ఉరుములు, మెరుపులు వస్తున్నప్పుడు బయటకి వెళ్లకూడదని మనందరికి తెలుసు. పొడవైన చెట్ల కిందకి వెళ్లొద్దని చెబుతారు. కానీ ఇంట్లోనూ ఉన్నా, కొన్ని పనులు చేయకూడదని నిపుణులు హెచ్చరిస్తున్నారు. వాటిలో ముఖ్యమైనదే స్నానం చేయడం. ఉరుములతో కూడిన వర్షం పడుతున్న సమయంలో బాత్రూమ్ సురక్షితమని భావించడం ఒక అపోహ మాత్రమే. అమెరికా కేంద్ర ఆరోగ్య నియంత్రణ సంస్థ CDC తెలిపిన వివరాల ప్రకారం, వర్ష సమయంలో స్నానం చేయడం లేదా నీటితో సంబంధం ఉన్న పనులు చేయడం చాలా ప్రమాదకరం.
మెరుపు భూమిపై పడినప్పుడు అది భవనాలపైకి కూడా పడొచ్చు. ఆ విద్యుత్ భారంగా ఉండే మెరుపు, ఇల్లంతా విస్తరించేందుకు లోపల ఉన్న వైర్లను, పైపులను వాడుతుంది. ముఖ్యంగా నీరు, లోహపు పైపులు విద్యుత్‌ను చక్కగా తీసుకెళ్లగల సామర్థ్యం కలిగి ఉంటాయి. మీరు స్నానంలో ఉంటే లేదా సింక్ వాడుతున్నప్పుడు, మీరు ఆ విద్యుత్ ప్రవాహానికి ఒక భాగం అయిపోతారు. దాంతో ప్రమాదం తీవ్రంగా ఉంటుంది. నేషనల్ వెదర్ సర్వీస్ ప్రకారం, అమెరికాలో ప్రతి సంవత్సరం వందలాది పిడుగుపాటు కేసులు నమోదవుతున్నాయి. వీటిలో కొన్ని ఇంటి లోపల జరిగినవే కావడం గమనార్హం. ప్లాస్టిక్ పైపులు ఉన్నా, వాటిలో నీరు ఉండడం వల్ల విద్యుత్ పారుతుంది. ఆ అతి తక్కువ అవకాశమే సరిపోతుంది ప్రమాదం జరగడానికి.
ఉరుములతో కూడిన వర్షం సమయంలో బాత్రూమ్ లేదా సింక్ వాడకండి. ఎలక్ట్రానిక్ పరికరాలను వీలైనంతవరకు తాకవద్దు. కిటికీలు, తలుపులు, కాంక్రీట్ గోడలకు దూరంగా ఉండండి. డిష్‌వాషర్, వాషింగ్ మెషీన్ వంటి నీటి సంబంధిత పరికరాల నుండి దూరంగా ఉండండి. CDC తెలిపిన విధంగా, మెరుపు కనిపించిన 30 సెకన్ల లోపు ఉరుము వినిపిస్తే, అది మీ దగ్గరలోనే పిడుగు పడే అవకాశం ఉందని అర్థం. చివరి ఉరుము విన్న తర్వాత కనీసం 30 నిమిషాల వరకూ నీటితో సంబంధం ఉన్న పనుల్ని ప్రారంభించొద్దు. ఉరుములు, మెరుపులు ప్రకృతి చూపే అద్భుతాలు కావచ్చు. కానీ అవి ప్రమాదకరమైనవిగా కూడా మారుతాయి. జాగ్రత్తగా ఉండటం వల్లే మన జీవితం సురక్షితంగా ఉంటుంది.
