A1 Ghee VS A2 Ghee: మార్కెట్లో పాలు, పెరుగు, నెయ్యి వంటి పాడి ఉత్పత్తులు కొనుగోలు చేసే వారు, వాటి ప్యాకింగ్‌పై A1 లేదా A2 అని రాసి ఉండటాన్ని గమనించి ఉంటారు. ముఖ్యంగా A2 అనే పదంతో ఉన్న ఉత్పత్తులను కంపెనీలు ఆరోగ్యానికి మేలు చేస్తాయని చెప్పి ఎక్కువ ధరకు విక్రయిస్తున్నాయి. సాధారణ నెయ్యి కిలో ధర వెయ్యి రూపాయలు కు పైగా ఉండగా, A2 నెయ్యి ధర మూడు వేల రూపాయల వరకు చేరుతుంది. దీనిలో ఒమేగా-3 కొవ్వు ఆమ్లాలు, సంయోగ లినోలెయిక్ ఆమ్లం (CLA), విటమిన్లు A, D, E, K లాంటి పోషకాలు ఎక్కువగా ఉంటాయని నిపుణులు చెబుతున్నారు.

నియమావళికి వ్యతిరేకమని..

అయితే, భారత ఆహార భద్రత, ప్రమాణాల ప్రాధికార సంస్థ (FSSAI) ఈ తరహా లేబులింగ్‌పై కఠిన హెచ్చరిక జారీ చేసింది. A1 లేదా A2 అనే ట్యాగ్‌లతో పాలు, పెరుగు, నెయ్యి అమ్మడం ఆహార భద్రత, ప్రమాణాల చట్టం 2006, దాని నియమావళికి వ్యతిరేకమని స్పష్టం చేసింది. వినియోగదారులను తప్పుదారి పట్టించే విధంగా ఈ లేబుల్స్ ఉపయోగించకూడదని సూచించింది.

A2 నెయ్యి అంటే ఏమిటి..

A2 నెయ్యి అంటే ఏమిటి అనే ప్రశ్న చాలా మందికి వస్తుంది. కంపెనీల ప్రకారం, ఇది ప్రధానంగా భారతీయ దేశీ ఆవుల పాల నుండి తయారవుతుంది. ఈ పాలలో సహజంగా ఉండే A2 బీటా-కేసిన్ అనే ప్రోటీన్, యూరోపియన్ జాతి ఆవుల పాలలో ఉండే A1 బీటా-కేసిన్‌తో భిన్నంగా ఉంటుంది. ఈ ప్రోటీన్ శరీరానికి సులభంగా జీర్ణమవుతుంది.కొంతమందికి శరీరంలోని మంటను తగ్గించడంలో కూడా ఉపకరిస్తుంది.

సూపర్ ఫుడ్…

A2 నెయ్యి ప్రయోజనాల గురించి కూడా తయారీదారులు విస్తృతంగా ప్రచారం చేస్తున్నారు. వారి మాటల్లో, ఇది జీర్ణక్రియను మెరుగుపరుస్తుంది, రోగనిరోధక శక్తిని పెంచుతుంది, చర్మం ఆరోగ్యాన్ని మెరుగుపరుస్తుంది, గుండెకు కూడా మంచిదని చెబుతున్నారు. ఈ కారణంగా దీనిని “సూపర్ ఫుడ్” అని పిలుస్తున్నారు.

బీటా-కేసిన్ ప్రోటీన్…

A1, A2 నెయ్యి మధ్య తేడా ప్రధానంగా బీటా-కేసిన్ ప్రోటీన్ రకంలోనే ఉంటుంది. పాలు తయారవుతున్న ఆవుల జాతి ఆధారంగా ఇందులో మార్పులు ఉంటాయి. ఆవు పాలలో 95 శాతం ప్రోటీన్ భాగం కేసిన్, పాలవిరుగుడు ప్రోటీన్లతో ఏర్పడుతుంది. ఈ కేసిన్‌లో బీటా-కేసిన్ ప్రోటీన్ ముఖ్యమైన భాగం. ఇందులో రెండు రకాలుంటాయి – A1, A2. యూరోపియన్ ఆవుల పాలలో A1 ఎక్కువగా ఉంటే, భారతీయ దేశీ ఆవుల పాలలో A2 అధికంగా ఉంటుంది.

A2 నెయ్యి కోసం ఉపయోగించే పాలు ప్రత్యేక జాతి దేశీ ఆవుల నుండే సేకరిస్తారు. ఈ పాలను మొదట పెరుగు చేయించి, తరువాత నెయ్యిగా మార్చుతారు. ఈ ప్రక్రియలో రసాయనాలు ఉపయోగించరని కొన్ని కంపెనీలు చెబుతున్నాయి. అయితే, ఈ ఉత్పత్తి ధర ఎక్కువగా ఉండటానికి కారణం దేశీ ఆవుల పాల ఉత్పత్తి తక్కువగా ఉండటం, తయారీ ప్రక్రియ ఎక్కువ ఖర్చుతో సాగడం.

Also Read:https://teluguprabha.net/health-fitness/daily-amla-for-15-days-brings-impressive-health-benefits/

అయితే, ఈ ఉత్పత్తులపై ఉండే ఆరోగ్య సంబంధిత ప్రకటనలు నిజమా కాదా అన్న విషయంలో నిపుణులు మిశ్రమ అభిప్రాయాలు వ్యక్తం చేస్తున్నారు. కొంతమంది పోషక నిపుణులు, A2 ప్రోటీన్ జీర్ణక్రియకు కొంత సులభమని అంగీకరించినప్పటికీ, సాధారణంగా ఆరోగ్యకరమైన జీవనశైలి, సమతుల్య ఆహారం తీసుకోవడం ముఖ్యమని చెబుతున్నారు.

FSSAI మాత్రం స్పష్టంగా చెబుతోంది – A1, A2 అనే లేబుల్స్ వినియోగదారులకు తప్పుదారి పట్టించేలా ఉపయోగించరాదు. ఎలాంటి పాల ఉత్పత్తి అయినా, దాని తయారీ విధానం, మూలం, పోషక విలువలపై నిజమైన సమాచారం మాత్రమే ఇవ్వాలి.

Also Read: https://teluguprabha.net/lifestyle/raksha-bandhan-2025-auspicious-time-and-vastu-rules-full-details/

ఈ నిర్ణయం పాడి పరిశ్రమపై కొంత ప్రభావం చూపే అవకాశం ఉంది. ముఖ్యంగా A2 నెయ్యి, పాలు, పెరుగు వంటి ఉత్పత్తులను విక్రయిస్తున్న కంపెనీలు తమ మార్కెటింగ్ పద్ధతులను మార్చుకోవాల్సి ఉంటుంది. వినియోగదారులు కూడా ఉత్పత్తి కొనుగోలు చేసే ముందు దాని మూలం, తయారీ విధానం, అసలు పోషక విలువలను పరిశీలించడం అవసరం.