ADR report on Indian ministers : చట్టాలను చేసేవారే చట్టాలను ఉల్లంఘిస్తున్నారా? ప్రజా సేవకు అంకితమవ్వాల్సిన నేతల చరిత్ర నేరమయంగా మారుతోందా? అవుననే అంటున్నాయి తాజా గణాంకాలు. దేశంలోని మంత్రులపై ఉన్న నేర చరిత్ర, వారి ఆర్థిక ఆస్తులపై ‘అసోసియేషన్ ఫర్ డెమోక్రటిక్ రిఫార్మ్స్’ (ఏడీఆర్) విడుదల చేసిన నివేదిక యావత్ దేశాన్ని నివ్వెరపరిచింది. దాదాపు సగం మంది మంత్రులపై క్రిమినల్ కేసులు ఉన్నాయని, వారిలో చాలామంది కోటీశ్వరులు, బిలియనీర్లు ఉన్నారని ఈ నివేదిక తేల్చిచెప్పింది. ఇంతకీ ఏ పార్టీలో ఎంతమంది నేరచరితులు ఉన్నారు..? అత్యంత ధనవంతులైన మంత్రులు ఎవరు..?
నివేదికలోని కీలక అంశాలు: అంకెల సాక్షిగా : దేశంలోని 27 రాష్ట్రాలు, 3 కేంద్రపాలిత ప్రాంతాలు, మరియు కేంద్ర మంత్రివర్గానికి చెందిన మొత్తం 643 మంది మంత్రుల అఫిడవిట్‌లను ఏడీఆర్ లోతుగా విశ్లేషించింది. ఈ విశ్లేషణలో వెలుగు చూసిన వాస్తవాలు ప్రజాస్వామ్యవాదులను ఆందోళనకు గురిచేస్తున్నాయి.
నేర చరిత్ర ఉన్న మంత్రులు: మొత్తం 643 మంది మంత్రులలో, 302 మంది (దాదాపు 47%) తమపై క్రిమినల్ కేసులు ఉన్నట్లు ప్రకటించారు.
తీవ్రమైన నేరాలు: వీరిలో 174 మంది మంత్రులపై హత్య, కిడ్నాప్, మహిళలపై దాడులు వంటి తీవ్రమైన నేరారోపణలు ఉన్నాయి. ఐదేళ్లు లేదా అంతకంటే ఎక్కువ శిక్ష పడే అవకాశం ఉన్న కేసులను తీవ్రమైన నేరాలుగా పరిగణిస్తారు.
పార్టీల వారీగా నేర చరిత్ర : ఏడీఆర్ నివేదిక ప్రకారం, ప్రధాన పార్టీలన్నింటిలోనూ నేర చరిత్ర కలిగిన మంత్రులు ఉన్నారు.
భారతీయ జనతా పార్టీ (బీజేపీ): 336 మంది బీజేపీ మంత్రులలో, 136 మంది (40%)పై క్రిమినల్ కేసులు ఉన్నాయి. వీరిలో 88 మంది (26%) తీవ్రమైన నేరారోపణలు ఎదుర్కొంటున్నారు.
కాంగ్రెస్: 61 మంది కాంగ్రెస్ మంత్రులకు గాను, 45 మంది (74%)పై క్రిమినల్ కేసులు నమోదయ్యాయి. వీరిలో 18 మంది (30%)పై తీవ్రమైన నేరాలు ఉన్నాయి.
డీఎంకే: తమిళనాడుకు చెందిన డీఎంకే పార్టీలో 31 మంది మంత్రులలో ఏకంగా 27 మంది (87%) క్రిమINAL ఆరోపణలు ఎదుర్కొంటున్నారు.
తృణమూల్ కాంగ్రెస్ (టీఎంసీ): 40 మంది మంత్రులలో 13 మందిపై (33%) క్రిమినల్ కేసులు ఉన్నాయి.
ఆమ్ ఆద్మీ పార్టీ (ఆప్): 16 మంది మంత్రులలో 11 మంది (69%) నేరారోపణలు ఎదుర్కొంటున్నారు.
కుబేరులైన మంత్రులు: నేర చరిత్రతో పాటు, మంత్రుల ఆర్థిక ఆస్తుల విశ్లేషణ కూడా ఆసక్తికరమైన విషయాలను బయటపెట్టింది.
సగటు ఆస్తి: దేశంలోని మంత్రుల సగటు ఆస్తి రూ. 37.21 కోట్లుగా ఉంది.
బిలియనీర్ మంత్రులు: కర్ణాటకలో అత్యధికంగా ఎనిమిది మంది బిలియనీర్ మంత్రులు ఉండగా, ఆంధ్రప్రదేశ్‌లో ఆరుగురు, మహారాష్ట్రలో నలుగురు ఉన్నారు. పార్టీల పరంగా చూస్తే, బీజేపీలో అత్యధికంగా 14 మంది బిలియనీర్ మంత్రులు ఉన్నారు. కాంగ్రెస్‌లో 11 మంది, టీడీపీలో 6 మంది బిలియనీర్లు ఉన్నారు.
అత్యంత ధనవంతులు: డాక్టర్ చంద్రశేఖర్ పెమ్మసాని (టీడీపీ): గుంటూరు ఎంపీగా ఉన్న ఈయన దేశంలోనే అత్యంత ధనిక మంత్రిగా నిలిచారు. డీకే శివకుమార్ (కాంగ్రెస్): కర్ణాటక ఉపముఖ్యమంత్రి రెండో స్థానంలో ఉన్నారు. చంద్రబాబు నాయుడు (టీడీపీ): ఆంధ్రప్రదేశ్ ముఖ్యమంత్రి మూడో స్థానంలో ఉన్నారు. ఈ జాబితాలో నారా లోకేష్, గడ్డం వివేకానంద్, పొంగులేటి శ్రీనివాస రెడ్డి వంటి తెలుగు రాష్ట్రాల మంత్రులు కూడా ఉన్నారు.
హరియాణా, జమ్మూకశ్మీర్, నాగాలాండ్, ఉత్తరాఖండ్ రాష్ట్రాల మంత్రులపై ఎలాంటి క్రిమినల్ కేసులు లేకపోవడం గమనార్హం. ఒకవైపు నేరమయ రాజకీయాలను ప్రక్షాళన చేయాలని కేంద్రం కొత్త బిల్లులు తెస్తున్న సమయంలో, ఈ నివేదికలోని వాస్తవాలు రాజకీయ వ్యవస్థ స్వీయపరిశీలన చేసుకోవాల్సిన అవసరాన్ని నొక్కి చెబుతున్నాయి.
