Anil Ambani ED Notice : అనిల్ అంబానీకి ఎన్‌ఫోర్స్‌మెంట్ డైరెక్టరేట్ (ఈడీ) మరోసారి నోటీసులు జారీ చేసింది. బ్యాంకు మోసం, మనీలాండరింగ్ ఆరోపణలపై ఆయనను నవంబర్ 14న విచారణకు హాజరు కావాలని ఈడీ ఆదేశించింది.
తాజాగా అనిల్ అంబానీకి ఈడీ అందించిన నోటీసులు ఎస్బీఐ నుంచి తీసుకున్న రుణాల ఎగవేత, ఆ నిధుల అక్రమ తరలింపుకు సంబంధించిన విషయంగా తెలుస్తుంది. 66 ఏళ్ల అనిల్ అంబానీని ఈ ఏడాది ఆగస్టులో ఈడీ ఒకసారి విచారించింది. ఇప్పుడు మరోసారి నోటీసులు పంపి విచారణకు హాజరు కావాలని కోరింది.
ఈ కేసు 2019లోనే ప్రారంభమయ్యింది. ఇండియన్ పీనల్ కోడ్ సెక్షన్లు 120-బి (క్రిమినల్ కాన్‌స్పిరసీ), 406, 420 (చీటింగ్) మరియు ప్రివెన్షన్ ఆఫ్ కరప్షన్ యాక్ట్ కింద దర్యాప్తు జరుగుతోంది. రిలయన్స్ కమ్యూనికేషన్స్ (ఆర్‌కామ్), రిలయన్స్ పవర్, రిలయన్స్ ఇన్‌ఫ్రా, రిలయన్స్ కమర్షియల్ ఫైనాన్స్, రిలయన్స్ హోమ్ ఫైనాన్స్, సీఎల్‌ఈ ప్రైవేట్ లిమిటెడ్ వంటి కంపెనీలు ఈ కేసులో చిక్కుకున్నాయి. ఈ కంపెనీలు ఎస్బీఐ నుంచి రూ. 17 వేల కోట్లకు పైగా రుణాలు తీసుకుని, ఆ నిధులను అక్రమంగా తరలించాయని ఆరోపణలు ఉన్నాయి. షెల్ కంపెనీల ద్వారా డబ్బు మళ్లించడం, ఆర్థిక ప్రకటనల్లో అస్పష్టతలు వంటి ఆరోపణలు కూడా ఉన్నాయి.
ఈడీ ఇప్పటికే గ్రూప్ కంపెనీల ఆస్తులపై చర్యలు చేపట్టింది. ఈ నెల 3న నవీ ముంబైలోని ధీరుభాయ్ అంబానీ నాలెడ్జ్ సిటీలో 132 ఎకరాల భూమిని రూ. 4,462 కోట్లకు జప్తు చేసింది. ముందుగా 42 ఆస్తులను రూ. 3,083 కోట్లకు జప్తు చేసింది. మొత్తంగా రూ. 7,500 కోట్లకు పైగా ఆస్తులు ఈడీ చేతిలోకి వచ్చాయి. ఈ చర్యలు మనీలాండరింగ్ నిరోధక చట్టం (పీఎమ్‌ఎల్‌ఏ) కింద జరిగాయి.
మినిస్ట్రీ ఆఫ్ కార్పొరేట్ అఫైర్స్ (ఎంసీఏ) కూడా ఈ విషయంలో చర్యలు తీసుకుంది. ఈ వారం సీరియస్ ఫ్రాడ్ ఇన్వెస్టిగేషన్ ఆఫీస్ (ఎస్‌ఎఫ్‌ఐఓ)ను నాలుగు కంపెనీలపై – ఆర్‌ఇన్‌ఫ్రా, ఆర్‌కామ్, ఆర్‌సిఎఫ్‌ఎల్, సీఎల్‌ఇ – దర్యాప్తు చేయమని ఆదేశించింది. బ్యాంకులు, ఆడిటర్లు, రేటింగ్ ఏజెన్సీల నుంచి వచ్చిన ఫోరెన్సిక్ ఆడిట్ రిపోర్టుల్లో ఆర్థిక అస్పష్టతలు తేలాయి. డెబ్ట్ డిఫాల్ట్‌ల తర్వాత ఈ విషయాలు వెలుగులోకి వచ్చాయి.
అనిల్ అంబానీ గ్రూప్ గతంలో సైతం భారీ ఆర్థిక సమస్యలు ఎదుర్కొంది. రిలయన్స్ క్యాపిటల్, ఆర్‌కామ్ వంటి కంపెనీలు రుణాలు తిరిగి చెల్లించలేకపోయాయి. ఈ కేసు భారతీయ వ్యాపార రంగంలో కార్పొరేట్ గవర్నెన్స్, రుణాల ఉపయోగంపై చర్చలకు దారి తీస్తోంది. అనిల్ అంబానీ ఈ నోటీసుకు ఎలా స్పందిస్తారో చూడాలి.
