Ravi Kishan death threat : ప్రముఖ నటుడు, గోరఖ్‌పూర్ బీజేపీ ఎంపీ రవి కిషన్‌కు హత్య బెదిరింపులు రావడం తీవ్ర కలకలం రేపుతోంది. తమ వర్గాన్ని అవమానించేలా వ్యాఖ్యలు చేశారనే కారణంతో, నాలుగు రోజుల్లో బిహార్‌కు వస్తే ప్రాణాలు తీస్తామని ఓ అజ్ఞాత వ్యక్తి ఫోన్‌లో హెచ్చరించడం సంచలనంగా మారింది. అసలు ఆ ఫోన్ కాల్ ఎక్కడి నుంచి వచ్చింది? బెదిరింపులకు కారణమేంటి? దీనిపై ఎంపీ కార్యాలయం ఎలా స్పందించింది?
అసలేం జరిగింది : బీజేపీ ఎంపీ రవి కిషన్ వ్యక్తిగత కార్యదర్శి శివం ద్వివేదీకి గుర్తుతెలియని నంబర్ నుంచి ఒక ఫోన్ కాల్ వచ్చింది. ఫోన్ చేసిన వ్యక్తి, ఎంపీ రవి కిషన్‌ను ఉద్దేశించి తీవ్రమైన పదజాలంతో దూషిస్తూ బెదిరింపులకు పాల్పడ్డాడు.
పోలీసుల కథనం ప్రకారం, “రవి కిషన్ మా వర్గాన్ని అవమానించేలా మాట్లాడారు. దానికి తగిన మూల్యం చెల్లించుకోవాల్సిందే. మరో నాలుగు రోజుల్లో ఆయన బిహార్ పర్యటనకు రానున్నారు. ఇక్కడికి వస్తే ఆయన్ను చంపేస్తాం,” అని నిందితుడు హెచ్చరించాడు. ఈ మేరకు శివం ద్వివేదీ ఉత్తర్‌ప్రదేశ్‌లోని గోరఖ్‌పూర్ పోలీసులకు ఫిర్యాదు చేశారు.
ఆధారం లేని ఆరోపణ : అయితే, నిందితుడు ఆరోపిస్తున్నట్లుగా ఎంపీ రవి కిషన్ ఏ వర్గాన్ని ఉద్దేశించి ఎటువంటి అభ్యంతరకర వ్యాఖ్యలు చేయలేదని ఆయన వ్యక్తిగత కార్యదర్శి శివం ద్వివేదీ తన ఫిర్యాదులో స్పష్టం చేశారు. కేవలం దురుద్దేశంతోనే ఈ బెదిరింపులకు పాల్పడుతున్నారని ఆయన పేర్కొన్నారు.
నిందితుడిని గుర్తించిన పోలీసులు : ఫిర్యాదు స్వీకరించిన పోలీసులు వెంటనే రంగంలోకి దిగి దర్యాప్తు ప్రారంభించారు. ఫోన్ నంబర్ ఆధారంగా నిందితుడు బిహార్‌లోని అరా జిల్లాకు చెందిన అజయ్ కుమార్‌గా ప్రాథమికంగా గుర్తించినట్లు సమాచారం. నిందితుడిని పట్టుకునేందుకు పోలీసులు చర్యలు ముమ్మరం చేశారు. ఈ ఘటనపై కేసు నమోదు చేసుకుని, అన్ని కోణాల్లో దర్యాప్తు చేస్తున్నట్లు తెలిపారు.
