Amit Shah on J&K statehood : జమ్మూకశ్మీర్‌కు రాష్ట్ర హోదా పునరుద్ధరణపై నెలకొన్న ఉత్కంఠకు కేంద్ర హోంమంత్రి అమిత్ షా తెరదించారు. సరైన సమయంలో, జమ్మూకశ్మీర్‌కు తప్పకుండా రాష్ట్ర హోదాను పునరుద్ధరిస్తామని ఆయన స్పష్టమైన హామీ ఇచ్చారు. పట్నాలో జరిగిన మీడియా సమావేశంలో మాట్లాడిన ఆయన, ఆర్టికల్ 370 రద్దు తర్వాత కశ్మీర్‌లో చోటుచేసుకున్న సానుకూల మార్పుల నుంచి లద్దాఖ్ ఆందోళనల వరకు పలు కీలక అంశాలపై మాట్లాడారు. అసలు ఆయన ఇంకా ఏమన్నారు? ఒమర్ అబ్దుల్లా వ్యాఖ్యలకు ఎలా స్పందించారు..?

పట్నాలో జరిగిన ఓ మీడియా సమావేశంలో, జమ్మూకశ్మీర్ ముఖ్యమంత్రి ఒమర్ అబ్దుల్లా చేసిన వ్యాఖ్యలపై అమిత్ షా స్పందించారు. “ప్రమాణ స్వీకారం చేసి ఏడాది గడిచినా, రాష్ట్ర హోదాను పునరుద్ధరించలేదు” అన్న ఒమర్ వ్యాఖ్యలకు బదులిస్తూ..

“అతను (ఒమర్ అబ్దుల్లా) రాజకీయ ఒత్తిడి వల్ల అలా చెబుతుండవచ్చు. కానీ, జమ్మూకశ్మీర్‌కు రాష్ట్ర హోదా తగిన సమయంలో పునరుద్ధరించబడుతుంది. అది కూడా అతనితో చర్చలు జరిపిన తర్వాతే జరుగుతుంది.”
– అమిత్ షా, కేంద్ర హోంమంత్రి

ఆర్టికల్ 370 రద్దు తర్వాత.. గుణాత్మక మార్పు : ఆర్టికల్ 370 రద్దు తర్వాత జమ్మూకశ్మీర్‌లో ఉగ్రవాదంపై ఉక్కుపాదం మోపామని, ఫలితంగా గుణాత్మకమైన మార్పు కనిపిస్తోందని అమిత్ షా అన్నారు. “గత తొమ్మిది నెలల్లో ఒక్క స్థానిక యువకుడు కూడా ఉగ్రవాద సంస్థలో చేరలేదు. ఇది 1990ల నుంచి చూస్తే ఓ చారిత్రక మార్పు. ఇప్పుడు కశ్మీర్ ప్రజలు తాము భారతీయులమని గర్వంగా భావిస్తున్నారు,” అని ఆయన తెలిపారు. ఇప్పటికే పంచాయతీ, మున్సిపల్, శాసనసభ ఎన్నికలు నిర్వహించి, ప్రజాస్వామ్యాన్ని పునరుద్ధరించామని స్పష్టం చేశారు.

లద్దాఖ్ ప్రజలకు హామీ : లద్దాఖ్‌లో ఇటీవల జరిగిన ఆందోళనలు, సోనమ్ వాంగ్‌చుక్ అరెస్ట్ వంటి అంశాలపైనా అమిత్ షా మాట్లాడారు. చర్చలు జరుగుతున్నాయి: “కేంద్ర ప్రభుత్వం లేహ్, కార్గిల్ కమిటీలతో నిరంతరం చర్చలు జరుపుతోంది. ప్రజలు కాస్త ఓపికగా ఉండాలి. వారి న్యాయమైన డిమాండ్లన్నింటికీ మంచి పరిష్కారం లభిస్తుంది,” అని హామీ ఇచ్చారు.
వాంగ్‌చుక్ కేసు కోర్టు పరిధిలో: సోనమ్ వాంగ్‌చుక్ అరెస్ట్ గురించి ప్రశ్నించగా, “నేను ప్రజల డిమాండ్ల గురించి మాట్లాడగలను, వ్యక్తుల గురించి కాదు. ఆ కేసు ప్రస్తుతం కోర్టు పరిధిలో ఉంది, న్యాయస్థానం ఆధారాల బట్టి నిర్ణయం తీసుకుంటుంది,” అని ఆయన బదులిచ్చారు.

మావోయిజంపై ఉక్కుపాదం : ఇదే సందర్భంగా, మావోయిజంపై కూడా అమిత్ షా తీవ్రంగా స్పందించారు. “ప్రధాని మోదీ హయాంలో 600 మావోయిస్టు శిబిరాలను ధ్వంసం చేశాం. 2026 డిసెంబర్ 31 నాటికి దేశం నుంచి మావోయిజాన్ని పూర్తిగా తుడిచిపెట్టేస్తాం,” అని ఆయన ధీమా వ్యక్తం చేశారు.