Trump Warns of “Severe Consequences” for Putin: రష్యా-ఉక్రెయిన్ యుద్ధానికి ముగింపు పలికే లక్ష్యంతో అమెరికా అధ్యక్షుడు డొనాల్డ్ ట్రంప్, రష్యా అధ్యక్షుడు వ్లాదిమిర్ పుతిన్‌తో జరిపే సమావేశంపై ప్రపంచం దృష్టి సారించింది. ఈ సమావేశం శుక్రవారం అలస్కాలో జరగనుంది. ఈ శిఖరాగ్ర సదస్సులో కాల్పుల విరమణపై ఒప్పందం కుదరకపోతే పుతిన్‌కు “తీవ్ర పరిణామాలు” ఉంటాయని ట్రంప్ హెచ్చరించారు. ఈ ప్రకటనతో సమావేశానికి ముందే ఉద్రిక్తత పెరిగింది.
అయితే, రష్యా వెనక్కి తగ్గే ఉద్దేశం లేదని ఉక్రెయిన్ అధ్యక్షుడు వోలోడిమిర్ జెలెన్స్కీ అంటున్నారు. పుతిన్ కేవలం “నటిస్తున్నాడని” ఆయన చెప్పారు. రష్యా ఆర్థిక వ్యవస్థపై ఆంక్షలు ప్రభావం చూపిస్తున్నప్పటికీ, వాటిని పట్టించుకోవడం లేదని పుతిన్ చెబుతున్నారని, అది నిజం కాదని జెలెన్స్కీ అన్నారు. యుద్ధానికి ముందు రష్యా తన బలగాలను పెంచుకోవడం, దొనేత్స్క్ ప్రాంతంలోని పోక్రోవ్స్క్ నగరాన్ని స్వాధీనం చేసుకునేందుకు ప్రయత్నించడం వంటివి, సమావేశంలో తన చేతిని పైచేయిగా ఉంచుకోవడానికి చేస్తున్న ప్రయత్నాలని జెలెన్స్కీ అభిప్రాయపడ్డారు.
ఈ కీలక సమావేశానికి ఉక్రెయిన్, ఐరోపా దేశాలను ట్రంప్ పక్కన పెట్టడంపై ఆందోళనలు వ్యక్తమవుతున్నాయి. ఐరోపా నాయకుల అభిప్రాయాలను తెలుసుకోవడానికి జర్మన్ ఛాన్సలర్ ఫ్రీడ్రిచ్ మెర్జ్ వర్చువల్ మీటింగ్ ఏర్పాటు చేశారు. ఇందులో జెలెన్స్కీతో సహా పలువురు ఐరోపా నాయకులు పాల్గొన్నారు. ఈ సమావేశం తర్వాత మాట్లాడిన మెర్జ్, అలస్కా సమ్మిట్‌లో ముఖ్యమైన నిర్ణయాలు వెలువడవచ్చని, అయితే ఐరోపా, ఉక్రెయిన్ భద్రతకు ప్రాధాన్యత ఇవ్వాలని నొక్కి చెప్పారు.
ట్రంప్ కేవలం కాల్పుల విరమణతో సరిపెట్టుకుంటారని, రష్యాకు అనుకూలమైన ఒప్పందాన్ని కుదుర్చవచ్చని ఐరోపా దేశాలు భయపడుతున్నాయి. యుద్ధాన్ని అంతం చేయడానికి ఒత్తిడి తీసుకురావాలని జెలెన్స్కీ ఐరోపా దేశాలను కోరారు. ఉక్రెయిన్ తమ భూభాగాన్ని విడిచిపెట్టడానికి నిరాకరిస్తున్నట్లు ఆయన స్పష్టం చేశారు.
