BJP nationwide campaign on GST 2.0 reforms : వస్తు, సేవల పన్ను (జీఎస్టీ) విధానంలో కీలక సంస్కరణలకు కేంద్ర ప్రభుత్వం తెరతీసింది. సెప్టెంబరు 22 నుంచి అమల్లోకి రానున్న కొత్త పన్ను రేట్లపై సామాన్య ప్రజలకు, వ్యాపారులకు అవగాహన కల్పించేందుకు భారతీయ జనతా పార్టీ (బీజేపీ) దేశవ్యాప్త ప్రచార కార్యక్రమానికి శ్రీకారం చుట్టింది. ఓవైపు క్షేత్రస్థాయిలో ప్రజలకు చేరువయ్యేందుకు కమలదళం భారీ ప్రణాళిక రచిస్తుండగా, మరోవైపు ఈ సంస్కరణలకు ఏకాభిప్రాయంతో మద్దతు పలికిన రాష్ట్రాలకు కేంద్ర ఆర్థిక మంత్రి నిర్మలా సీతారామన్‌ స్వయంగా కృతజ్ఞతలు తెలుపుతూ లేఖలు రాయడం ప్రాధాన్యం సంతరించుకుంది. అసలు జీఎస్టీ 2.0లో సామాన్యుడికి మేలు చేకూర్చే అంశాలేమిటి? ఈ భారీ ప్రచార కార్యక్రమం వెనుక కమలదళం వ్యూహమేంటి..?

ప్రతి జిల్లాలో ‘చౌపల్’.. జనంలోకి బీజేపీ : జీఎస్టీలో చేసిన మార్పులు, వాటి వల్ల కలిగే ప్రయోజనాలను ప్రజల్లోకి బలంగా తీసుకెళ్లేందుకు బీజేపీ పకడ్బందీ కార్యాచరణను సిద్ధం చేసింది. పార్టీ ప్రధాన ప్రతినిధి అనిల్ బలూని వెల్లడించిన వివరాల ప్రకారం, దేశంలోని ప్రతి జిల్లాలోనూ ప్రత్యేక అవగాహన కార్యక్రమాలు నిర్వహించనున్నారు. ముఖ్యంగా, ప్రజలతో మమేకమై సంస్కరణల సారాంశాన్ని వివరించేందుకు ‘చౌపల్’ (గ్రామ సభలు/రచ్చబండ సమావేశాలు) తరహా కార్యక్రమాలను ఏర్పాటు చేయాలని నిర్ణయించారు. ఈ ప్రచార పర్వంలో సీనియర్ కేంద్ర మంత్రులు, పార్టీ జాతీయ ప్రతినిధులు, ప్రధాన కార్యదర్శులు పాలుపంచుకోనున్నారు. ప్రతి రాష్ట్ర రాజధానిలోనూ వీరు విలేకరుల సమావేశాలు నిర్వహించి, జీఎస్టీ 2.0 ఆవశ్యకతను, ప్రయోజనాలను వివరిస్తారు.

రాష్ట్రాలకు నిర్మలమ్మ ధన్యవాద లేఖ : జీఎస్టీ మండలి సమావేశంలో పన్ను రేట్ల సవరణపై భిన్నాభిప్రాయాలు వ్యక్తమైనప్పటికీ, చివరికి ఏకాభిప్రాయం సాధించడంపై కేంద్ర ఆర్థిక మంత్రి నిర్మలా సీతారామన్‌ హర్షం వ్యక్తం చేశారు. సంస్కరణలకు మద్దతుగా నిలిచిన అన్ని రాష్ట్రాల ఆర్థిక మంత్రులకు ఆమె ప్రత్యేకంగా ధన్యవాదాలు తెలుపుతూ లేఖలు రాశారు. “తీవ్రమైన చర్చలు, వాదనల అనంతరం ప్రజా ప్రయోజనాల దృష్ట్యా మండలి ఏకతాటిపైకి వచ్చి చారిత్రక నిర్ణయం తీసుకుంది. ఇది భారత ప్రజలకు ఎంతో ఉపశమనం కలిగిస్తుంది. ఈ స్ఫూర్తికి నా కృతజ్ఞతలు,” అని నిర్మల తన లేఖలో పేర్కొన్నట్లు తెలిపారు. వాస్తవానికి రెండు రోజుల పాటు జరగాల్సిన మండలి సమావేశం, సుదీర్ఘ మారథాన్ చర్చల అనంతరం తొలిరోజే ఏకాభిప్రాయంతో ముగియడం గమనార్హం.

ఏకాభిప్రాయం వెనుక అసలు కథ : పన్ను రేట్ల తగ్గింపు ప్రతిపాదనను రాష్ట్రాలు స్వాగతించినప్పటికీ, తద్వారా తమ ఆదాయానికి గండి పడుతుందేమోనన్న ఆందోళనను వ్యక్తం చేశాయి. ఈ నేపథ్యంలో కేంద్రమంత్రి నిర్మలా సీతారామన్‌ రాష్ట్రాలకు కీలకమైన హామీ ఇచ్చారు. “పన్నుల కోత ప్రభావం కేవలం రాష్ట్రాలపైనే కాదు, కేంద్రంపైనా పడుతుంది. అయితే, ధరలు తగ్గినప్పుడు ప్రజల కొనుగోలు శక్తి పెరిగి, వినియోగం పెరుగుతుంది. తద్వారా పన్నుల రూపంలో వచ్చే ఆదాయం తిరిగి పుంజుకుంటుంది. కాబట్టి ఆందోళన అవసరం లేదు,” అని ఆమె రాష్ట్రాలకు భరోసా ఇచ్చారు. ఈ హామీతోనే రాష్ట్రాలు ఏకాభిప్రాయానికి వచ్చి సంస్కరణలకు మార్గం సుగమం చేశాయి. మొత్తంమీద, జీఎస్టీ 2.0ను ఒక చారిత్రక సంస్కరణగా ప్రజల ముందుంచేందుకు బీజేపీ ప్రభుత్వం రాజకీయంగా, పరిపాలనాపరంగా అన్ని చర్యలూ తీసుకుంటోంది.