ఇటీవలకాలంలో పిల్లల్లో స్థూలకాయం (Obesity) గణనీయంగా పెరుగుతోంది. చిన్నారుల వయస్సులోనే బరువు పెరగడం ప్రస్తుతం సాధారణ విషయంగా మారిపోతోంది. అయితే దీని వెనుక ఉన్న అసలైన కారణాలు పరిశీలిస్తే, ఇవేవీ సహజంగా ఏర్పడినవి కావు. పిల్లల జీవనశైలిలో మార్పులు, తల్లిదండ్రుల అలవాట్లు, సమాజంలో మారుతున్న ఆహారపరమైన ప్రాధాన్యతలు దీనికి మౌలిక కారణాలుగా మారాయి. రోజు రోజుకూ శారీరక కదలికలు తగ్గిపోతుండటం, ఆటలు ఆడే కాలం స్క్రీన్‌ల ముందు గడిపే సమయంగా మారిపోవడం, తక్కువ పోషక విలువలు కలిగిన ఫాస్ట్ ఫుడ్, ప్రాసెస్డ్ ఫుడ్ వినియోగం పెరగడం వంటి అంశాలు పిల్లల్లో స్థూలకాయాన్ని ప్రోత్సహిస్తున్నాయి.
తోటి పిల్లలతో ఆడటానికి బదులు.. మొబైల్ ఫోన్లు, టాబ్లెట్లు పిల్లల ఆటలుగా మారాయి. కుటుంబాల బిజీ జీవనశైలీ వల్ల ఇంటి ఆహారం కన్నా హోటల్ లేదా రెడీమేడ్ ఫుడ్ వైపు మళ్లిపోతున్నారు. ఇవి అధిక ఫ్యాట్, చక్కెర, ఉప్పు కలిగి ఉండడంతో శరీరానికి ముప్పుగా మారుతున్నాయి. పిల్లలు ఇక తమకు మేలు చేసే ఆహారమేంటో కూడా గ్రహించలేని పరిస్థితిలోకి వెళ్లిపోతున్నారు. తల్లిదండ్రులు కూడా బిజీ జీవితానికి లోనై, సరైన పర్యవేక్షణ లేకుండా పిల్లలను పెంచడం వల్ల, వారు తీసుకునే ఆహారంపై నియంత్రణ కోల్పోతున్నారు.
ఇలాంటి సమయంలో పిల్లలు ఆరోగ్యంగా ఉండాలంటే తల్లిదండ్రులే ముందుగా మారాలి. తాము తినే ఆహారాన్ని మార్చాలి, వారితో కలిసి ఆరోగ్యకరమైన అలవాట్లు పెంపొందించాలి. ఉదయం వాకింగ్‌లు, ఇంట్లో కుటుంబ సభ్యులతో కలిసి కూర్చుని భోజనం చేయడం, వారిని ఆటలవైపు ప్రోత్సహించడం వంటి మార్పులు పిల్లలపై బలమైన ప్రభావం చూపుతాయి.
బలవంతంగా ఆహారం నిరోధించటం కాకుండా, ఆరోగ్యకరమైన ఆహారం గురించి అవగాహన కల్పించాలి. పిల్లలకు ఎక్కువ ఆత్మవిశ్వాసం ఇచ్చేలా, తక్కువ ఒత్తిడితో సరైన జీవనశైలిని నేర్పించాలి. ఈ మార్పులు ఒక్కరోజులో జరగవు, కానీ ఓర్పుతో, క్రమశిక్షణతో కొనసాగితే పిల్లలు ఆరోగ్యంగా పెరుగుతారు. తల్లిదండ్రుల పాత్ర ఇందులో అత్యంత కీలకం. వారు మారితే పిల్లలు మారతారు. వారే పిల్లలకు ఆరోగ్యమయమైన భవిష్యత్తుకు నాందిగా నిలుస్తుంది.