈ రంగంపై ఆధారపడిన వేలాది మంది కార్మికుల ఉపాధికి ప్రమాదం ఏర్పడే అవకాశం ఉంది.

ఫార్మా రంగానికి భారీ దెబ్బ: రాగి ఉత్పత్తులతో పోలిస్తే, ట్రంప్ సుంకాల ప్రభావం భారత ఫార్మా రంగంపైనే ఎక్కువ పడనుంది. ప్రపంచ దేశాల్లో అమెరికాకే భారత్ ఎక్కువ ఫార్మా ఉత్పత్తులను ఎగుమతి చేస్తుంది. 2025 ఆర్థిక సంవత్సరంలో అమెరికాకు భారత్ 9.8 బిలియన్ డాలర్ల విలువైన ఔషధాలను సరఫరా చేసింది. ఇది మునుపటి ఏడాది ఎగుమతులు 8.1 బిలియన్ డాలర్లతో పోలిస్తే 21 శాతం ఎక్కువ. అలాగే, భారత్ నుంచి ఎగుమతి అయ్యే ఫార్మా ఉత్పత్తుల్లో అమెరికాకు వెళ్లేవి 40 శాతంగా ఉన్నాయి. ఫార్మా రంగంపై 200 శాతం లెవీ విధించడం వల్ల ఈ రంగం తీవ్రంగా ప్రభావితమవుతుందని నిపుణులు భావిస్తున్నారు. ఇది భారత ఫార్మా కంపెనీల లాభాలపై తీవ్ర ప్రభావం చూపడమే కాకుండా, పరిశోధన, అభివృద్ధి కార్యకలాపాలను కూడా దెబ్బతీస్తుంది.

 ట్రేడ్ డీల్ ఆశలు : భారత్, అమెరికాల మధ్య వాణిజ్య ఒప్పందం కుదిరే అవకాశం ఉంది. ఆగస్టు 1లోపు ఈ డీల్ పూర్తయితే, కొత్తగా విధించే సుంకాల ప్రభావం భారత మార్కెట్లపై పడదని నిపుణులు భావిస్తున్నారు. ఇది భారతదేశానికి ఊరట కలిగించే అంశం.

ట్రంప్ ప్రకటనలు: రాగి, ఫార్మా ఉత్పత్తులపై సుంకాలు : రాగి, ఫార్మా ఉత్పత్తులపై సుంకాల గురించి మంగళవారం జరిగిన క్యాబినెట్ సమావేశంలో ట్రంప్ కీలక వ్యాఖ్యలు చేశారు.అమెరికా ఇప్పుడు సొంతంగా రాగిని తయారు చేస్తోంది. ఈ కారణంతో, ఇతర దేశాల నుంచి దిగుమతి అయ్యే రాగి ఉత్పత్తులపై 50 శాతం సుంకాలు విధించనున్నారు. జూలై చివరిలో లేదా ఆగస్టు 1 నుంచి ఈ టారిఫ్‌లు అమలులోకి వచ్చే అవకాశం ఉందని యూఎస్ వాణిజ్య కార్యదర్శి హోవార్డ్ లుట్నిక్ వెల్లడించిన కొద్దిసేపటికే ట్రంప్ ఈ ప్రకటన చేశారు.
అలాగే, వాషింగ్టన్ త్వరలో ఔషధాలపై విధించే టారిఫ్‌ల ప్రకటన చేస్తుందని వెల్లడించారు. ఔషధ కంపెనీలు తమ కార్యకలాపాలను అమెరికాలోకి మార్చడానికి ఏడాది వరకు సమయం ఇస్తామని ట్రంప్ ప్రకటించారు. అమెరికాకు దిగుమతి అయ్యే ఔషధాలపై  200 శాతం వరకు టారిఫ్ విధిస్తున్నట్లు పేర్కొన్నారు.

బ్రిక్స్ కూటమిపైనా ట్రంప్ వ్యాఖ్యలు: బ్రిక్స్ కూటమిపైనా ట్రంప్ కీలక వ్యాఖ్యలు చేశారు. బ్రిక్స్ దేశాలపై 10 శాతం టారిఫ్‌లు విధించడాన్ని మరోసారి సమర్థించుకున్నారు. బ్రిక్స్ కూటమి అమెరికాను నొప్పించడానికే ఏర్పాటైందని, డాలర్‌ను దిగజార్చడానికీ ప్రయత్నిస్తోందని ఆరోపించారు. డాలర్‌ను సవాలు చేయాలనుకుంటే చేయవచ్చని, అయితే బ్రిక్స్ సుంకాలను చెల్లించడానికి సిద్ధంగా ఉండాలని ఆయన ఘాటుగా హెచ్చరించారు.
 వారు దానిని కోరుకోరని అనుకుంటున్నానన్నారు. ఈ వ్యాఖ్యలు అంతర్జాతీయ వాణిజ్య సంబంధాలపై ట్రంప్ దూకుడు స్వభావాన్ని మరోసారి స్పష్టం చేస్తున్నాయి.