Government Social Media Influencer Policy : చేతిలో స్మార్ట్‌ఫోన్.. వేలికొనలపై రీల్స్ జగత్తు! నేటితరం ఆలోచనలను, అభిరుచులను శాసిస్తున్న మాధ్యమం సోషల్ మీడియా. నిన్నటివరకూ కేవలం కార్పొరేట్ బ్రాండ్లకే పరిమితమైన ఇన్‌ఫ్లుయెన్సర్ల ప్రాభవం, నేడు ప్రజాపాలన ముంగిట కొలువుదీరింది. సంక్షేమ పథకాలను గడపగడపకూ చేర్చేందుకు పాలకులే స్వయంగా క్రియేటర్లకు రెడ్‌కార్పెట్ పరుస్తూ లక్షల్లో నజరానాలు ప్రకటిస్తున్నారు.
విధాన రూపకల్పన – భారీ పారితోషికాలు : సాంప్రదాయ ప్రకటనల కన్నా అరవై సెకన్ల రీల్ ప్రభావం అపారమని ప్రభుత్వాలు గుర్తించాయి. ఈ క్రమంలో ఆంధ్రప్రదేశ్, ఉత్తర్‌ప్రదేశ్, రాజస్థాన్, బిహార్ వంటి రాష్ట్రాలు ప్రత్యేక ‘డిజిటల్ మీడియా పాలసీ’లను అమల్లోకి తెచ్చాయి. ఉత్తర్‌ప్రదేశ్‌లో వ్యూస్ ఆధారంగా గరిష్ఠంగా నెలకు రూ.8 లక్షల దాకా ఆర్జించే వీలుంది.
ఏపీ & ఇతర రాష్ట్రాలు: ఆంధ్రప్రదేశ్‌లో నెలకు గరిష్ఠంగా రూ.1.5 లక్షలు, రాజస్థాన్‌లో రూ.25 వేలు, బిహార్‌లో వ్యూస్ ప్రాతిపదికన లక్ష రూపాయల వరకు చెల్లింపులు చేస్తున్నారు.
ఎంపిక ప్రమాణాలు – అర్హతలు
ఫాలోవర్ల పరిమితి: ఏదైనా సోషల్ మీడియా వేదికపై కనీసం 10,000 మంది ఫాలోవర్లు ఉంటేనే దరఖాస్తుకు అర్హత లభిస్తుంది.
వర్గీకరణ: లక్ష మందికి పైగా ఫాలోవర్లు ఉన్నవారిని కేటగిరీ-ఎ గా విభజించి ప్రాధాన్యం ఇస్తారు.
పారదర్శకత: కనీసం ఆరు నెలల డేటా అనలిటిక్స్, కంటెంట్ విశ్వసనీయతను పరిశీలిస్తారు. విద్వేషపూరిత అంశాలున్నా, క్రిమినల్ కేసులున్నా బ్లాక్‌లిస్ట్‌లో పెడతారు.
ఉపాధి రంగంగా డిజిటల్ ఎకానమీ : కేంద్ర ప్రభుత్వం ‘నేషనల్ క్రియేటర్స్ అవార్డ్స్‌’తో ప్రోత్సహిస్తుండగా, అంతర్జాతీయంగా అమెరికా, బ్రిటన్‌లలోనూ ఇదే విధానం నడుస్తోంది. ఆక్స్‌ఫర్డ్ ఎకనామిక్స్ నివేదిక ప్రకారం, యూట్యూబ్ తదితర డిజిటల్ ప్లాట్‌ఫామ్‌లు దేశంలో ఏటా లక్షలాది పూర్తిస్థాయి ఉపాధి అవకాశాలను సృష్టిస్తున్నాయి. సాంకేతికతను సద్వినియోగం చేసుకుంటూ, ప్రభుత్వ పథకాలను ప్రజల్లోకి తీసుకెళ్లడంలో కంటెంట్ క్రియేటర్లు సరికొత్త వారధులుగా మారుతున్నారు.