Supreme Court Cancels Darshan’s Bail : రేణుకాస్వామి హత్య కేసులో కన్నడ నటుడు దర్శన్‌కు లభించిన ఊరట తాత్కాలికమే. చట్టం ముందు అందరూ సమానమేనని ఈ కేసులో మరోసారి రుజువైంది. కర్ణాటక హైకోర్టు మంజూరు చేసిన బెయిల్‌ను దేశ అత్యున్నత న్యాయస్థానం సుప్రీంకోర్టు గురువారం రద్దు చేస్తూ సంచలన తీర్పు వెలువరించింది. ఈ సందర్భంగా హైకోర్టు తీరును తప్పుబడుతూ తీవ్ర వ్యాఖ్యలు చేసింది. ఇంతకీ, సుప్రీంకోర్టు ఇంత కఠినంగా ఎందుకు స్పందించింది..? దర్శన్‌కు జైల్లో ఎలాంటి ప్రత్యేక సౌకర్యాలు వద్దని ఎందుకు ఆదేశించింది..? ఈ తీర్పు తర్వాత జరగబోయే పరిణామాలేంటి..? ఆ వివరాల్లోకి వెళ్తే…
హైకోర్టు తీర్పుపై తీవ్ర అసంతృప్తి : రేణుకాస్వామి హత్య వంటి తీవ్రమైన కేసులో దర్శన్‌కు బెయిల్ మంజూరు చేయడంపై సుప్రీంకోర్టు తీవ్ర అసంతృప్తి వ్యక్తం చేసింది. జస్టిస్ మహాదేవన్‌ నేతృత్వంలోని ధర్మాసనం ఈ కేసును విచారించింది.
చట్టపరమైన కారణాలు లేవు: దర్శన్‌కు బెయిల్ ఇవ్వడానికి ఎలాంటి బలమైన చట్టపరమైన కారణాలు కనిపించడం లేదని ధర్మాసనం స్పష్టం చేసింది.
సాక్షులపై ప్రభావం: బెయిల్ మంజూరు చేస్తే, నిందితుడు సాక్షులను ప్రభావితం చేసే ప్రమాదం ఉందని హెచ్చరించింది.
చట్టానికి ఎవరూ అతీతులు కారు: చట్టం ముందు అందరూ సమానమేనని, కస్టడీలో దర్శన్‌కు ఎలాంటి ప్రత్యేక మర్యాదలు, సౌకర్యాలు అవసరం లేదని జైలు అధికారులకు స్పష్టమైన ఆదేశాలు జారీ చేసింది. నిందితులకు జైళ్లలో ‘పంచతారల సౌకర్యాలు’ కల్పిస్తున్నట్లు తమ దృష్టికి వస్తే, సంబంధిత జైలు సూపరింటెండెంట్‌పై కఠిన చర్యలు తప్పవని తీవ్రంగా హెచ్చరించింది.
“ఇది హత్య కుట్ర కేసు కావడంతో మేం కొంచెం సీరియస్‌గా ఉన్నాం. ఇంత సీరియస్ కేసులో బెయిల్ ఇచ్చే ముందు హైకోర్టు చట్టపరమైన విశ్లేషణ చేసిందా లేదా అన్నది పరిశీలిస్తున్నాం. హైకోర్టు చేసిన తప్పును మేము పునరావృతం చేయం.”
– సుప్రీంకోర్టు ధర్మాసనం (జులై 24 విచారణలో)
తక్షణమే అరెస్ట్ చేయాలని ఆదేశం : బెయిల్‌ను రద్దు చేయడమే కాకుండా, దర్శన్‌ను తక్షణమే అదుపులోకి తీసుకోవాలని సుప్రీంకోర్టు పోలీసులను ఆదేశించింది. ప్రస్తుతం తమిళనాడులో ఉన్న దర్శన్‌ను, బెంగళూరు పోలీసులు సుప్రీంకోర్టు ఆదేశాలను ట్రయల్ కోర్టుకు సమర్పించి, వారెంట్ తీసుకున్న తర్వాత అరెస్ట్ చేయనున్నారు.
ఏంటీ రేణుకాస్వామి హత్య కేసు : కర్ణాటకను, యావత్ సినీ పరిశ్రమను కుదిపేసిన కేసు ఇది. నటుడు దర్శన్ అభిమాని అయిన రేణుకాస్వామి, దర్శన్ స్నేహితురాలు పవిత్ర గౌడకు అసభ్యకర సందేశాలు పంపాడన్న ఆరోపణలతో అతడిని కిడ్నాప్ చేసి, చిత్రహింసలకు గురిచేసి దారుణంగా హత్య చేశారు. ఈ కేసులో దర్శన్‌ను ఏ1 నిందితుడిగా, పవిత్ర గౌడను ఏ2 నిందితురాలిగా చేర్చారు. పోస్టుమార్టం నివేదికలో రేణుకాస్వామికి కరెంట్ షాక్ ఇచ్చినట్లు తేలడం హత్య తీవ్రతకు అద్దం పడుతోంది. ఈ కేసులో గత ఏడాది డిసెంబర్‌లో కర్ణాటక హైకోర్టు దర్శన్‌కు బెయిల్ మంజూరు చేయగా, దానిని రాష్ట్ర ప్రభుత్వం సుప్రీంకోర్టులో సవాలు చేసింది.
