Amit Shah declares India Naxal-free: దశాబ్దాల పాటు భయానక వాతావరణం, తుపాకుల మోత, అమాయకుల ప్రాణాలతో తడిసిన బస్తర్ అడవులు ఇప్పుడు ప్రశాంతంగా ఊపిరి పీల్చుకుంటున్నాయా? దేశాన్ని పట్టి పీడిస్తున్న నక్సలిజం ముప్పు నిజంగానే ముగిసిపోయిందా? గడువు కంటే ముందే ఈ విజయాన్ని ఎలా సాధించగలిగారు? దీని వెనుక ఉన్న వ్యూహమేంటి? అన్న ప్రశ్నలకు కేంద్ర హోంమంత్రి అమిత్ షా స్వయంగా సమాధానమిచ్చారు.

గడువు కంటే ముందే సంపూర్ణ విజయం: ఛత్తీస్‌గఢ్‌లోని బస్తర్‌లో జరిగిన 26వ సెంట్రల్ రీజనల్ కౌన్సిల్ సమావేశంలో కేంద్ర హోంమంత్రి అమిత్ షా చారిత్రక ప్రకటన చేశారు. 2026 మార్చి 31 నాటికి దేశం నుంచి నక్సలిజాన్ని పూర్తిగా నిర్మూలిస్తామని గతంలో ప్రకటించినప్పటికీ, భద్రతా బలగాల పట్టుదల, త్యాగాల ఫలితంగా ఆ గడువు కంటే ముందే నక్సలిజాన్ని అంతం చేసినట్లు ఆయన స్పష్టం చేశారు.

Also Read: https://teluguprabha.net/cinema-news/niharikas-interesting-comments-on-pawan-kalyan/

అభివృద్ధికి నక్సలిజమే అడ్డుగోడ: నక్సలిజం పుట్టుకకు ‘అభివృద్ధి లోపమే’ కారణమని తరచూ వినిపించే వాదనను అమిత్ షా కొట్టిపారేశారు. “అభివృద్ధి జరగకపోవడానికి కారణం నక్సలిజమే కానీ, నక్సలిజం పుట్టడానికి అభివృద్ధి లేకపోవడం కారణం కాదు” అని ఆయన తేల్చి చెప్పారు. దేశంలో నక్సల్స్ ప్రభావిత ప్రాంతాల కంటే వెనుకబడిన అనేక ప్రాంతాలు ఉన్నాయని, కానీ అక్కడ నక్సలిజం రాలేదని, అవి క్రమంగా అభివృద్ధి చెందుతున్నాయని ఆయన ఉదాహరించారు.

శిబిరాల నుంచి సేవా కేంద్రాలుగా: బస్తర్ ప్రాంతాన్ని నక్సల్ రహితంగా మార్చడానికి కేంద్ర హోం శాఖ వ్యూహాత్మకంగా సుమారు 200 భద్రతా శిబిరాలను ఏర్పాటు చేసింది. ప్రస్తుతం పరిస్థితి అదుపులోకి రావడంతో, వీటిలో 70 శిబిరాలను ‘వీర్ షహీద్ గుండాధర్ సేవా డేరా’లుగా మార్చాలని నిర్ణయించారు. దీనిలో భాగంగా అమిత్ షా వీటిని ప్రారంభించారు. ఈ కేంద్రాల ద్వారా 371 రకాల కేంద్ర, రాష్ట్ర ప్రభుత్వ పథకాలు నేరుగా ప్రజలకు అందనున్నాయి.

Also Read: https://teluguprabha.net/telangana/hyderabad/food-safety-officials-raids-in-lulu-mall-kphb/

రాజకీయ విమర్శలు: ఈ విజయంలో బీజేపీయేతర రాష్ట్రాలు కూడా సహకరించాయని అమిత్ షా పేర్కొన్నారు. అయితే, ఛత్తీస్‌గఢ్‌లో గతంలో ఉన్న కాంగ్రెస్ ప్రభుత్వం మాత్రం నక్సల్ వ్యతిరేక పోరాటంలో కనీస సహకారం అందించలేదని ఆయన తీవ్రంగా ఆరోపించారు. 2023 డిసెంబరులో బీజేపీ ప్రభుత్వం అధికారంలోకి వచ్చిన తర్వాతే మిగిలిన నక్సలైట్లను ఏరివేయడం వేగవంతమైందని ఆయన వివరించారు.