Gujarat: గుజరాత్ 18వ సీఎంగా భూపేంద్ర పటేల్ నేడు ప్రమాణ స్వీకారం చేయనున్నారు. మధ్యాహ్నం రెండు గంటలకు గాంధీ నగర్‌‌లో ప్రమాణ స్వీకార కార్యక్రమం జరుగుతుంది. ఈ కార్యక్రమానికి ప్రధాని మోదీ, కేంద్ర హోం మంత్రి అమిత్ షా, జేపీ నద్దా, రాజ్‌నాథ్‌ సింగ్‌తోపాటు యూపీ సీఎం యోగి ఆదిత్య నాథ్ కూడా హాజరవుతారు. భూపేంద్ర పటేల్ సీఎంగా ప్రమాణ స్వీకారం చేయనుండటం ఇది రెండోసారి.
గత ఏడాది సెప్టెంబర్ నుంచి ఆయన సీఎంగా కొనసాగుతున్నారు. ఈ రోజు కార్యక్రమంలో భూపేంద్ర పటేల్‌తోపాటు మరికొంత మంది మంత్రులుగా ప్రమాణ స్వీకారం చేస్తారు. గుజరాత్ గవర్నర్ ఆచార్య దెవ్రత్ సమక్షంలో ఈ కార్యక్రమం జరుగుతుందని ఆ పార్టీ రాష్ట్ర అధ్యక్షుడు సీఆర్ పాటిల్ తెలిపారు. ఇటీవలి గుజరాత్ ఎన్నికల్లో బీజేపీ ఘన విజయం సాధించిన సంగతి తెలిసిందే.
182 అసెంబ్లీ సీట్లున్న గుజరాత్‌లో బీజేపీ 156 సీట్లు గెలుచుకుంది. కాంగ్రెస్ 17 సీట్లు గెలుచుకోగా, ఆమ్ ఆద్మీ పార్టీ 5 సీట్లు గెలుచుకుంది. గుజరాత్‌లో 1995 నుంచి వరుసగా గెలుస్తూ వస్తోంది. ఈసారి ఎన్నికల్లో భూపేంద్ర పటేల్ నాయకత్వంలోని బీజేపీ నరేంద్ర మోదీ రికార్డును బ్రేక్ చేసింది. మోదీ గుజరాత్ సీఎంగా ఉన్నప్పటికంటే ఎక్కవ సీట్లు సాధించింది బీజేపీ.
