Corporate Education:మనం ఉదయం లేచినప్పటి నుంచి రాత్రి పడుకునే వరకు తీసుకునే చాలా నిర్ణయాలు మనవి కావు, మార్కెట్ మనచేత తీసుకునేలా చేస్తుంది. మన మనసులోని ఆశలు, భయాలు, అభద్రతా భావాలే కొందరికి కోట్లాది రూపాయల సంపాదనకు ఇంధనంగా మారుతున్నాయి. సమాజంలో ప్రతి ఒక్కరూ మెరుగైన జీవితం కోరుకోవడం నూటికి నూరు పాళ్లు సహజం. సరిగ్గా ఈ ఆరాటాన్నే వ్యాపారులు తమకు అనుకూలమైన పెట్టుబడిగా మలుచుకుంటున్నారు. మనుషుల బలహీనతలను సొమ్ము చేసుకోవడం నేడు ఒక భారీ పరిశ్రమగా మారిపోయింది.
మనిషికి ఆశ ఉండటం తప్పు కాదు. మంచి జీవితం కోరుకోవడం, పిల్లలు బాగా చదవాలని కలలు కనడం, కుటుంబం ఆరోగ్యంగా ఉండాలని అనుకోవడం సహజమైన కోరికలు. ఇవే మనిషిని ముందుకు నడిపిస్తాయి. అయితే మన ఆశను, భయాన్ని, అవసరాన్ని గుర్తించి దానినే ఒక బిజినెస్ మోడల్గా మార్చుకోవడం ప్రమాదకరమైన దోపిడీ. నేటి సమాజంలో కొందరు వ్యక్తులు, సంస్థలు ప్రజల భావోద్వేగాలను అర్థం చేసుకుని కోట్లు సంపాదిస్తున్నారు. ఇది కేవలం మోసం కాదు, మనిషి మనస్తత్వాన్ని మార్కెటింగ్ చేయడం.
పెరిగిన ఆందోళనే భారీ ఆదాయం
తల్లిదండ్రులకు అత్యంత సున్నితమైన అంశం పిల్లల చదువు. ‘ఈ కార్పొరేట్ స్కూల్లో వేయకపోతే మీ పిల్లాడు వెనుకబడిపోతాడు’, ‘ఈ కోచింగ్ లేకపోతే పోటీ పరీక్షల్లో నిలబడలేడు’ అని భయపెట్టడం ద్వారా వారిని ఒత్తిడికి గురిచేస్తున్నారు. పిల్లల భవిష్యత్తుపై ఉన్న ఆందోళనను ఆసరాగా చేసుకుని, స్తోమతకు మించి ఖర్చు చేసేలా చేస్తున్నారు. విద్య అనేది అవసరమైన పెట్టుబడే కావచ్చు, కానీ తల్లిదండ్రుల భయాన్ని ఆసరాగా చేసుకుని ప్రతి అవసరాన్ని తప్పనిసరి ఖర్చుగా మార్చడం ప్రశ్నించాల్సిన విషయం.
కార్పొరేట్ చదువుల పేరుతో భయాందోళనలు, కోట్ల వ్యాపారం
నేటి సమాజంలో తల్లిదండ్రులకు ఉన్న అతిపెద్ద బలహీనత, ఆందోళన పిల్లల భవిష్యత్తు. ‘మీ పిల్లాడు రేపటి పోటీ ప్రపంచంలో నిలబడగలడా?’, ‘మిగతా పిల్లల కంటే వెనుకబడిపోతే ఎలా?’ అనే ప్రశ్నలు ప్రతి తల్లిదండ్రి మనసులో నిరంతరం మెదులుతూనే ఉంటాయి. సరిగ్గా ఈ మానసిక ఆందోళననే కార్పొరేట్ విద్యాసంస్థలు తమ వ్యాపారానికి ప్రధాన పెట్టుబడిగా మార్చుకున్నాయి. చదువును ఒక సాధనంగా కాక, భయాన్ని విక్రయించే ఒక భారీ మార్కెట్ నెట్వర్క్గా మార్చేశాయి.
భయాన్ని నూరిపోసే మార్కెటింగ్ వ్యూహాలు
పిల్లలకు మూడో తరగతి, నాలుగో తరగతి నుంచే ‘ఐఐటీ ఫౌండేషన్’, ‘నీట్ ఒలింపియాడ్’ పేరుతో ప్రత్యేక కోచింగ్ల అవసరం ఉందంటూ ప్రచారం మొదలుపెడతారు. ‘ఈ వయసులోనే మొదలుపెట్టకపోతే మీ పిల్లాడు అందరికంటే వెనుకబడిపోతాడు’, ‘ర్యాంకులు సాధించడం అసాధ్యం’ అనే మాటలతో తల్లిదండ్రుల్లో తీవ్ర అభద్రతా భావాన్ని నూరిపోస్తారు. పక్కంటి పిల్లాడు కార్పొరేట్ స్కూల్లో చేరాడని, తమ పిల్లాడు కూడా అక్కడే చదవకపోతే జీవితం నాశనమవుతుందేమోననే భయం తల్లిదండ్రులను తొందరపాటు నిర్ణయాలు తీసుకునేలా చేస్తుంది.
మనం ఏం గ్రహించాలి?
మంచి చదువు చెప్పించడం బాధ్యతే, కానీ భయాందోళనలతో కార్పొరేట్ సంస్థలు చెప్పే ప్రతిదానిని నమ్మడం సరైనది కాదు. మార్కులు, ర్యాంకులు మాత్రమే జీవితం కాదని, పిల్లల్లో ఉన్న ప్రతిభను, మానసిక వికాసాన్ని గుర్తించడం ముఖ్యం. కార్పొరేట్ సంస్థలు సృష్టించే కృత్రిమ భయానికి లోనుకాకుండా, పిల్లల శక్తియుతులకు తగినట్లుగా సరైన నిర్ణయాలు తీసుకోవాలి.
భయపట్టే మార్కెటింగ్
ఆరోగ్యం కంటే విలువైనది ఏదీ లేదు, అందుకే దీనిపై ఉన్న భయం చాలా శక్తివంతమైనది. ‘ఇప్పుడే ఈ టెస్ట్ చేయించుకోకపోతే ప్రమాదం’, ‘ఈ హెల్త్ ప్యాకేజీ వెంటనే తీసుకోండి’ అంటూ అనవసర భయాన్ని నూరిపోస్తున్నారు. వైద్య రంగంలో పారదర్శకత, శాస్త్రీయ ఆధారాలు ముఖ్యం. భయంతో కాకుండా వైద్యుల సరైన సలహాతో నిర్ణయాలు తీసుకోవాలి. అందం విషయంలోనూ ఇదే ధోరణి కనిపిస్తోంది. ‘నాలో ఏదో లోపం ఉంది, నేను ఇతరుల కంటే తక్కువ’ అనే భావనను ముందుగా నూరిపోస్తారు. ఆ తర్వాత ఆ లోపానికి పరిష్కారం పేరుతో కాస్మోటిక్స్, బ్యూటీ ట్రీట్మెంట్స్ అమ్ముతున్నారు. మనిషిలో ఉన్న అభద్రతా భావం పెరిగేకొద్దీ, ఈ మార్కెట్ కూడా అంతలా విస్తరిస్తోంది.
పరిణామాలు, తీసుకోవాల్సిన జాగ్రత్తలు
సహజమైన రూపాన్ని ఆమోదించలేకపోవడం వల్ల మానసిక ఒత్తిడి పెరిగిపోతోంది. పైగా అర్హత లేని బ్యూటీ క్లినిక్లు, కెమికల్ ఆధారిత ఉత్పత్తుల వల్ల చర్మ ఆరోగ్యానికే తీవ్ర ప్రమాదం వాటిల్లుతోంది. మనిషిలో ఉన్న అసంతృప్తి ఎంత ఎక్కువగా ఉంటే, దానిపై ఆధారపడి ఏర్పడే మార్కెట్ అంత పెద్దదవుతుంది. అందమైన రూపం కంటే ఆరోగ్యకరమైన ఆలోచనలు, ఆత్మవిశ్వాసం చాలా ముఖ్యమైనవి. విపరీతమైన ప్రచారాలకు లోనై లేని అభద్రతా భావాన్ని పెంచుకోకుండా, ప్రాధాన్యతలను గుర్తించి తెలివైన నిర్ణయాలు తీసుకోవడం అవసరం.
సులభంగా డబ్బు సంపాదన
ఆర్థికంగా ఎదగాలని, త్వరగా అప్పుల నుంచి బయటపడాలని అందరికీ ఉంటుంది. ఈ ఆశను పసిగట్టిన మోసగాళ్లు ‘తక్కువ సమయంలో ఎక్కువ లాభాలు’, ‘గ్యారంటీ రిటర్న్స్’ అంటూ ఆకర్షిస్తారు. నకిలీ పెట్టుబడులు, పోంజీ స్కీమ్ల పేరుతో అమాయకులను బురిడీ కొట్టిస్తారు. మొదట ప్రాసెసింగ్ ఫీజు, టాక్స్ అంటూ చిన్న మొత్తాలతో మొదలుపెట్టి, తర్వాత పెద్ద మొత్తంలో ముంచేస్తారు. త్వరగా డబ్బు సంపాదించాలనే తొందరపాటు నిర్ణయాలే కొంపముంచుతున్నాయి.
నింద బాధితుల మీదే
మోసపోయిన వారిని చూసి ‘అత్యాశ వల్ల అలా జరిగింది’ అని సులభంగా తేల్చేస్తుంటారు. కానీ ప్రతీ బాధితుడూ అత్యాశపరుడు కాదు. అనారోగ్యం, అప్పుల బాధ, ఒంటరితనం, పిల్లల భవిష్యత్తు గురించిన ఆందోళన వల్ల ఆ సమయంలో సరిగ్గా ఆలోచించలేక తప్పు నిర్ణయం తీసుకుని ఉండవచ్చు. బాధితులను అవమానించడం కంటే, వారి బలహీనతలను మోసగాళ్లు ఎలా దోపిడీ చేస్తున్నారో గుర్తించి అవగాహన పెంచడం ముఖ్యం.
జాగ్రత్తలు, పరిష్కారాలు
తొందరపాటు వద్దు: ఎవరైనా మిమ్మల్ని భయపెడుతూ, వెంటనే నిర్ణయం తీసుకోమని ఒత్తిడి చేస్తే ఒక్క క్షణం ఆగాలి.
ధృవీకరణ: పెట్టుబడులు, ఉద్యోగాలు, వైద్యానికి సంబంధించిన విషయాల్లో సొంతంగా సమాచారం సేకరించి ఆలోచించాలి.
రహస్యాలు వద్దు: OTP, PIN, పాస్వర్డ్ వంటి సమాచారాన్ని ఎవరితోనూ పంచుకోకూడదు. ‘ఇది చివరి అవకాశం’, ‘ఎవరికీ చెప్పకండి’ అనే మాటల పట్ల అప్రమత్తంగా ఉండాలి.
ప్రజల బలహీనతలు కొంతమందికి కోట్ల సంపదగా మారకూడదు. మన బలహీనత ఎవరికో వ్యాపారం కాకుండా, మన బలం మన భవిష్యత్తుకు పెట్టుబడి కావాలి.