Air India Crash Investigation: అహ్మదాబాద్ ఎయిర్ ఇండియా విమాన దుర్ఘటన దర్యాప్తులో అనూహ్య మలుపు… వందలాది మందిని బలిగొన్న ఆ ఘోర ప్రమాదంపై దర్యాప్తు ఇంకా తుది దశకు చేరకముందే, మీడియాలో వెలువడుతున్న కథనాలు పెను దుమారాన్ని రేపుతున్నాయి. ఈ ఊహాగానాలపై భారత దర్యాప్తు సంస్థ (ఏఏఐబీ)తో పాటు అమెరికాకు చెందిన అత్యున్నత రవాణా భద్రతా మండలి (ఎన్టీఎస్‌బీ) సైతం తీవ్ర ఆగ్రహం వ్యక్తం చేసింది. అసలు మీడియాలో వచ్చిన కథనాలేంటి..? దర్యాప్తు సంస్థలు ఎందుకు ఇంత తీవ్రంగా స్పందిస్తున్నాయి..? 

అమెరికా ఏజెన్సీ తీవ్ర అభ్యంతరం:

గుజరాత్‌లో జరిగిన ఎయిర్ ఇండియా విమాన ప్రమాద దర్యాప్తుపై వెలువడుతున్న మీడియా కథనాలను అమెరికాకు చెందిన నేషనల్ ట్రాన్స్‌పోర్టేషన్ సేఫ్టీ బోర్డ్ (NTSB) తీవ్రంగా ఖండించింది. ఈ కథనాలు “అపరిపక్వమైనవి, ఊహాజనితమైనవి” అని ఎన్టీఎస్‌బీ ఛైర్మన్ జెన్నిఫర్ హోమెండీ ఎద్దేవా చేశారు. దర్యాప్తు ఇంకా కొనసాగుతున్న దశలో, కేవలం ప్రాథమిక నివేదిక ఆధారంగా ఓ నిర్ధారణకు రావడం సరికాదని ఆమె హితవు పలికారు. భారత విమాన ప్రమాదాల దర్యాప్తు బ్యూరో (AAIB) చేస్తున్న దర్యాప్తునకు తమ పూర్తి మద్దతు ఉంటుందని, తుది నివేదిక వెలువడే వరకు ప్రజలు, మీడియా సంస్థలు సంయమనం పాటించాలని ఆమె విజ్ఞప్తి చేశారు.

భారత్ దర్యాప్తు సంస్థ (AAIB) ఆగ్రహం:

అంతకుముందే, భారత విమాన ప్రమాదాల దర్యాప్తు బ్యూరో (ఏఏఐబీ) కూడా ఈ కథనాలపై గురువారం తీవ్రంగా మండిపడింది. దర్యాప్తు ఇంకా కొనసాగుతోందని, ఇప్పుడే ఒక నిర్ధారణకు రావడం తొందరపాటు అవుతుందని స్పష్టం చేసింది.

“కొన్ని అంతర్జాతీయ మీడియా సంస్థలు నిరాధారమైన నివేదికలతో ప్రమాదంపై ఓ నిర్ణయానికి వచ్చేందుకు ప్రయత్నిస్తున్నాయి. ఇది అత్యంత బాధ్యతారహితమైన చర్య. ఏఏఐబీ అంతర్జాతీయ నిబంధనలకు అనుగుణంగా అత్యంత ప్రొఫెషనల్ పద్ధతిలో దర్యాప్తు చేస్తోంది. ప్రాథమిక నివేదిక ఉద్దేశం కేవలం ఏం జరిగిందనే సమాచారాన్ని అందించడమే. దర్యాప్తు విశ్వసనీయతను దెబ్బతీసే కథనాలను ప్రచురించవద్దు,” అని ఏఏఐబీ ఒక ప్రకటనలో ఘాటుగా పేర్కొంది.

దుమారానికి కారణమైన కథనం ఇదే:

అసలు ఇంతటి దుమారానికి కారణమేమిటంటే, అమెరికాకు చెందిన ఓ అంతర్జాతీయ పత్రిక ఇటీవల ప్రచురించిన కథనమే. విమానం గాల్లో ఉండగా, కెప్టెనే ఇంధన స్విచ్‌ను షట్‌డౌన్ చేశారని ఆ కథనంలో పేర్కొంది. ఇటీవలే ఏఏఐబీ విడుదల చేసిన ప్రాథమిక నివేదికలో, విమానం ఇంజిన్లు గాల్లో ఉండగా షట్‌డౌన్ అయ్యాయని, ఆ తర్వాత చేసిన రికవరీ ప్రయత్నాలు విఫలమయ్యాయని వెల్లడించింది. ఈ ప్రాథమిక సమాచారాన్ని ఆధారం చేసుకుని, దర్యాప్తు పూర్తికాకముందే మీడియా సంస్థ తుది నిర్ధారణకు వచ్చినట్లు కథనాన్ని ప్రచురించడంపైనే దర్యాప్తు సంస్థలు అభ్యంతరం వ్యక్తం చేస్తున్నాయి.

ఆనాటి ఘోర విషాదం:

జూన్ 12న అహ్మదాబాద్ విమానాశ్రయం నుంచి లండన్‌కు బయలుదేరిన ఎయిర్ ఇండియా విమానం, టేకాఫ్ అయిన కొద్ది క్షణాల్లోనే సమీపంలోని ఓ హాస్టల్‌పై కుప్పకూలింది. ఈ ఘోర దుర్ఘటనలో విమానంలోని 241 మంది ప్రయాణికులు, హాస్టల్‌లోని పలువురు వైద్య విద్యార్థులు సహా మొత్తం 271 మంది ప్రాణాలు కోల్పోయారు. ఈ ప్రమాదం దేశవ్యాప్తంగా తీవ్ర విషాదాన్ని నింపింది.