Rent : బెంగళూరు నగరంలో అద్దెకు ఇల్లు వెతకడం అంటే ఉద్యోగం వెతకడం కంటే కష్టమనే అపవాదు ఎప్పటినుంచో ఉంది. అయితే, తాజాగా సోషల్ మీడియాలో వైరల్ అవుతున్న ఒక ప్రకటన, నగరంలోని అద్దె మార్కెట్ ఎంత అసంబద్ధంగా మారిందో కళ్లకు కట్టింది.

బెంగళూరులోని ప్రీమియం ప్రాంతమైన ఫ్రేజర్ టౌన్‌లో ఒక అత్యాధునిక 2 బెడ్‌రూమ్ (2BHK) ఫ్లాట్‌ను అద్దెకు ఇవ్వడానికి పెట్టిన జాబితా ఇప్పుడు పెద్ద దుమారాన్ని రేపింది. ఈ ప్రకటన ప్రకారం.. కేవలం ₹20,000 నెలవారీ అద్దెకు ఏకంగా సెక్యూరిటీ డిపాజిట్ కింద అక్షరాలా ₹30 లక్షలు డిమాండ్ చేస్తున్నారు. కొత్త భవనంలో, డిజైనర్ ఇంటీరియర్స్, మాడ్యులర్ కిచెన్, పూర్తి పవర్ బ్యాకప్, సెక్యూరిటీ మరియు కార్ పార్కింగ్ వంటి అన్ని సౌకర్యాలు ఉన్నప్పటికీ, ఈ అసాధారణ డిపాజిట్ మొత్తం చూసి నెటిజన్లు ఆశ్చర్యపోయారు. ఒక రెడిట్ యూజర్ ఈ జాబితాను షేర్ చేయడంతో, బెంగళూరు అద్దె పరిస్థితులపై తీవ్ర చర్చ మొదలైంది.

రూ. 30 లక్షల డిపాజిట్ డిమాండ్‌పై రెడిట్ వినియోగదారులు తీవ్ర ఆగ్రహం వ్యక్తం చేశారు. ఒక నెటిజన్ ఆశ్చర్యపోతూ, 30 లక్షల డిపాజిట్ పెడితే, దానికంటే తక్కువ EMI తో ఒక ఫ్లాట్‌ను కొనుగోలు చేయవచ్చు కదా? ఎవరు ఇస్తారు అంత మొత్తం? అని ప్రశ్నించారు.

మరొక వినియోగదారు ఈ పరిస్థితిని స్కామ్‌గా అభివర్ణించారు. భూస్వాములు తమ ఫ్లాట్‌ను అద్దెకు ఇవ్వడం కంటే, ఈ భారీ డిపాజిట్ మొత్తాన్ని (ఒక రకమైన లీజు పెట్టుబడిలా) పొంది, దానిని పెట్టుబడి కోసం ఉపయోగించుకోవాలని చూస్తున్నారని విమర్శించారు. అధిక డిపాజిట్లు అడిగే బదులు, ఇంటిని లీజుకు ఇవ్వడానికి యజమానులు మొగ్గు చూపుతారని కొందరు తమ అభిప్రాయాన్ని పంచుకున్నారు.

లక్షల జీతం ఉన్నా ఇబ్బందులే
ఈ వైరల్ ఘటన, బెంగళూరులోని ఉద్యోగుల కష్టాలను మరోసారి వెలుగులోకి తెచ్చింది.వైట్‌ఫీల్డ్‌ వంటి టెక్ హబ్‌లలో కూడా అద్దె స్థలాలు దొరకడం కష్టంగా మారిందని, అధిక ధరల కారణంగా మంచి ప్రాంతాలను వదిలి భయంకరమైన ప్రాంతాల్లో రాజీ పడాల్సి వస్తోందని ఒక నెటిజన్ తన ఆవేదన వ్యక్తం చేశారు.ఒంటరిగా నగరంలో పనిచేస్తున్న వారికి, ఇలాంటి అసంబద్ధమైన డిపాజిట్లను ఎదుర్కొనే బదులు పీజీలలో ఉండటమే ఉత్తమమని మరికొందరు సలహా ఇచ్చారు.

పెరుగుతున్న అద్దె ధరలు, ముఖ్యంగా ఫ్రేజర్ టౌన్, వైట్‌ఫీల్డ్ లాంటి ప్రీమియం ప్రాంతాల్లో, మధ్యస్థాయి ఆదాయ వర్గాల ఉద్యోగులకు పెను సవాలుగా మారాయి. ప్రభుత్వం వైపు నుండి నియంత్రణ లేకపోవడం, భూస్వాములు భారీ పెట్టుబడులను ఆశించడం ఈ అసమాన పరిస్థితులకు దారితీస్తోందని వినియోగదారులు విమర్శిస్తున్నారు.బెంగళూరు అద్దె మార్కెట్ వైఫల్యానికి, అద్దె స్కామ్‌ల వాదనలకు ఈ జాబితా చర్చ ఒక తాజా ఉదాహరణగా నిలిచింది.