Beijing Develops Planet-Wide Defence System: ఒకప్పుడు అమెరికా అధ్యక్షులు కలలుగన్న అత్యంత ప్రతిష్టాత్మక సైనిక సాంకేతికతను చైనా ఇప్పుడు నిజం చేసి చూపిస్తోంది. ప్రపంచంలోని ఏ మూల నుంచి దాడి జరిగినా పసిగట్టి, ఎదుర్కోగల ఒక గ్రహవ్యాప్త (Planet-Wide) క్షిపణి రక్షణ వ్యవస్థను చైనా అభివృద్ధి చేసింది. “డిస్ట్రిబ్యూటెడ్ ఎర్లీ వార్నింగ్ డిటెక్షన్ బిగ్ డేటా ప్లాట్‌ఫామ్” అని పిలువబడే ఈ వ్యవస్థ, అమెరికా మాజీ అధ్యక్షుడు డొనాల్డ్ ట్రంప్ ప్రతిపాదించిన ‘గోల్డెన్ డోమ్’ ప్రాజెక్టును పోలి ఉండటం గమనార్హం. సౌత్ చైనా మార్నింగ్ పోస్ట్ నివేదిక ప్రకారం, చైనా ఇప్పటికే ఈ వ్యవస్థ యొక్క వర్కింగ్ ప్రోటోటైప్‌ను మోహరించింది.
ఈ వ్యవస్థ ఇంకా ప్రాథమిక దశలోనే ఉన్నప్పటికీ, ప్రపంచంలో ఎక్కడి నుంచైనా చైనాపైకి ప్రయోగించే వెయ్యి క్షిపణులను ఏకకాలంలో గుర్తించి, ట్రాక్ చేయగల సామర్థ్యం దీనికి ఉందని నివేదికలు చెబుతున్నాయి. అంతరిక్షం, గాలి, సముద్రం, భూమిపై ఉన్న విభిన్న రకాల సెన్సార్ల నెట్‌వర్క్‌ను ఉపయోగించుకుని, శత్రువుల కదలికలను ఇది కంటికి రెప్పలా కాపలా కాస్తుంది.
అమెరికా తీరని కల
ఈ తరహా రక్షణ వ్యవస్థ ఆలోచన అమెరికాకు కొత్తేమీ కాదు. 1983లో, సోవియట్ యూనియన్‌తో ప్రచ్ఛన్న యుద్ధం తారస్థాయిలో ఉన్నప్పుడు, అప్పటి అమెరికా అధ్యక్షుడు రోనాల్డ్ రీగన్ ‘స్ట్రాటజిక్ డిఫెన్స్ ఇనిషియేటివ్’ (SDI) అనే ఒక బృహత్తర పథకాన్ని ప్రకటించారు. దీనిని ప్రపంచం “స్టార్ వార్స్” (నక్షత్ర యుద్ధాలు) అని ముద్దుగా పిలుచుకుంది. “మన దేశంపైకి దూసుకొచ్చే ఖండాంతర బాలిస్టిక్ క్షిపణులను అవి మన తీరానికి చేరకముందే అడ్డగించి, నాశనం చేయగల వ్యవస్థను ఊహించుకోండి” అని రీగన్ ఆనాడు అమెరికన్లను ఉద్దేశించి ప్రసంగించారు.
అయితే, 1991లో సోవియట్ యూనియన్ పతనం కావడంతో, ఈ “స్టార్ వార్స్” ప్రాజెక్ట్ కార్యరూపం దాల్చకుండానే చరిత్రలో కలిసిపోయింది.
ALSO READ: Donald Trump : “భారత్ గొప్ప దేశం”: పాక్ ప్రధాని ముందే ట్రంప్ వ్యాఖ్యలు.. ఏం అన్నారంటే?
సంవత్సరాల తర్వాత, డొనాల్డ్ ట్రంప్ ఈ కలను మళ్ళీ తెరపైకి తెచ్చారు. మే 2025లో, ఆయన అమెరికా కోసం ‘గోల్డెన్ డోమ్’ పేరుతో ఒక బహుళ అంచెల క్షిపణి రక్షణ వ్యవస్థను ప్రతిపాదించారు. రాయిటర్స్ నివేదిక ప్రకారం, దీని అంచనా వ్యయం $175 బిలియన్లు. ఉపగ్రహ ఆధారిత పొరతో పాటు, భూమిపై మూడు రక్షణ పొరలను ఏర్పాటు చేయడం దీని లక్ష్యం. కానీ, ఈ ప్రతిష్టాత్మక ప్రాజెక్టుకు సంబంధించిన స్పష్టమైన సాంకేతిక నిర్మాణం నేటికీ రూపుదిద్దుకోలేదు.
వాస్తవం చేస్తున్న చైనా
అమెరికా ఇంకా ప్రణాళికల దశలోనే ఉండగా, చైనా మాత్రం సైలెంట్‌గా తన పని పూర్తి చేసింది. చైనా పీపుల్స్ లిబరేషన్ ఆర్మీ (PLA) ఈ ప్రపంచవ్యాప్త రక్షణ వ్యవస్థను అభివృద్ధి చేసి, పరీక్షించి, ఇప్పుడు ఒక నమూనాను మోహరించింది. ఇది క్షిపణి ప్రయాణ మార్గాలు, ఆయుధాల రకాలు, అవి నిజమైన వార్‌హెడ్‌లా లేక శత్రువులను తప్పుదోవ పట్టించే డెకాయ్‌లా అనే కీలక సమాచారాన్ని నిజ సమయంలో సేకరించి, ఇంటర్‌సెప్షన్ వ్యవస్థలకు మార్గనిర్దేశం చేస్తుంది.
“ఈ ప్రోటోటైప్ వ్యవస్థ, 1,000 డేటా ప్రాసెసింగ్ టాస్క్‌లను ఏకకాలంలో వివిధ నోడ్స్‌లో పంపిణీ చేసి పూర్తి చేయగలదు,” అని చైనాకు చెందిన ప్రముఖ రక్షణ ఎలక్ట్రానిక్ సిస్టమ్ ఇంజనీరింగ్ కేంద్రమైన నాన్‌జింగ్ రీసెర్చ్ ఇన్‌స్టిట్యూట్ ఆఫ్ ఎలక్ట్రానిక్స్ టెక్నాలజీ శాస్త్రవేత్తలు పేర్కొన్నారు. ఈ పరిశోధన వివరాలు ‘మోడరన్ రాడార్’ అనే చైనీస్ జర్నల్‌లో ప్రచురితమయ్యాయి.
ఈ పరిణామం ప్రపంచ సైనిక సమీకరణాలను మార్చేసే శక్తివంతమైన ముందడుగుగా విశ్లేషకులు భావిస్తున్నారు. ఒకప్పుడు అమెరికా కలగా మిగిలిపోయిన సాంకేతికత, ఇప్పుడు చైనా చేతిలో వాస్తవ రూపం దాల్చడం అంతర్జాతీయంగా తీవ్ర చర్చనీయాంశంగా మారింది.
