శరీరంలోని ప్రతి అవయవానికీ ఒక ప్రత్యేకత ఉన్నట్లే, మనం పనులకు ప్రాధాన్యం ఇచ్చే చేతి వెనుక కూడా గొప్ప సైన్స్ దాగి ఉంది. తరతరాలుగా సామాజిక అపోహలు, సాంప్రదాయ పరిమితుల నడుమ నిలిచిన ఒక శారీరక విధానం, కాలక్రమేణా ఎంతోమంది విజేతలకు ఆభరణంగా మారింది. కేవలం సంప్రదాయ నమ్మకాలకే పరిమితం కాకుండా, శాస్త్రీయ దృక్కోణం నుంచి మెదడు అద్భుతాలను, విలక్షణ ప్రతిభావంతుల విశేషాలను వెలుగులోకి తెచ్చే సమగ్ర కథనం. మన సమాజంలో కుడి చేతికి ప్రాధాన్యం ఇవ్వడం, శుభకార్యాలకు దాన్ని మాత్రమే వాడటం అనవాయితీ. ఎడమ చేతితో నీళ్లు ఇచ్చినా తీసుకోని పరిస్థితులు నేటికీ సమాజంలో చూస్తూ ఉంటాం. అయితే, ఎడమ చేతి వాటం అనేది ఏదో విచిత్రమైన విషయమో లేదా అశుభమో కాదని, దీని వెనుక ఒక ఆసక్తికరమైన మెదడు సైన్స్ దాగి ఉందని నిపుణులు స్పష్టం చేస్తున్నారు.
విభిన్న నమ్మకాలు
చారిత్రకంగా కొన్ని నాగరికతల్లో ఎడమ చేతి వాటం ఉన్న వారిని అశుభంగా భావించేవారు. అయితే, సౌత్ ఆఫ్రికాకు చెందిన ‘ఇంకా’ వంటి పురాతన నాగరికతల్లో వీరికి ప్రత్యేక స్థానం ఇచ్చేవారు. ఎడమ చేతి వాటం ఉన్న వారికి ఆధ్యాత్మిక శక్తులు ఉంటాయని నమ్మేవారు. ఉత్తర అమెరికాకు చెందిన ‘జూనీ’ తెగ ప్రజలు వీరిని గొప్ప అదృష్టవంతులుగా పరిగణించేవారు. ప్రపంచవ్యాప్తంగా ప్రతి పది మందిలో ఒక్కరు అంటే 10 శాతం మాత్రమే ఎడమ చేతి వాటం కలిగి ఉంటారు. పాఠశాల తరగతి గదిలో ఇద్దరు లేదా ముగ్గురు పిల్లలు బంతి విసరడానికో, రాయడానికో ఎడమ చేతిని ఉపయోగించడం మనం గమనించవచ్చు.
ఏడు మిలియన్ల సంవత్సరాల చరిత్ర
మానవ పరిణామ క్రమంలో అనాదిగా కుడి చేతినే ఎక్కువగా ఉపయోగించారు. మన పూర్వీకులు రాళ్లు విసరడం, పండ్లు సేకరించడం వంటి పనులకు ఏడు మిలియన్ల సంవత్సరాల నుంచి కుడి చేతిపైనే ఎక్కువ ఆధారపడ్డారు.
మెదడు పనితీరు
ఒకే చేతితో పని చేయడం వెనుక మెదడు సమర్థత దాగి ఉంది. ఒకే చేతిని నిరంతరం వాడటం వల్ల మెదడు ఆ పనికి త్వరగా ట్యూన్ అవుతుంది. పదేపదే చేతిని మారుస్తూ ఉంటే, ఆ పని నేర్చుకోవడానికి మెదడుకు ఎక్కువ సమయం పడుతుంది. అందుకే ఏదో ఒక చేతికి ప్రాధాన్యం ఇవ్వమని మెదడు ఆదేశిస్తుంది. బంతిని తన్నడానికి ఒక పర్టిక్యులర్ కాలునే ఉపయోగించడం వెనుక కూడా ఇదే సూత్రం ఉంది.
న్యూరోలాజికల్ సంబంధం
మానవ మెదడు కుడి, ఎడమ అనే రెండు భాగాలుగా విభజించబడి ఉంటుంది. మాట్లాడే సామర్థ్యం, చిత్రలేఖనం, గణితం వంటి నైపుణ్యాలను మెదడులోని భాగాలు నియంత్రిస్తాయి. సాధారణంగా మాట్లాడే సామర్థ్యాన్ని నియంత్రించే మెదడు భాగమే రాయడం, బొమ్మలు వేయడం, బంతి విసరడం వంటి పనులను కూడా నిర్దేశిస్తుంది. మాట్లాడే శక్తిని మెదడు ఎడమ భాగం నిర్ణయిస్తే, ఆ వ్యక్తి సాధారణంగా కుడి చేతి వాటం కలిగి ఉంటాడు.
ముందే తెలిసే సంకేతాలు
ఏ చేతిని వాడాలనేది మన చేతుల్లో ఉండే విషయం కాదు. ఇది పూర్వీకుల నుంచి సంక్రమించే జన్యుపరమైన అంశాలపై ఆధారపడి ఉంటుంది. ఒకే రకమైన జన్యువులు ఉండే ఐడెంటికల్ ట్విన్స్ కూడా ఒకరు కుడి, మరొకరు ఎడమ చేతి వాటం కలిగి ఉండే అవకాశం ఉంది. పిల్లలు ఏ చేతి వాటం కలిగి ఉన్నారో తెలుసుకోవడానికి తల్లిదండ్రులకు దాదాపు రెండు సంవత్సరాల సమయం పడుతుంది. శాస్త్రవేత్తలు పిల్లలు పుట్టక ముందే వారు ఏ చేతి వాటం కలిగి ఉంటారో కచ్చితంగా అంచనా వేయగలరు. ఎడమ చేతి వాటం కలిగి ఉండటంలో ఎలాంటి తప్పు లేదు. అది కేవలం మెదడు నిర్మాణం, జన్యువుల సమన్వయం వల్ల కలిగే ఒక సహజమైన శారీరక వైవిధ్యం. ప్రపంచవ్యాప్తంగా ఉన్న ఈ 10 శాతం మంది ప్రత్యేకతను గుర్తించి, వారిని గౌరవించడానికి ప్రతి సంవత్సరం ఆగస్టు 13న ‘ప్రపంచ ఎడమ చేతి వాటం దినోత్సవం’ నిర్వహిస్తున్నారు.
ఎడమ చేతి వాటం అనేది కేవలం ఒక అలవాటు మాత్రమే కాదు. అది వినూత్న సృజనాత్మకతకు, విశ్లేషణాత్మక ఆలోచనా ధోరణికి సంకేతం. క్రీడల నుంచి వ్యాపారం వరకు వివిధ రంగాలలో తమ అసమాన ప్రతిభతో అత్యున్నత శిఖరాలను అధిరోహించి, సమాజంపై చెరగని ముద్ర వేసిన భారతీయ ప్రముఖులు చాలా మంది ఉన్నారు.
క్రీడారంగం
సచిన్ టెండూల్కర్: ఈయన బ్యాటింగ్, బౌలింగ్ కుడి చేతితో చేసినప్పటికీ, రాయడం, సంతకం చేయడం మరియు ఇతర రోజువారీ పనులన్నీ ఎడమ చేతితోనే చేస్తారు.
సౌరవ్ గంగూలీ: భారత క్రికెట్ చరిత్రలో అత్యంత విజయవంతమైన ఎడమ చేతి బ్యాట్స్మెన్ మరియు కెప్టెన్లలో ఒకరు.
శిఖర్ ధావన్, రవీంద్ర జడేజా, గౌతమ్ గంభీర్, యువరాజ్ సింగ్: భారత క్రికెట్కు ఎన్నో కీలక విజయాలు అందించిన ప్రముఖ ఎడమ చేతి వాటం ఆటగాళ్లు.
సినిమా & వినోద రంగం
అమితాబ్ బచ్చన్: భారతీయ చలనచిత్ర రంగానికి చెందిన మహానటుడు ఎడమ చేతి వాటం కలిగినవారే.
కమల్ హాసన్: బహుముఖ ప్రజ్ఞాశాలి అయిన నటుడు కమల్ హాసన్ ఎడమ చేతి వాటం ఉన్నవారు.
కరణ్ జోహార్: బాలీవుడ్ ప్రముఖ దర్శకుడు, నిర్మాత.
అభయ్ డియోల్: ప్రముఖ నటుడు.
రాజకీయాలు: వ్యాపార రంగం
నరేంద్ర మోదీ: భారత ప్రధాని నరేంద్ర మోదీ రాయడానికి ఎడమ చేతిని ఉపయోగిస్తారు.
రతన్ టాటా: భారతదేశపు అత్యంత ఆదరణ పొందిన పారిశ్రామికవేత్త, టాటా గ్రూప్ మాజీ ఛైర్మన్ రతన్ టాటా ఎడమ చేతి వాటం కలిగినవారు.
ఇతర రంగాలు
మహాత్మా గాంధీ: జాతిపిత మహాత్మా గాంధీ రెండు చేతులతో రాయగలిగే నైపుణ్యం కలిగి ఉన్నప్పటికీ, ఎడమ చేతిని ఎక్కువగా ఉపయోగించేవారు.
ఎడమ చేతి వాటం అనేది సృజనాత్మకత, వినూత్న ఆలోచనా ధోరణి మరియు విశ్లేషణాత్మక నైపుణ్యాలకు సంకేతమని చెప్పడానికి ఈ ప్రముఖుల జీవితాలే ఉదాహరణ.
వీరు ప్రత్యేకం
ప్రపంచ జనాభాలో కేవలం 10 శాతం మంది మాత్రమే ఉండే ఎడమ చేతి వాటం వ్యక్తులు తమ విలక్షణమైన మెదడు నిర్మాణం, ఆలోచనా సరళితో ప్రత్యేక ముద్ర వేస్తారు. ఇది ప్రకృతి ప్రసాదించిన ఒక ‘న్యూరోలాజికల్ గిఫ్ట్’.
వైజ్ఞానిక ప్రయోజనాలు
వినూత్న ఆలోచనా ధోరణి: మెదడులోని కుడి, ఎడమ భాగాల మధ్య వేగవంతమైన సమాచార మార్పిడి వల్ల వీరు ఒక సమస్యను పలు కోణాల్లో విశ్లేషించి పరిష్కరిస్తారు.
సృజనాత్మకత, కళాత్మకత: మెదడులోని కుడి భాగం చురుగ్గా పనిచేయడం మూలంగా సంగీతం, నటన, చిత్రలేఖనం, డిజైనింగ్ వంటి రంగాలలో అసాధారణ ప్రతిభ చూపుతారు.
క్రీడలలో సహజ ఆధిక్యత: క్రికెట్, టెన్నిస్, బాక్సింగ్ వంటి ఆటలలో వీరి షాట్లు, బంతి విసిరే కోణాలను ఊహించడం కుడి చేతి వాటం ప్రత్యర్థులకు కష్టంగా ఉంటుంది.
మల్టీటాస్కింగ్ సామర్థ్యం: వీరిలోని సంకేత వ్యవస్థ వేగంగా పనిచేయడం వల్ల ఒకే సమయంలో బహుళ పనులను సమర్థవంతంగా చేయగలరు.
పరిస్థితులకు అనుగుణంగా మారే తత్వం: సమాజంలో ఎక్కువ వస్తువులు కుడి చేతి వాటం వారి కోసం తయారైనప్పటికీ, వాటిని ఉపయోగించే క్రమంలో వీరు రెండు చేతులను వాడటం అలవాటు చేసుకుని సర్దుబాటు తత్వాన్ని పెంపొందించుకుంటారు.
గణితం, విశ్లేషణ: సంక్లిష్టమైన గణిత సమస్యలను సాధించడంలో, వేగవంతమైన నిర్ణయాలు తీసుకోవడంలో వీరు ముందంజలో ఉంటారు.
ఎడమ చేతి వాటం అనేది లోపం కాదు, అది ఒక ప్రత్యేకమైన సహజ సిద్ధమైన నైపుణ్యం. చరిత్ర నుంచి వర్తమానం వరకు ఎందరో శాస్త్రవేత్తలు, నాయకులు, కళాకారులు ఈ ప్రత్యేకతతోనే ప్రపంచాన్ని ప్రభావితం చేశారు.