Trinamool Congress Confronts Election Commission Over BLO Deaths: దేశ రాజధాని ఢిల్లీలోని అశోక రోడ్ వేదికగా శుక్రవారం తీవ్ర ఉద్రిక్తత నెలకొంది. పశ్చిమ బెంగాల్ అధికార తృణమూల్ కాంగ్రెస్ పార్టీ (Trinamool Congress) ఎంపీల బృందం కేంద్ర ఎన్నికల సంఘం (Election Commission of India) కార్యాలయం అయిన ‘నిర్వాచన్ సదన్’లో అధికారులను నిలదీసింది. బెంగాల్‌లో జరుగుతున్న ప్రత్యేక ఓటర్ల జాబితా సవరణ (Special Intensive Revision – SIR) ప్రక్రియపై తీవ్ర అభ్యంతరం వ్యక్తం చేస్తూ, ఇది బీజేపీ ఆడుతున్న రాజకీయ నాటకమని ఆరోపించింది. ఈ సందర్భంగా టీఎంసీ ఎంపీ డెరెక్ ఓబ్రెయన్ నేరుగా ప్రధాన ఎన్నికల కమిషనర్ (CEC) జ్ఞానేష్ కుమార్‌పై సంచలన వ్యాఖ్యలు చేశారు. “మీ చేతులకు రక్తం అంటుకుంది” అంటూ తీవ్ర స్థాయిలో విరుచుకుపడ్డారు.

ALSO READ: PM Modi in Goa : గోవా గడ్డపై శ్రీరామ వైభవం: ప్రధాని మోదీ చేతుల మీదుగా భారీ విగ్రహావిష్కరణ!

ఆ 38 మంది మరణాలకు కారణం మీరే!

దాదాపు రెండు గంటల పాటు సాగిన ఈ సమావేశంలో తృణమూల్ బృందం ఎన్నికల సంఘం తీరును ఎండగట్టింది. బెంగాల్‌లో చేపట్టిన SIR ప్రక్రియ కారణంగా విపరీతమైన పని ఒత్తిడి, మానసిక వేదన తట్టుకోలేక ఇప్పటివరకు 38 మంది బూత్ లెవెల్ ఆఫీసర్లు (BLOs), ఇతర సిబ్బంది మరణించారని టీఎంసీ ఆవేదన వ్యక్తం చేసింది. దీనికి సంబంధించిన మృతుల జాబితాను కూడా వారు కమిషన్‌కు అందజేశారు. సరైన శిక్షణ లేకుండా, అమానవీయమైన డెడ్‌లైన్లతో సిబ్బందిని వేధిస్తున్నారని, ఈ మరణాలకు ఎన్నికల సంఘమే బాధ్యత వహించాలని వారు డిమాండ్ చేశారు.

ఐదు ప్రశ్నలు.. మౌనమే సమాధానం!

సమావేశం అనంతరం బయటకు వచ్చిన డెరెక్ ఓబ్రెయన్ మీడియాతో మాట్లాడుతూ, తాము సీఈసీని ఐదు సూటి ప్రశ్నలు అడిగామని, కానీ కమిషనర్ గంట సేపు మాట్లాడినా ఒక్క ప్రశ్నకు కూడా సమాధానం ఇవ్వలేదని మండిపడ్డారు. ఆ ప్రశ్నలు ఇవే:

1. బెంగాల్‌నే ఎందుకు టార్గెట్ చేశారు? బంగ్లాదేశ్, మయన్మార్ సరిహద్దులు పంచుకుంటున్న త్రిపుర, మేఘాలయ, మణిపూర్ వంటి ఇతర రాష్ట్రాల్లో ఈ ‘స్పెషల్ ఇంటెన్సివ్ రివిజన్’ ఎందుకు చేయడం లేదు? కేవలం బెంగాల్‌ను మాత్రమే ఎందుకు లక్ష్యంగా చేసుకున్నారు?

2. ఓటర్ల జాబితా రాత్రికి రాత్రే ఎలా మారింది? 2024 లోక్‌సభ ఎన్నికల్లో వాడిన ఓటర్ల జాబితానే ఇప్పుడు ‘నమ్మదగనిది’గా ఎలా మారింది? అలాంటప్పుడు ప్రస్తుత లోక్‌సభను రద్దు చేయాలా?

3. పక్షపాతం ఎందుకు? బీజేపీ చేసే ఫిర్యాదులపై వెంటనే స్పందిస్తున్న ఈసీ, తాము బీఎల్ఓల మరణాలపై, ఇతర సమస్యలపై ఎన్నిసార్లు ఫిర్యాదు చేసినా ఎందుకు పట్టించుకోవడం లేదు?

4. మైనారిటీలను తొలగించే కుట్రనా? బెంగాలీలను, మైనారిటీ ఓటర్లను జాబితా నుంచి తొలగించేందుకే బీజేపీ ఈ కుట్ర పన్నిందని, దీనికి ఈసీ సహకరిస్తోందా?

5. బీజేపీ ఆదేశాలతో పనిచేస్తున్నారా? ఎన్నికల సంఘం తన రాజ్యాంగబద్ధమైన స్వయంప్రతిపత్తిని కోల్పోయి, బీజేపీ ఆదేశాల మేరకు నడుచుకుంటోందా?

రానున్న రోజుల్లో పెద్ద యుద్ధమే..

టీఎంసీ బృందంలో మహువా మోయిత్రా, కళ్యాణ్ బెనర్జీ వంటి ఫైర్‌బ్రాండ్ ఎంపీలు కూడా ఉన్నారు. “చరిత్ర మిమ్మల్ని క్షమించదు” అని కళ్యాణ్ బెనర్జీ సీఈసీ ముఖం మీదే చెప్పినట్లు సమాచారం. సుప్రీంకోర్టు ఈ ప్రక్రియపై స్టే ఇవ్వడానికి నిరాకరించినప్పటికీ, డిసెంబర్ 9న తదుపరి విచారణ జరగనుంది. మరోవైపు, రాబోయే పార్లమెంట్ శీతాకాల సమావేశాల్లో ఈ అంశాన్ని ప్రధాన అస్త్రంగా మార్చుకుని కేంద్రంపై పోరాడాలని మమతా బెనర్జీ ప్రభుత్వం నిర్ణయించుకుంది. ఫిబ్రవరి 7, 2026న తుది ఓటర్ల జాబితా విడుదల కానుంది.

ALSO READ: Karnataka Leadership Row: కర్ణాటక పాలిటిక్స్‌లో ‘త్యాగం’ మంటలు.. సిద్ధరామయ్య కుర్చీకి ఎసరు? డీకే వ్యూహం ఇదేనా?