Akhilesh Yadav on Bihar elections : బిహార్ ఎన్నికల ఫలితాలపై దేశవ్యాప్తంగా ఉత్కంఠ నెలకొన్న వేళ, సమాజ్‌వాదీ పార్టీ అధినేత అఖిలేశ్ యాదవ్ కీలక వ్యాఖ్యలు చేశారు. బిహార్‌లో మార్పు గాలి బలంగా వీస్తోందని, ‘ఇండియా’ కూటమి విజయదుందుభి మోగించడం ఖాయమని ఆయన జోస్యం చెప్పారు. ఆర్జేడీ నేత తేజస్వీ యాదవ్ రూపంలో రాష్ట్రానికి ఒక యువ, శక్తివంతమైన ముఖ్యమంత్రి లభించబోతున్నారని ఆయన ధీమా వ్యక్తం చేశారు. ఉత్తర్‌ప్రదేశ్‌లో బీజేపీకి ఎదురైన పరాభవాన్ని ప్రస్తావిస్తూ, బిహార్ ప్రజలు కూడా అదే తీర్పు ఇవ్వబోతున్నారని అఖిలేశ్ ఎందుకు అంత బలంగా నమ్ముతున్నారు? ఆయన విశ్లేషణ ఏంటి?

యువ ముఖ్యమంత్రి కోసం బిహార్ ఎదురుచూపు : ఒడిశా పర్యటనకు వెళ్తూ రాయ్‌పూర్‌లోని స్వామి వివేకానంద విమానాశ్రయంలో విలేకరులతో మాట్లాడిన అఖిలేశ్, బిహార్ రాజకీయాలపై స్పందించారు. “బిహార్‌లో మార్పు గాలి స్పష్టంగా కనిపిస్తోంది. అక్కడి ప్రజలు తేజస్వీ యాదవ్ వంటి యువ నాయకుడిని ముఖ్యమంత్రిగా కోరుకుంటున్నారు,” అని అన్నారు. ఆదివారం 36వ ఏట అడుగుపెట్టిన తేజస్వీకి ప్రజలు గెలుపును బహుమతిగా ఇవ్వనున్నారని ఆయన అభిప్రాయపడ్డారు. బిహార్‌లో ‘మహాగఠ్‌బంధన్’ విజయం, జాతీయ స్థాయిలో ‘ఇండియా’ కూటమిని మరింత బలోపేతం చేస్తుందని ఆయన పేర్కొన్నారు.

యూపీ ఫలితాలే నిదర్శనం : బీజేపీ ‘డబుల్ ఇంజన్’ సర్కార్ల ప్రచారాన్ని ప్రజలు తిరస్కరిస్తున్నారని అఖిలేశ్ అన్నారు. “ఉత్తర్‌ప్రదేశ్‌ ప్రజలు గత లోక్‌సభ ఎన్నికల్లోనే బీజేపీకి తగిన గుణపాఠం చెప్పారు. బీజేపీ వెనుకబడిన వర్గాలు, దళితులు, గిరిజనులు, మైనారిటీలను తీవ్రంగా వివక్షకు గురిచేసింది. వారంతా ‘పీడీఏ’ (వెనుకబడిన వర్గాలు, దళితులు, మైనారిటీలు) గొడుగు కింద ఏకమై బీజేపీని ఓడించారు,” అని ఆయన గుర్తుచేశారు. “బీజేపీ ఎక్కడైతే తన మత రాజకీయాలను ప్రారంభించిందో, అక్కడే ప్రజలు వారిని ఓడించారు,” అంటూ రాముడి ఆలయం ఉన్న అయోధ్యను ఫైజాబాద్ లోక్‌సభ స్థానంలో బీజేపీ ఓటమిని ఆయన పరోక్షంగా ప్రస్తావించారు.

సమాజ్‌వాదీ పార్టీ విస్తరణే లక్ష్యం : ఈ సందర్భంగా తమ పార్టీ జాతీయ విస్తరణ ప్రణాళికలను కూడా అఖిలేశ్ వెల్లడించారు. “సమాజ్‌వాదీ పార్టీని జాతీయ పార్టీగా తీర్చిదిద్దే దిశగా అడుగులు వేస్తున్నాం. ఛత్తీస్‌గఢ్‌లో మా ప్రయత్నాలు కొనసాగిస్తాం. ఒడిశాలోని నువాపడ ఉపఎన్నిక ద్వారా ఆ రాష్ట్రంలో మా ఉనికికి బీజం వేస్తున్నాం. రాబోయే సంవత్సరాల్లో ఒడిశాలో పార్టీకి బలమైన పునాదులు వేస్తాం,” అని ఆయన ధీమా వ్యక్తం చేశారు. నవంబర్ 11న జరగనున్న నువాపడ ఉపఎన్నిక ప్రచారంలో పాల్గొనేందుకు ఆయన ఒడిశా వెళ్లారు.