Nobel Peace Prize Venezuelan ‘Iron Lady’ María: ప్రపంచంలోనే అత్యంత ప్రతిష్టాత్మకమైన నోబెల్ శాంతి బహుమతి-2025, వెనిజులాకు చెందిన విపక్ష నేత మరియా కొరినా మచాడోను వరించింది. దేశంలో ప్రజాస్వామ్య హక్కుల కోసం, నిరంకుశ పాలన నుండి శాంతియుత పరివర్తన కోసం ఆమె చేస్తున్న అలుపెరుగని పోరాటానికి గుర్తింపుగా నార్వేజియన్ నోబెల్ కమిటీ ఈ పురస్కారాన్ని శుక్రవారం ప్రకటించింది. “వెనిజులా ఐరన్ లేడీ”గా ప్రసిద్ధి చెందిన మచాడో, ప్రస్తుతం దేశాధ్యక్షుడు నికోలస్ మదురో ప్రభుత్వ నిరంకుశ పోకడల నుంచి తప్పించుకోవడానికి గత 14 నెలలుగా అజ్ఞాతంలో జీవిస్తున్నారు.

ఈ ఏడాది నోబెల్ శాంతి బహుమతి ఎంపిక అత్యంత ఆసక్తికరంగా మారింది. అమెరికా మాజీ అధ్యక్షుడు డొనాల్డ్ ట్రంప్ వంటి వారు బహిరంగంగా ప్రచారం చేసుకుంటున్న తరుణంలో, నోబెల్ కమిటీ ఎటువంటి రాజకీయ వివాదాలకు తావివ్వకుండా, ప్రజాస్వామ్య పరిరక్షణకు పాటుపడుతున్న ధైర్యశాలిని ఎంపిక చేసి తన గౌరవాన్ని నిలబెట్టుకుంది. మచాడో ఎంపిక ఒకేసారి సురక్షితమైనది, తెలివైనది కూడా. ఇది ప్రపంచవ్యాప్తంగా క్షీణిస్తున్న ప్రజాస్వామ్య విలువలను తిరిగి గుర్తుచేయడమే కాకుండా, స్వేచ్ఛ కోసం పోరాడేవారికి నైతిక స్థైర్యాన్ని ఇచ్చే చర్యగా విశ్లేషకులు భావిస్తున్నారు.

ఎవరీ మరియా కొరినా మచాడో?

1967లో జన్మించిన మచాడో, ఇంజనీరింగ్ మరియు ఫైనాన్స్‌లో ఉన్నత విద్యను అభ్యసించారు. రాజకీయాల్లోకి రాకముందు, ఆమె 1992లో అనాథ పిల్లల సంరక్షణ కోసం ‘ఎటీనా ఫౌండేషన్’ స్థాపించి సామాజిక సేవలో పాల్గొన్నారు. 2002లో, దేశంలో స్వేచ్ఛాయుత, నిష్పక్షపాత ఎన్నికల కోసం ‘సుమేట్’ అనే సంస్థను సహ-స్థాపించి, ఓటర్లలో చైతన్యం తీసుకురావడంలో కీలక పాత్ర పోషించారు.

ALSO READ: Nobel Prize : శాంతి శిఖరంపై అగ్రరాజ్యం – నోబెల్ గెలుచుకున్న అమెరికా అధ్యక్షులు!

2010లో, రికార్డు స్థాయి ఓట్లతో మారియా జాతీయ అసెంబ్లీకి ఎన్నికయ్యారు. పార్లమెంటులో, ఆమె హ్యూగో చావెజ్, ఆ తర్వాత నికోలస్ మదురో ప్రభుత్వాల అక్రమాలను, మానవ హక్కుల ఉల్లంఘనలను, ఆర్థిక దుర్వినియోగాన్ని తీవ్రంగా విమర్శించారు. మారియా వాగ్ధాటికి తట్టుకోలేక, 2014లో అమెరికాలో వెనిజులా మానవ హక్కుల ఉల్లంఘనలపై మాట్లాడినందుకు, ఆమెను పార్లమెంట్ పదవి నుంచి అక్రమంగా బహిష్కరించారు.

అయినా ఆమె వెనకడుగు వేయలేదు. 2013లో ‘వెంటే వెనిజులా’ అనే ఉదారవాద పార్టీని స్థాపించారు. 2024 అధ్యక్ష ఎన్నికలలో పోటీ చేయకుండా ప్రభుత్వం ఆమెపై నిషేధం విధించినప్పుడు కూడా, ఆమె ప్రతిపక్ష అభ్యర్థి ఎడ్ముండో గొంజాలెజ్‌కు మద్దతు పలికారు. వివాదాస్పద ఎన్నికల తర్వాత, ప్రభుత్వం ఆమెపై దేశద్రోహం, కుట్ర వంటి ఆరోపణలు మోపడంతో ఆమె అజ్ఞాతంలోకి వెళ్లాల్సి వచ్చింది.

నోబెల్ కమిటీ ప్రకారం, శాంతి అంటే కేవలం యుద్ధం లేకపోవడం మాత్రమే కాదు, పౌరులు స్వేచ్ఛ, గౌరవం, హక్కులతో జీవించగలగడం కూడా. ప్రపంచవ్యాప్తంగా నిరంకుశత్వం పెరుగుతున్న ఈ తరుణంలో, మచాడో వంటి ప్రజాస్వామ్య యోధురాలిని గౌరవించడం ద్వారా, శాంతికి, స్వేచ్ఛకు ఉన్న విడదీయరాని సంబంధాన్ని నోబెల్ కమిటీ పునరుద్ఘాటించింది. ఈ పురస్కారం కింద 11 మిలియన్ స్వీడిష్ క్రోనార్ల నగదు బహుమతిని అందిస్తారు. డిసెంబర్ 10న ఓస్లోలో జరిగే కార్యక్రమంలో ఈ అవార్డును ప్రదానం చేస్తారు.

ALSO READ: Nobel Prize: నోబెల్‌ బహుమతిలో అసలు ఏముంటుంది.. ఇంట్రెస్టింగ్‌ విషయాలు.!!