US government shutdown flight impact : అగ్రరాజ్యం అమెరికా గగనతలంలో గందరగోళం నెలకొంది. ప్రభుత్వ షట్‌డౌన్ కారణంగా విమానయాన రంగం కుదేలైంది. వరుసగా రెండో రోజు కూడా వెయ్యికి పైగా విమాన సర్వీసులు రద్దు కావడంతో దేశంలోని ప్రధాన విమానాశ్రయాలన్నీ ప్రయాణికులతో కిక్కిరిసిపోయాయి. ముఖ్యంగా ‘థ్యాంక్స్ గివింగ్’ పండుగ సీజన్‌లో ఈ సంక్షోభం తలెత్తడంతో ప్రజలు తీవ్ర ఆందోళన చెందుతున్నారు.
రెండు రోజులు.. రెండు వేలకు పైగా విమానాలు రద్దు : ప్రభుత్వ షట్‌డౌన్ నేపథ్యంలో, ఫెడరల్ ఏవియేషన్ అడ్మినిస్ట్రేషన్ (FAA) ఆదేశాల మేరకు ఎయిర్ ట్రాఫిక్‌ను భారీగా తగ్గించారు. విమానాల రాకపోకలను ట్రాక్ చేసే ‘ఫ్లైట్ అవేర్’ వెబ్‌సైట్ ప్రకారం, శుక్రవారం, శనివారం కలిపి రెండు వేలకు పైగా విమాన సర్వీసులు రద్దయ్యాయి. ముఖ్యంగా నార్త్ కరోలినాలోని ఛార్లోటే, అట్లాంటా, షికాగో, న్యూయార్క్, న్యూజెర్సీ వంటి అత్యంత రద్దీ విమానాశ్రయాల్లో సేవలకు తీవ్ర అంతరాయం కలిగింది. షట్‌డౌన్ ఇలాగే కొనసాగితే, వచ్చే శుక్రవారం నాటికి రద్దయ్యే సర్వీసుల సంఖ్య 10 శాతానికి పెరగొచ్చని ఎఫ్‌ఏఏ హెచ్చరించింది.
సంక్షోభానికి రెండు ప్రధాన కారణాలు : ఈ గందరగోళానికి కేవలం ఎఫ్‌ఏఏ ఆదేశాలు మాత్రమే కారణం కాదు. దాని వెనుక తీవ్రమైన సిబ్బంది కొరత కూడా ఉంది.
జీతాల్లేక.. విధులకు డుమ్మా: ప్రభుత్వ షట్‌డౌన్ కారణంగా, ఎయిర్‌పోర్టుల్లో పనిచేసే ఎయిర్ ట్రాఫిక్ కంట్రోలర్లకు గత నెల రోజులుగా జీతాలు అందడం లేదు. దీంతో చాలామంది సిబ్బంది విధులకు హాజరుకావడం లేదు.
ఒత్తిడితో ఓవర్‌టైమ్: కొందరు సిబ్బంది వేతనం లేకపోయినా, దేశ సేవ కోసం వారానికి ఆరు రోజులు ఓవర్‌టైమ్ డ్యూటీలు చేస్తున్నారని, మరికొందరు కుటుంబ పోషణ కోసం పార్ట్‌టైమ్ ఉద్యోగాలు చేసుకుంటున్నారని ‘నేషనల్ ఎయిర్ ట్రాఫిక్ కంట్రోలర్స్ అసోసియేషన్’ ఆవేదన వ్యక్తం చేసింది.
ప్రయాణికుల ఆందోళన.. ఆర్థిక వ్యవస్థపై ప్రభావం : ప్రస్తుతానికి దేశీయ విమానాలనే ఎక్కువగా రద్దు చేస్తున్నప్పటికీ, ఏ క్షణంలో ఏ విమానం రద్దవుతుందో తెలియక ప్రయాణికులు తీవ్ర గందరగోళానికి, ఆందోళనకు గురవుతున్నారు. ఈ ప్రభావం కేవలం ప్రయాణికులపైనే కాదు, దేశ ఆర్థిక వ్యవస్థపైనా తీవ్రంగా పడుతోంది. అమెరికాలో దాదాపు సగం నిత్యావసర సరుకులు విమానాల ద్వారానే రవాణా అవుతాయి. సర్వీసులు రద్దు కావడంతో సరుకు రవాణా ఛార్జీలు పెరిగి, నిత్యావసరాల ధరలకు రెక్కలొచ్చాయి. ఇది పర్యాటక, తయారీ రంగాలను కూడా తీవ్రంగా దెబ్బతీస్తోంది.
